“Sīsū Kalaisi: Ko e Uho ʻo ʻEtau Tuí,” Liahona, ʻAokosi 2024.
Haʻu, ʻo Muimui ʻIate Au
Sīsū Kalaisi: Ko e Uho ʻo ʻEtau Tuí
Koeʻuhí ke Mou ʻIlo, tā fakatātaaʻi ʻe Gary L. Kapp, ʻoua naʻa hiki hano tatau
ʻI he lea faka-Hepeluú, ko e kaiasimasí ko ha fokotuʻutuʻu fakapunake ʻoku fakahoko ai ʻa e ngaahi foʻi leá pe ngaahi fakakaukaú pea fulihi ʻo tohi fakafoki, pea hoko ʻa loto ko e tefitoʻi meʻa mahuʻinga tahá ia. Ko hono liunga uá, ʻoku toe lahi ange ʻi he konga hono uá, ʻo fakamamafaʻi ai ʻa e tefitoʻi pōpoakí. ʻOku maʻu ha sīpinga ʻi he ʻAlamā 36, ʻokú ne fakatātaaʻi ai ʻa e fakaʻofoʻofa ʻo e sīpinga ko ʻení.
-
Tauhi ʻa e ngaahi fekaú (veesi 1)
-
-
Ko e moʻoni naʻá ne fakahaofi ʻa kinautolu (veesi 2)
-
-
Tokoniʻi ʻa kinautolu ʻi honau ngaahi ʻahiʻahiʻí, ngaahi tuʻutāmakí, mo e ngaahi mamahí (veesi 3)
-
Tokoniʻi ʻi he ngaahi ʻahiʻahí, mo e ngaahi tuʻutāmakí, mo e mamahí (veesi 27)
-
-
Te Ne fakahaofi au (veesi 27)
-
-
Tauhi ʻa e ngaahi fekaú (veesi 30)
Fakatokangaʻi ko e Fakamoʻuí ʻa e uho ʻo e sīpinga ko ʻeni ʻo e kaiasimasí. Naʻe akoʻi ʻe ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e ngaahi tāpuaki ʻo hono fakatefito ʻetau moʻuí ʻia Sīsū Kalaisí: “ʻE hoko mai ʻa e fiefia tuʻuloá, fakataha mo e mālohi, loto-toʻa, mo e malava ke ikunaʻi ʻa e faingataʻa lahi tahá, ʻi hoʻo fakatefito hoʻo moʻuí ʻia Sīsū Kalaisí.”
ʻOku tau ʻilo ʻe tāpuekina kitautolu ʻo taʻengata ʻi heʻetau tui ki he Fakamoʻuí. Ka ʻi he taimi ʻe niʻihi ʻoku ngalo ʻiate kitautolu ʻa e founga ʻe lava ke tāpuekina ai kitautolu ʻe he tuí he taimi ní. ʻOku fakahaaʻi mai ʻe he ʻAlamā 36 ʻi he kaiasimasí ʻa e mālohi ʻo e tuí pea mo ʻenau tuhu kotoa kia Sīsū Kalaisí.
ʻOku fakahaaʻi ʻe he ngaahi potufolofola ko ʻení—mei ha ngaahi lēsoni kehekehe ʻi he Haʻu, ʻo Muimui ʻIate Auʻo ʻAokosí—ʻa e founga ʻoku ʻomai ai ʻe he tui kia Kalaisí ʻa e mālohí:
Te Ne Fakahaofi Kitautolu
Kapau ʻoku tau ʻefihia ʻi ha ngaahi fakakaukau, loto, pe ngaahi tūkunga fakatuʻutāmaki ko ʻení, ʻe lava ʻa e tui kia Kalaisí ʻo fakatauʻatāinaʻi kitautolu.
“Ko ʻeni ko e tui ʻeni ʻa e faʻahingá ni ʻa ia kuó u lau ki aí; ʻoku nau kei talavou, pea ʻoku ʻikai ke feliliuaki ʻenau fakakaukaú, pea ʻoku tuku ʻenau falalá ki he ʻOtuá maʻu ai pē. …
“Pea vakai, naʻe toe fakahaofi ʻa kimautolu mei he nima ʻo homau ngaahi filí. Pea ʻoku monūʻia ʻa e huafa ʻo hotau ʻOtuá; he vakai, ko ia ia kuó ne fakahaofi ʻa kimautolú.”
Te Tau Lava ʻo Fekumi mo Maʻu ʻa e Ngaahi Talí
ʻE lava ke tataki kitautolu ʻe he tui kia Kalaisí ke tau maʻu ha ngaahi tali kapau ʻoku ʻi ai ha meʻa ʻoku ʻikai mahino kiate kitautolu pe ʻikai ke tau ʻilo.
“ʻOku ʻi ai ha ngaahi meʻa-lilo lahi kuo taʻofi, ke ʻoua naʻa ʻilo ki ai ha taha ka ko e ʻOtuá pē. Ka ʻoku ou fakahā kiate koe ha meʻa ʻe taha ʻa ia kuó u ʻeke faivelenga ki he ʻOtuá koeʻuhí ke u ʻiloʻi—ʻa ia ko e meʻa ʻoku kau ki he toetuʻú.”
ʻE Fakafonu ʻEtau Moʻuí ʻaki ʻa e Fiefiá
ʻE lava ʻe he tui kia Sīsū Kalaisí ʻo toʻo ʻa e ngaahi fakakaukau fakapoʻulí mei hotau ʻatamaí pea mo fakamaama hotau ngaahi lotó ʻaki ʻa e fiefiá.
“Naʻa nau faʻa ʻaukai mo lotu, pea nau fakaʻau ʻo mālohi ange ai pē ʻi [heʻenau] loto-fakatōkilaló, mo tuʻu mālohi ai pē ʻi he tui kia Kalaisí, ʻo aʻu ki hono fakafonu honau laumālié ʻaki ʻa e fiefia mo e fiemālie”
Te Tau Lava ʻo Ikunaʻi ʻa e Ilifiá mo e Ngaahi Mamahí
Kapau te tau tui ki he ʻEikí, te Ne tokoniʻi kitautolu ʻi he lolotonga ʻo e ngaahi taimi faingataʻa ʻo ʻetau moʻuí.
“Naʻa mau loto mamahi ai pea fonu foki ʻi he ilifia. …
“Naʻa mau fakahā hake homau laumālié ʻi he lotu ki he ʻOtuá, ke ne fakamālohiʻi ʻa kimautolu mo fakahaofi ʻa kimautolu. …
“. … Naʻe ʻaʻahi mai ʻa e ʻEiki ko homau ʻOtuá kiate kimautolu ʻaki ʻa e ongoʻi fakapapau te ne fakahaofi ʻa kimautolu; ʻio, ʻo ne folofola ai ʻaki ʻa e fakafiemāmlie ki homau laumālié, ʻo ne foaki mai kiate kimautolu ʻa e tui lahi, ʻo ne fakatupu ʻemau ʻamanaki lelei ki homau fakahaofi ʻiate iá.”