“Ko Hono Langa ʻo e Tui Mālohí ʻo fou ʻi he Mateuteu Fakalaumālié.” Liahona, ʻAokosi 2024.
Talitali Lelei ki he Makasini ko ʻEní
Ko Hono Langa ʻo e Tui Mālohí ʻo fou ʻi he Mateuteu Fakalaumālié
ʻI ha taimi ʻoku fasitanunu ai ʻa e faingataʻa fakalaumālié, ʻoku akoʻi ʻe he kau palōfitá mo e kau ʻaposetoló ʻa e anga hono fakapapauʻi moʻoni ʻe heʻetau mateuteú ʻa e ikuʻanga ʻo e ngaahi faingataʻa ko iá, ʻi heʻetau moʻuí.
ʻI he makasini ko ʻení, ʻoku vahevahe ai ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e founga naʻe teuteuʻi ai ʻe he tui, pāteʻi, mo e mohu founga ʻa e ʻEikitau ko Molonaí ʻi hono teuteuʻi hono kakaí kae lava ʻo tāpuakiʻi kinautolu ʻe he ʻEikí ke nau ikunaʻi ʻa e ngaahi tau mo e kau Leimaná.
Naʻe pehē ʻe Molonai ki ha taki, ko hono fili naʻe liuá, “Kuo tuku e he ʻEikí … koe ki homau nimá. Pea ko ʻeni ʻoku ou fakaʻamu ke mou ʻiloʻi kuo fai ʻeni maʻamoutolu koeʻuhí ko ʻemau lotú pea mo ʻemau tui kia Kalaisí” (ʻAlamā 44:3).
ʻOku tohi ʻe ʻEletā Lenilani: “Naʻe fakafōtunga ʻe Molonai ha ngaahi tefitoʻimoʻoni te tau lava ʻo fakaʻaongaʻi ke tokoni ʻo feau ʻa e ngaahi faingataʻa ʻi heʻetau moʻui ʻi onopōní. ʻI heʻetau ngāue ʻaki ʻa e tui kia Sīsū Kalaisí, … Te Ne tāpuakiʻi kitautolu ʻaki Hono mālohí” (peesi 4).
ʻOku fakahaaʻi ʻe he ngaahi fakamatala mo e ngaahi talanoa ʻi he makasini ko ʻení ha ngaahi founga mahuʻinga te tau lava ai ke fai ʻeni. Naʻá ku tohi ʻi heʻeku fakamatalá, “ʻOfa te tau tukupā—tuʻo taha pea aofangatuku—ke fili ke tui kia Sīsū Kalaisí, ko ha tui ʻoku feʻunga ki he ngaahi faʻahitaʻu kotoa pē ʻo e moʻuí” (peesi 44). ʻI heʻetau fai iá, te tau mateuteu lelei ange ai ke maʻu ha tokoni fakalangi ʻi hono feau hotau ngaahi faingataʻaʻia fakalaumālié.
ʻEletā Mark D. Eddy
ʻO e Kau Fitungofulú
Naʻe “punou hifo ʻa Molonai ki he kelekelé, pea naʻá ne lotu fakamātoato ki hono ʻOtuá ke nofoʻia ʻe he ngaahi tāpuaki ʻo e tauʻatāiná hono ngaahi tokouá, kehe pē ke ʻi ai ha Kalisitiane ke nau kei maʻu ʻa e fonuá.”
Ki he Ngaahi Tāpuaki ʻo e Tauʻatāiná, tā fakatātā ʻa Scott M. Snow, ʻoua naʻa hiki hano tatau