“Naadik sa usa ka Drama sa Telebisyon: Giunsa Nako Pagpatigbabaw ang Dios,” Liahona, Mar. 2024.
Naadik sa usa ka Drama sa Telebisyon: Giunsa Nako Pagpatigbabaw ang Dios
Sa dihang giundangan nako ang pagtan-aw niining drama sa telebisyon, akong gibati ang impluwensya sa Espiritu Santo nga milambo og maayo sa akong kinabuhi.
Mga Paghulagway pinaagi ni Benedetta Vialli / Salzman International
Ang pagpili ni Jesukristo nagdala og dakong gahom, “ug oh, pagkadako sa atong panginahanglan sa Iyang gahom sa mga adlawng umaabot.”1 Ang atong kalibotan anaa sa dakong kasamok. Ang kaaway ingon og adunay mas dakong impluwensya sa daghan kaayo nga mga anak sa Dios. Ang pagkadili balaan gihimaya, ug ang mga tentasyon mobalda kanato ug modala kanato palayo gikan niana nga makapaduol kanato ngadto sa Dios.
Aron mabuntog kini, kita kinahanglan gayod nga aktibong mopili ni Jesukristo sa atong mga kinabuhi ug undangan ang mga butang nga makasilo sa Espiritu. Si Moroni mitambag kanato, “Pagmaalamon sa mga adlaw sa inyong pagsulay; tangtangi ang inyong mga kaugalingon sa tanan nga mga kahugaw” (Mormon 9:28) ug midapit kanato sa, “[Pag]duol ngadto kang Kristo, ug paghingpit diha kaniya, ug ilimod ang inyong mga kaugalingon sa tanan nga dili diosnon; … ug mohigugma sa Dios uban sa tibuok ninyo nga gahom, hunahuna, ug kusog” (Moroni 10:32).
Unsaon nato sa pag-undang sa kalibotanon nga mga butang ug uban sa dugang nga tumong sa pagduol ngadto kang Kristo? Matag usa kanato anaa sa lain-laing ang-ang niining proseso. Kitang tanan makabiya sa butang nga nagpugong kanato gikan sa pagbati sa impluwensya sa Espiritu Santo sa mas hingpit nga paagi. Kita nagkinahanglan sa gahom sa Pag-ula sa Manluluwas aron mahimo kini, ug kini magsugod sa paggamit sa atong kabubut-on sa pagpili Kaniya.
Ang Tinguha sa Pagbati nga Nahisakop
Sa dihang usa ako ka senior sa high school, diha ko sa usa ka varsity sa cheerleading nga team. Matag adlaw sa praktis, ang mga batang babaye sa akong cheerleading nga team naghisgot kon unsa nay nahitabo sa usa ka kada adlaw nga drama sa telebisyon. Wala gyod ako mitan-aw niini ug nasayod nga usa kadto ka salida nga ubos og mga moral. Apan, mibati ko nga nalahi sa matag adlaw sa praktis samtang ang mga batang babaye maghisgot mahitungod sa salida. Ang Espiritu mihunghong ngari nako nga dili motan-aw niini, apan ganahan gyod ko nga malakip sa ilang panag-istoryahanay, busa misugod ko sa pagtan-aw.
Dili kadto ingon sa daotan para nako. Nangatarongan ko nga dili kadto makaapekto kanako. Nasayod ko nga dili ko maghimo sa daotan nga mga butang nga akong nakita sa gibuhat sa mga karakter. Naanad ko ug mitan-aw sa salida sa matag adlaw. Sa dihang mieskwela ko sa Bringham Young University, akong gihan-ay ang akong eskedyul sa klase aron makatan-aw ko niini sa matag adlaw. Wala gyod ako nakapalta og usa ka anib.
Naminyo ko ug nanganak sa akong unang anak. Ako siyang pakatulogon matag adlaw atol sa salida aron ko makatan-aw niini.
Samtang ang tuig milabay, ang Espiritu mihunghong ngari nako sa makadaghang higayon nga kinahanglan mohunong ko sa pagtan-aw niana nga salida. Apan mibalibad ko. Nalambigit na kaayo ko sa mga karakter ug sa ilang mga kinabuhi. Mao kadto ang akong paagi nga makarelaks, busa mipadayon ko sa pagtan-aw. Nakumbinser ko nga wala kadto nakapasakit nako.
Ang Imbitasyon
Disinuebe ka tuig human sa high school, nagtan-aw pa gihapon ko sa salida matag adlaw. Atol sa kinatibuk-ang komperensiya, si Sister Sheri L. Dew, kanhi Ikaduha nga Magtatambag sa Kinatibuk-ang kapangulohan sa Relief Society, namulong mahitungod sa pagbiya gikan sa kalibotan ug sa mga butang nga dili balaan. Miingon dayon siya, “Ako modapit sa matag usa kanato sa pag-ila og labing minus usa ka butang nga atong biyaan sa kalibotan ug mas magpaduol ngadto ni Kristo.”2
Sa dihang siya mihatag sa imbitasyon, gibati nako ang hilabihan nga pagbubo sa Espiritu, ug akong nadungog sa akong kaugalingong hunahuna, “Ikaw kinahanglan mohunong sa pagtan-aw niana nga salida karon!” Makapatandog kaayo kadto; sama ra kadto og usa ka sagpa sa akong nawong. Nasayod ko nianang tungora nga dili na nako mabaliwala kini nga pag-aghat. Mibati ko nga kinahanglan gyod dayon nga dili na gayod motan-aw sa salida pag-usab. Nakaamgo ko nga walay usa ka karakter ang nakahimo og bisan unsang mahiyason o halangdon. Akong gidapit ang basura ngadto sa akong kinabuhi sa matag adlaw. Mipasalig ko ngadto sa Ginoo, diha-diha dayon, nga ako dili na gayod motan-aw niini pag-usab.
