Ko e hā Te u Lava ʻo Tala ki he Kakai Kehé fekauʻaki mo e Temipalé?
ʻOku mahuʻinga ʻa e founga ʻoku tau aleaʻi ai ʻa e temipalé.
Tā ʻo e Temipale Tegucigalpa Honduras naʻe faitaaʻi ʻe Cody Bell
ʻOku ou manatuʻi ʻeku fiefia ke maʻu hoku ʻenitaumení ʻi he taimi naʻá ku teuteu ai ke ʻalu ʻo ngāue fakafaifekaú. ʻOku ou manatuʻi foki ʻa e liliu ʻeku vēkeveke ko iá ki he loto-hohaʻá mo e puputuʻú hili hano ʻomi ʻe ha kau mēmipa ʻe niʻihi ʻo e fāmilí ha ngaahi fakatokanga fakatupu veiveiua fekauʻaki mo e fuofua taimi ʻo e hū ʻi he temipalé.
Naʻá ku ʻiloʻi naʻa nau loto-maʻa pē ʻi he feinga ke tokoniʻi au ke u maʻu ha aʻusia leleí. Kae pehē ange mai naʻe ʻikai ke nau nofotaha pē ʻi he fakatokanga mai ki he makehe ʻo e temipalé, kae tokoni mai ʻa e kakaí ke teuteuʻi au ki he temipalé ʻi ha ngaahi founga langaki moʻui mo totonu.
ʻI he fakakaukau ko iá, ko ha meʻa ʻeni ʻe fā ke fakakaukau ki ai ʻi hoʻo talanoa mo e niʻihi ʻoku teuteu ke nau fuofua hū ʻi he temipalé:
1. Tokanga Taha ki he Ngaahi Moʻoní kae ʻikai ko e Ngaahi Fakakaukaú
Ko ha fuofua taimi ʻoku ʻalu ai ha taha ʻoku tau ʻofa ai ki he temipalé, ʻoku fakanatula pē ʻetau fakaʻamu ke vahevahe ʻetau ngaahi aʻusiá mo ia. Ka ʻoku fiemaʻu ke tau fakapapauʻi ko e meʻa ʻoku tau vahevahé ʻoku fakatefito ia ʻi he ngaahi moʻoni ʻo e ongoongoleleí kae ʻikai ko e fakakaukau pē ʻatautolú.
ʻOku fakaʻatā ʻe he fakamatala tonú ʻa e niʻihi ʻoku tau ʻofa aí ke nau tokanga taha ki he Fakamoʻuí kae ʻoua naʻa takihalaʻi ke nau ongoʻi ha faʻahinga meʻa ʻoku kehe fekauʻaki mo ʻenau ngaahi aʻusia ʻi he temipalé. Naʻe pehē ʻe Palesiteni Lāsolo M. Nalesoni, “ʻOku tuʻunga ʻa e ueʻi fakalaumālie leleí ʻi he fakamatala leleí.”
Te ke lava ʻo vahevahe ʻa e fakamatala totonú (pea naʻa mo e ʻū tā!) fekauʻaki mo e temipalé mei he kalasi teuteu ki he temipalé, folofolá, mo e temples.ChurchofJesusChrist.org. Mahalo te tau manavasiʻi ʻi he taimi ʻe niʻihi fekauʻaki mo e meʻa ke vahevahé, ka ʻi heʻetau tafoki ki he ngaahi maʻuʻanga tokoní kae ʻikai ko ʻetau ngaahi fakakaukaú, ʻoku ʻikai fiemaʻu ia ke tau hohaʻa ki hono vahevahe ʻo fuʻu tōtuʻá.
ʻI heʻetau ʻave ʻa e fakamatala totonu fekauʻaki mo e temipalé, ʻoku tau ʻoatu ai ha fakakaukau mahino ange fekauʻaki mo e temipalé. ʻOku faʻa nofotaha ʻa e ngaahi fakakaukaú ʻi he ngaahi ongo mo e ngaahi aʻusia kuo tau maʻú, ka ʻoku fakatefito ʻa e fakamatala ʻo e ongoongoleleí ʻi hono fakaʻatā ʻa e taha ʻokú ke ʻofa aí ke ne maʻu haʻane aʻusia pē ʻaʻana ʻi he temipalé.
2. Fakakaukau ki he Ngaahi Lea ʻOkú Ke Fakaʻaongaʻí
Ko e hā ha ngaahi fakamatala ʻo e temipalé ʻokú ke manatuʻi lelei? Hangē ko ʻení, naʻe pehē ʻe Palesiteni Nalesoni, “ʻE tokoniʻi koe ʻe hoʻo ngāue tokoní mo e moihū ʻi he temipalé ke ke fakakaukau fakasilesitiale.” Pea naʻe pehē ʻe Palesiteni Tōmasi S. Monisoni (1927–2018), “ʻOku hoko ʻa e [temipalé] takitaha ko ha maama kamo ki māmani.”
