Palihog Luwasa ang Kinabuhi ni Mama

Ni Christi Gerlach, Utah, USA

Ako nahadlok sa dihang ang akong mama kinahanglan nga maoperahan nga ablihan ang kasingkasing, apan ang usa ka mahalaron nga magtutudlo sa Primary nagtudlo kanako sa pag-ampo.

usa ka inahan nga nagpakaon sa iyang anak gikan sa usa ka plato — Christi Gerlach ug ang iyang inahan

Sa dihang 10 anyos pa ako, ang akong inahan adunay grabe nga pag-atake sa kasingkasing. Migahin siya og daghang semana didto sa ospital nga nakigbisog sa iyang kinabuhi.

Atol niining panahona, ang akong magtutudlo sa Primary, si Sister Ellen Johnson, miadto sa akong panimalay kausa sa usa ka semana aron makigkita nako. Bag-ohay lang ko nagsugod sa pagtambong sa Primary ug adunay limitado nga nasabtan sa ebanghelyo. Matag semana si Sister Johnson mohatag sa iyang pagpamatuod ngari kanako ug maghisgot mahitungod sa pag-ampo. Gitudloan ko niya nga kon ako mag-ampo, ang Langitnong Amahan motubag.

Human sa pipila ka semana, ang panglawas sa akong mama nagpadayon sa pagkunhod. Siya adunay depekto sa balbola sa kasingkasing nga gikinahanglan nga ayohon. Ang iyang doktor miingon nga siya mamatay kon walay pag-eksperimento nga pag-opera sa kasingkasing. Ang iyang tsansa sa pagkaayo, hinoon, anaa nalang sa 50/50.

Ang operasyon nga ablihan ang kasingkasing bag-o ug risgo sa sayo nga bahin sa mga tuig 1960. Ang mga surgeon nagplano sa paghiwa aron maabli ang dughan ni Mama hangtod sa iyang dugokan ug dayon ablihon ang iyang gusokan aron makita ang iyang kasingkasing. Daghang pasyente ang wala makalahutay sa operasyon. Naglagot ug nahadlok ko nga ang akong inahan mamatay.

Si Papa kasagaran anaa sa trabaho o anaa sa ospital uban ni Mama. Ang akong magulang nga babaye, si Pam, nag-atiman sa akong igsoong lalaki ug nako. Sa gabii, mibati ko og kamingaw ug kahadlok, apan naghunahuna ko mahitungod sa unsay gitudlo ni Sister Johnson ngari nako mahitungod sa pag-ampo. Ako sa kasagaran moluhod sa kiliran sa akong higdaanan ug maghilak, nangamuyo sa Langitnong Amahan sa pagluwas sa kinabuhi ni Mama.

Atol sa maong pag-ampo nga naghilak, usa ka dakong kalinaw ang miabot kanako ug mihunong ko sa paghilak. Mibati ko nga ang tanan OK ra. Mibati ko nga gipasaligan nga ang akong inahan mabuhi nga makita ko nga modako ug nga ako dili kinahanglan mabalaka. Wala ko nakadungog og usa ka tingog o nakakita og panan-awon, apan ako nakabaton og hilom, malinawon nga mga pagbati. Wala ko matahap niini. Ang Langitnong Amahan mitubag sa akong pag-ampo, ug ako nakahibalo niini.

mga kamot nga gihugpong tupad sa usa ka locket

Nakalahutay si Mama sa operasyon. Luya siya ug hapyugon kasagaran sa iyang kinabuhi, apan ang Langitnong Amahan mitubag sa akong mga pag-ampo ug miluwas sa iyang kinabuhi. Nabuhi siya nga nakakita sa akong pagdako, sa pagminyo, ug sa pagbaton og mga anak.

Mga katuigan ang milabay, sa dihang si Presidente Russell M. Nelson nahimong usa ka Apostol, si Mama misulti nako nga siya mao ang surgeon sa kasingkasing nga miluwas sa iyang kinabuhi. Misulat ko niya aron magpasalamat kaniya. Sa dihang mibalos siya og sulat, siya mipasalamat kanako sa akong sulat ug miila sa tabang sa Dios diha sa iyang buhat.