Kita Naghisgot kang Kristo

usa ka inahan ug mga anak nga naglingkod diha sa usa ka lamesa

Minahal nga mga Ginikanan,

Si Nephi mitudlo sa iyang katawhan kon unsa kamahinungdanon nga ibutang ang Ginoo sa unahan sa atong mga kinabuhi. Siya misulat, “Kami naghisgot kang Kristo, kami nalipay diha kang Kristo, kami nagsangyaw kang Kristo, kami nanagna kang Kristo, ug kami nagsulat sumala sa among mga panagna, nga ang among mga anak mahimo nga masayod sa unsa nga tinubdan sila mahimo nga mangita alang sa kapasayloan sa ilang mga sala” (2 Nephi 25:26). Mahimo ninyong rebyohon ang mosunod nga mga artikulo uban sa inyong pamilya aron itudlo sila ug ang uban nga inyong gihigugma ngadto sa ebanghelyo ni Jesukristo, ngadto sa Iyang giya, ug ngadto sa maalamon nga mga baroganan nga motabang kanato sa pagtinguha Kaniya diha sa usa ka nagkapuliki, moderno nga kalibotan.

Mga Panaghisgotan sa Ebanghelyo

Ang Ebanghelyo ni Jesukristo alang sa Tanan

Ang tanang tawo nagkinahanglan sa paglaom ug katubsanan nga gihatag sa ebanghelyo ug sa Pag-ula ni Jesukristo. Hisgoti uban sa inyong pamilya ang pipila sa mga pagtulon-an gikan sa artikulo ni Elder Jeffrey R. Holland kon sa unsang paagi kamo mohigugma, mopakigbahin, ug modapit sa usa ka tawo nga modawat ug mohangop sa ebanghelyo ni Jesukristo (tan-awa sa pahina 4).

Maalamon nga mga Baroganan alang sa Paggamit sa Media

Ang teknolohiya ug media makatabang nga mga himan kon gamiton sa husto nga paagi. Rebyoha ang pipila ka giya nga mga baroganan sa pahina 22 ug hisgoti uban sa inyong pamilya ang mga sumbanan alang sa paggamit sa media. Gamit ang “mga pangutana nga pamalandongan,” ikonsiderar kon unsay nahitabo nga maayo ug unsay mahimong palamboon.

Pagsunod sa Manluluwas pinaagi sa Hugot nga Pagtuo

Sa iyang artikulo sa pahina 40, si Elder Benjamin M. Z. Tai nagpakigbahin og upat ka paagi nga ang Manluluwas nagtabang kanato. Human marebyo kini uban sa inyong pamilya, hisgoti kon sa unsang paagi kamo natabangan samtang misunod kamo sa Manluluwas pinaagi sa hugot nga pagtuo.

Kalingawan sa Pamilya sa Dali, Sunod Kanako

Pagpangita kang Kristo sa Tanan nga mga Butang

2 Nephi 11:4

Gusto ni Nephi nga ang iyang katawhan motuo kang Jesukristo ug makakita nga ang balaod ni Moises nagtudlo kanila ngadto sa Manluluwas. Siya mitudlo, “Tanan nga mga butang diin gikahatag sa Dios gikan sa sinugdanan sa kalibotan, ngadto sa tawo, mao ang naghulagway kaniya.”

Ang mga nilalang sa Dios makapunting kanato ngadto kang Jesukristo kon ang atong pagtutok hugot nga anaa Kaniya. Ganahan kaayo si Nephi nga motudlo sa iyang katawhan mahitungod ni Jesukristo ug kon sa unsang paagi ang balaod ni Moises nagpunting kanila ngadto Kaniya.

Panaghisgotan: Sa unsang paagi ang moderno nga mga simbolo sa Pasko sa Pagkabanhaw “naghulagway” kang Kristo?

Pananglitan—Itlog: Simbolo sa bag-o nga kinabuhi. Nagpahinumdom kanato sa bag-o nga kinabuhi pinaagi sa pagkabanhaw. Sa gihapon, kon mabuak, kini mahimong makita nga sama sa usa ka walay sulod nga lubnganan, nagsimbolo sa walay sulod nga lubnganan ni Kristo.

Nating Karnero:

Liryo o mga bulak:

Unsa ang ubang mga tradisyon sa inyong pamilya sa Pasko sa Pagkabanhaw nga naghulagway kang Kristo?

Gikan sa Higala nga Magasin

Malipayong Pasko sa Pagkabanhaw!

Pangita og mga istorya ug mga kalihokan sa pagtabang sa inyong pamilya nga makabaton og usa ka mahinungdanon, nakasentro kang Kristo nga Pasko sa Pagkabanhaw.

Andam na alang sa Kinatibuk-ang Komperensiya

Mahinamon ba kamo nga motan-aw sa komperensiya sunod bulan? Ang Higala niining bulana adunay usa ka kalihokan alang sa inyong mga anak nga mabuhat samtang maminaw sila.

Pagpabiling Luwas sa Peligro diha sa Online

Basaha ang usa ka istorya mahitungod sa usa ka batang babaye kinsa mibati sa Espiritu Santo nga miaghat kaniya sa paghunong og tan-aw og dili maayo nga mga bidyo. Makakita kamo og dugang nga mga kapanguhaan bahin sa kahilwasan sa media diha sa Friend.ChurchofJesusChrist.org.

Pagkat-on gikan sa Basahon ni Mormon

Pangita og sinemana nga mga kalihokan, gihulagway nga mga istorya sa kasulatan, ug dugang pa aron makatabang nga mahimong makalingaw ang inyong pamilya nga pagtuon sa kasulatan.