Te tau lava ʻo fili ʻa e ngaahi lea te ne ʻomi ha ʻamanaki lelei mo ha fakamaama kiate kinautolu ʻoku tau ʻofa aí ʻa ia ʻoku nau teuteu atu ki heʻenau aʻusia ʻi he temipalé. Te tau lava ʻo fakaʻehiʻehi mei he ngaahi fakamatala tukuhifo ʻo e temipalé (hangē ko e “faikehe” pe “ngali kehe”), pea te tau lava ʻo fili ke fakaʻaongaʻi ‘a e ngaahi fakamatala lelei ‘oku fakatefito ʻia Kalaisí (hangē ko e “nongá” mo e “ʻamanaki leleí”).
ʻOku ou fakatokangaʻi ʻoku ʻaonga ke fakakaukau ki ha ngaahi fakatātā fakaʻofoʻofa lahi kuó u mamata ai ʻi he temipalé, pea ʻi he taimi lahi ʻoku ou faʻa vahevahe ʻa e ngaahi tā ko iá mo e ngaahi kaungāmeʻa pe kau mémipa ʻo e fāmilí ʻoku teuteu ke nau huú. Ko e hā ha ngaahi ongo mo ha ngaahi lea ʻokú ke fakakaukau ki ai ʻi hoʻo sio ki he ʻū tā ko iá? Feinga ke ke fakalotolahi ʻi he founga hoʻo lea fekauʻaki mo e temipalé.
3. Kumi ʻa e Ngaahi Talí mei he Ngaahi Maʻuʻanga Tokoni ʻo e Ongoongoleleí
Tuʻunga ʻi heʻetau ʻofa mo e fakaʻapaʻapa lahi ki he temipalé, ʻe faingofua pē haʻatau ongoʻi manavasiʻi ke talanoa fekauʻaki mo ia. Te tau lava ʻo hohaʻa mo fifili pe ko e hā ʻa e meʻa ʻoku sai ke lea ʻakí. ʻOku ou ʻilo naʻá ku fihia ʻi he taufatungamotuʻa ʻo hono talaange ki hoku ngaahi kaungāmeʻa mo e kau mēmipa ʻo e fāmilí naʻa nau fieʻiló ʻoku ʻikai ke tau lava ʻo talanoa ki he meʻa ʻoku hoko ʻi he temipalé.
Neongo ia, ko e taimi naʻá ku ngāue mo ako lahi ange ki he temipalé, naʻá ku fakatokangaʻi tā te tau lava ʻo vahevahe ha meʻa lahi ange ʻi he meʻa naʻá ku fakatokangaʻí!
Hangē ko ʻení, te tau lava ʻo fakamatala “ko e ʻenitaumení ko ha ʻmeʻaʻofa moʻoni.’” Ko e ʻenitaumeni fakatemipalé ko ha meʻaʻofa ia ʻo e ngaahi tāpuaki toputapu mei he ʻOtuá kiate kitautolu takitaha, pea ʻoku kau ʻi he niʻihi ʻo e ngaahi tāpuaki ko iá ʻa e:
-
“ʻIlo lahi ange ki he ngaahi taumuʻa mo e ngaahi akonaki ʻa e ʻEikí.
-
“Mālohi ke fai e meʻa kotoa ʻoku finangalo ʻa e ʻOtuá ke tau faí.
-
“Fakahinohino mo e maluʻi fakalangi ʻi heʻetau tauhi ki he ʻEikí, ki hotau ngaahi fāmilí, mo e niʻihi kehé.
-
“ʻAmanaki lelei, fiemālie, mo e nonga lahi ange.
-
“Ngaahi tāpuaki kuo talaʻofa mai ʻi he taimí ni mo e taʻengatá.”
Te tau lava foki ʻo talanoa fekauʻaki mo e ngaahi fuakava ʻoku tau fai ʻi he temipalé. Ko e meʻa fakaʻofoʻofa fekauʻaki mo e temipalé ko ʻene fakaʻatā ke tau ofi ange ki he ʻOtuá mo fakamālohia hotau vā fetuʻutaki mo Iá ʻaki hono fai ha ngaahi palōmesi lahi ange mo Ia. Ko e ngaahi fuakavá ʻeni:
-
“Fono ʻo e Talangofuá, ʻa ia ʻoku kau ai ʻa e faifeinga ke tauhi ʻa e ngaahi fekau ʻa e ʻOtuá.
-
“Fono ʻo e Feilaulaú, ʻa ia ko hono ʻuhingá ke fai ʻa e meʻa kotoa te tau lavá ke tokoni ki he ngāue ʻa e ‘Eikí pea fakatomala ʻi he loto-mafesifesi mo e laumālie fakatomala.
