“Unsa ang Akong Nadiskobrehan Sa Dihang Ako Miundang gikan sa Social Media,” Liahona, Mar. 2024.
Unsa ang Akong Nadiskobrehan Sa Dihang Ako Miundang gikan sa Social Media
Ang pagpakunhod sa akong paggamit sa social media nakahatag kanako og dugang presensiya alang sa akong mga anak ug nakapalambo sa akong relasyon uban sa Manluluwas.
Paghulagway ni David Green
Sa milabay nga pipila ka tuig, ako nasayod nga ang Dios nag-aghat kanako sa pagpalayo gikan sa social media. Nasayod ko nga ang pag-undang gikan sa social media maanindot alang kanako, apan nasayod usab ko nga nalingaw ko sa komunidad nga akong nakaplagan diha. Wala ko masayod kon unsaon pagtakdo niining duha ka butang; basta ang akong nahibaloan nga adunay butang nga kinahanglan nga usbon.
Nagbasa ko og libro nga nakapamalandong kanako sa pangutana, “Unsa kadako ang panahon sa social media ang sakto ra aron makahatag og benepisyo sa komunidad, nga wala ang tanan nga negatibong mga impluwensya?” Para nako, ang tubag niining pangutana anaa sa mga 20 minutos … sa usa ka buwan. Akong gitakda ang usa ka tumong aron mahitabo kini, ug uban sa tabang sa Ginoo, mas nahimo kining sayon kay sa akong gihunahuna. Ang butang nga wala nako damha mao kon unsa ka dako kining kausaban nga nakapalig-on sa akong relasyon sa akong Manluluwas. Akong nabati og mas maayo ang gugma sa Manluluwas alang kanako; akong nasabtan og mas klaro ang plano Niya alang kanako; ug akong nakita ang mga panginahanglan sa mga tawo sa akong palibot nga mas klaro.
Wala Motugot nga ang mga Selfie ang Motino sa Akong Bili sa Kaugalingon
Sa kanunay nasayod ko nga ako anak sa Dios ug nga Siya nahigugma kanako. Akong nabati ang gugma sa akong Manluluwas atol sa lisod nga mga panahon sa akong kinabuhi. Apan sagad kaayo nga akong gipasagdan ang social media nga modiktar kon unsaon nako sa pagtan-aw ug hunahunaon ang akong kaugalingon. Kutob sa mahimo ako naningkamot sa pagkombinser sa akong kaugalingon nga ang maanindot kaayo nga mga imahe diha sa social media wala makaapekto nako, sa tinuod kini nakaapekto. Ang pagkunhod sa akong panahon diha sa social media nagtugot kanako og kalinaw ug kahilom sa panghunahuna nga akong gikinahanglan aron madungog ang Manluluwas nga nagsulti kanako kon unsa ang iyang gibati mahitungod kanako. Wala nako maamgohi kon unsa ka dako ang akong kamingaw sa pagdungog sa Iyang tingog hangtod nga naghimo ko og dugang nga luna alang Kaniya nga maanaa diha.
Sa kanunay ako mituo sa plano sa kaluwasan. Nasayod ko nga si Jesukristo mao ang sentro niana nga plano. Apan motuo usab ko nga ang Langitnong Amahan adunay usa ka plano alang sa matag usa kanato. Si Larry M. Gibson, kanhi Unang Magtatambag sa Kinatibuk-ang Kapangulohan sa Young Men, nagtudlo, “Nasayod ko nga ang Langitnong Amahan nagpakabana sa matag usa kanato sa tinagsa ug dunay personal nga plano aron makab-ot ang atong mahangtorong destinasyon.”1
Ako migahin og daghang panahon sa pag-scroll sa pagpaningkamot ug pagsuta unsa ang akong katuyoan. Ang pagkaanaa sa social media nakahatag kanako og mas klaro nga pagtan-aw sa tanang mamugnaon, maanindot nga butang nga gipangbuhat sa mga tawo. Nakakat-on ko og daghan gikan niining mga tawhana, apan migahin ko og dakong panahon sa pagsiksik kay sa pagbuhat. Sukad sa pagpalayo gikan sa social media, mibati ko nga nagiyahan nga masayod sa piho nga paagi kon unsa ang gusto sa Langitnong Amahan nga akong buhaton. Daghan niining mga butanga makapahingangha ug lahi gikan sa unsay akong gituohan nga mao kini, apan nakahimo kini sa akong kinabuhi nga mas buhong ug mas abunda.
Ang Manluluwas mianhi aron nga kita makabaton og kinabuhi ug nga kita tingali makabaton niini sa mas abunda nga paagi (tan-awa sa Juan 10:10). Ako mapasalamaton sa mga pag-aghat nga gihatag kanato sa Espiritu Santo sa pagtabang kanato nga makabaton og mas abunda nga kinabuhi.
Kinabuhi Gawas sa Social Media
Ang Manluluwas nagtan-aw niadtong wala makit-i sa uban. Ganahan ko magbasa og mga estorya mahitungod Kaniya nga mangalagad ngadto sa maong katawhan ug sa pagtudlo kanila sa ilang bili. Ang paggahin og sobra kaayo nga panahon diha sa social media nakababag kanako gikan sa pagtan-aw sa mga tawo diha sa akong kinabuhi, lakip ang akong pamilya. Nakaamgo ko nga kon ang akong mga anak mibati nga wala nako makita, sila dayon sa dili madugay mangita na og mga tinubdan sa gawas aron sa pagmatuod sa ilang bili.
Ako nahingangha sa gugma nga anaa nako alang sa akong mga anak samtang ako mas makita uban kanila. Nahigugma ko sa akong katungdanan isip usa ka inahan nga labaw pa niining tuiga kay sa sukad pa. Akong nailhan akong mga silingan ug mas nahimong aktibo sa akong komunidad. Ang akong mga oportunidad sa pagserbisyo misaka. Nagtuo ko nga ang social media nakatabang kanako nga mas masayod, apan sa tinuod wala gyod nako igong gitagamtam ang higayon nga makita pag-ayo ang mga panginahanglan niadtong anaa sa akong palibot.
Ang pagkunhod sa akong paggamit sa social media sama sa usa ka gamay ug yano nga butang, apan kini nagtugot kanako nga makadugang og dako sa akong hugot nga pagtuo ug mapalambo ang akong relasyon sa akong Manluluwas. Ako nasayod nga ang Langitnong Amahan nahigugma kanato, adunay plano alang kanato, ug adunay mga anak nga nagkinahanglan mobati nga atong nabatyagan.
Ang tagsulat nagpuyo sa New York, USA.