Dili kadto sayon! Disenuebe ka tuig sa batasan ug pagkaadik lisod undangon. Miabot ang Lunes ug panahon na sa pagsugod sa salida. Milakaw ko padulong sa remote sa TV. Ganahan na kaayo nga ipasalida kini. Akong nahinumdoman ang akong pasalig ngadto sa Ginoo nga dili na gayod ko motan-aw pag-usab niini. Milakaw ko palayo.
Dayon naghunahuna ko kabahin sa akong paborito nga karakter ug naghunahuna kon unsa kaha ang mahitabo niya ug mibalik ngadto sa remote. Ako nasayod nga nagkinahanglan ko sa tabang sa Dios, busa miluhod koug nag-ampo alang sa kalig-on nga makahimo sa dili pagtan-aw niini. Gihunahuna nako ang akong saad ngadto sa Langitnong Amahan, ug migawas ko sa kwarto. Mipili ko sa pagsunod sa mga pag-aghat nga akong nadawat gikan sa Espiritu Santo ug sa pagtahod sa akong pasalig.
Kana nga kahimtang nagbalik balik sa matag adlaw nianang semanaha ug sa sunod. Matag adlaw, miluhod ako ug nag-ampo ug nangamuyo alang sa kalig-on aron dili na makatan-aw ug sa matag adlaw mipili ni Jesukristo ug mipalayo gikan sa salida sa telebisyon nga imoral. Ako nakadawat og kalig-on sa pagbuntog gikan sa gahom nga gitanyag sa Manluluwas pinaagi sa Iyang Pag-ula.
Human sa pipila ka higayon sa pagbuhat niini, usa ka milagro ang nahitabo. Ako hingpit nga nawad-an sa tanang tinguha sa pagtan-aw sa salida, human sa pagtan-aw niini sa matag adlaw sulod sa 19 ka tuig. Talagsaon kaayo kadto! Nawala usab ang akong tinguha sa pagtan-aw sa tanan nga kwestiyonable nga mga salida nga akong gipangtan-aw, busa hingpit ako nga mihunong.
Ang akong tanlag nahimong mas sensitibo sa akong pagabuhaton ug akong nailhan ang daotan kon usa kadto. Ako sa tinuod lang gusto ko molikay sa bisan unsang dagway sa daotan (tan-awa sa 1 Mga Taga-Tesalonica 5:22). Sensitibo na kaayo ko niini.
Ang Labing Talagsaong Panalangin
Apan ang labing makahingangha nga butang nga nahitabo mao nga akong nabati ang impluwensiya sa Espiritu Santo nga milambo sa akong kinabuhi lapas pa sa bisan unsang butang nga akong nasinati kaniadto. Ang akong espirituhanon nga pag-uswag mipaspas sa hilabihan! Sa tibuok niadtong katuigan ako nagtuo nga ako nagtagamtam sa pakig-uban sa Espiritu Santo, apan nakasinati lang diay og tipik sa unsay akong lagmit maangkon. Nakaamgo ko nga ang pagtan-aw niadtong mga salida sa tanang higayon nakaapekto kanako. Nawad-an ko og daghan kaayo nga katuigan sa pag-angkon og mas lig-on nga pakig-uban sa Dios. Sa dihang ako migamit sa akong kabubut-on sa pag-undang sa dili balaan, kalibotanon nga mga butang, ang Espiritu gawasnon sa pag-anhi kanako sa mas buhong kaayo, ug pagkatalagsaon sa kalainan nga nahimo diha sa akong kinabuhi aron mapalig-on, mahupay, ug mogiya kanako.
Kita adunay kalagmitan sa paggunit og hugot kaayo sa mga butang nga walay hinungdan—mga butang nga sa pagkatinuod mosira sa mga panalangin nga gusto sa Dios dad-on diha sa atong mga kinabuhi. Ngano kaha nga kita mobaylo man sa gamhanan, makapagahom nga impluwensya sa Espiritu alang sa kalingawan o sa popular? Tingali ang pagtan-aw og usa ka salida sa telebisyon dili na dakong butang o usa ka dakong sala, apan kini nagpugong kanako gikan sa pagbaton sa Espiritu Santo sa talagsaong kabuhong sa akong kinabuhi ug mipahinay sa akong espirituwal nga pag-uswag.
Mapasalamaton kaayo ko nga ang Ginoo wala moundang kanako apan mapailubon nagsige og hangyo kanako nga undangon ang mga butang nga dili balaan aron Siya mopuno sa akong kinabuhi sa Iyang naghingapin nga impluwensya.
Ang tagsulat nagpuyo sa Utah, USA.