-
“Fono ‘o e Ongoongoleleí, ʻa ia ko e fono māʻolunga ange ia naʻá Ne akoʻi ʻi Heʻene kei ʻi māmaní.
-
“Fono ʻo e Angama‘á, ʻa ia ko e ʻuhingá ke tau toki fetuʻutaki fakasekisuale pē mo e tokotaha ʻoku tau mali mo ia ʻi he founga totonu mo fakalaó ʻo fakatatau mo e fono ʻa e ʻOtuá.
-
“Fono ʻo e Fakatapuí, ‘a ia ko e ‘uhingá ke fakatapui hotau taimí, ngaahi talēnití mo e meʻa kotoa pē kuo tāpuekina ʻaki kitautolu ʻe he ‘Eikí ki hono langa hake ʻo e Siasi ‘o Sīsū Kalaisí ʻi he māmaní.”
Tā ʻo e Temipale Rome Italy (Loma ʻĪtalí) naʻe faitaaʻi ʻe Cody Bell
ʻI heʻetau vahevahe ha ngaahi pōpoaki lelei fekauʻaki mo e temipalé, ʻoku tau tokoni ai ki he niʻihi ʻoku tau ʻofa aí ke nau ongoʻi ʻoku talitali lelei ange kinautolu pea nau mateuteu ange ki heʻenau fuofua hū ʻi he temipalé. Te tau lava ʻo tokoni ke nau hanganaki atu ke fakaloloto honau vā fetuʻutaki mo Sīsū Kalaisí ʻo fakafou ʻi he ngaahi fuakava ʻo e temipalé.
4. Vahevahe ʻa e Ngaahi Aʻusia Leleí
Ko e meʻa naʻá ku ako lahi taha fekauʻaki mo e temipalé ko e ʻikai ko ha meʻa foʻou ʻa e fakamatala totonú ia. Ko hono moʻoní, ko e lahi taha ʻo e fakamatala mo e ngaahi tāpuaki ʻoku tau maʻu ʻi he temipalé, ʻoku meimei tatau ia mo e meʻa ʻoku akoʻi kiate kitautolu ʻi he ongoongoleleí ʻi he ʻaho kotoa pē.
Kuó u ako mei he ngaahi meʻa kuó u aʻusiá, ko e manavasiʻí ʻoku ʻikai mei he ʻEikí ia. ʻI he taimi ʻoku tau fakaʻehiʻehi ai mei he talanoa fekauʻaki mo e temipalé pe feinga ke talanoa kau ki ai ʻaki ha ngaahi fakatokanga fakatupu veiveiua pe loto-hohaʻá, ʻoku maʻu leva ʻe he filí ha mālohi lahi ange ke ne fakahalaki ʻa e fakaʻofoʻofa ʻo e temipalé. Te tau lava ʻo vahevahe ʻa e ngaahi aʻusia lelei ʻoku tau maʻu ʻi heʻetau ʻalu ki he temipalé kae ʻoua ʻe fakavave ke fakangata ʻa e talanoá ʻaki haʻatau pehē, “Toutou foki pē ki ai pea ʻe fakaʻau pē ke lelei ange.”
ʻI he taimi ʻoku tau manavasiʻi ai ke tali ha ngaahi fehuʻi fekauʻaki mo e temipalé, ʻe lava ke hoko ia ko ha fakaafe mei he ʻEikí ke tau ako lahi ange fekauʻaki mo e temipalé. ʻE ʻikai ngata pē ʻi he tāpuakiʻi kitautolu ʻe he meʻa ko ʻení ka mo kinautolu foki ʻoku tau feohí. Naʻe fakataumuʻa ʻa e ʻEikí ke hoko ʻa e temipalé ko ha tāpuaki kiate kitautolu, kae ʻikai ko ha meʻa ke tau ilifia ai.
Manatuʻi ʻa e ngaahi lea ʻa Palesiteni Nalesoní: “ʻI hono fakahoko ʻo e ngaahi fuakavá mo maʻu ʻa e ngaahi ouau mahuʻinga ʻi he temipalé, pea pehē ki he feinga ke ofi ange kiate Ia ʻi aí, ʻe tāpuekina ai hoʻomou moʻuí ʻi ha ngaahi founga he ʻikai lava ʻi ha toe sīpinga moihū kehe.” Pea ko e lahi ange ʻetau lea lelei fekauʻaki mo e fale ʻo e ʻEikí, ko e lahi ange ia ʻetau fetokoniʻaki mo e niʻihi kehé ke toe foki [ki he temipalé] pea fakaafeʻi ʻa e ngaahi tāpuaki ko iá ki heʻetau moʻuí.