Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní

Ko ha Fakatātā, Tohi, mo ha Papitaiso

Fai ʻe Brenda Hosaflook Wells, Vesinia Hihifo, USA

ʻOku ou houngaʻia ʻi he fakahoko ʻe ha kiʻi ngāue siʻisiʻi ha tokoni lahí.

Tā fakatātaaʻi ʻe Katy Dockrill

Meimei tuʻo taha ʻi he taʻu, ʻoku ʻaʻahi mai ha taha faisivi ʻo e ʻātakaí ki homau vāhenga fakaakó. Ko e angamahení, ko e taha faisiví ʻoku anga fiefia pea ʻoku angamaheni pē mo hono fai ʻo ha fanga kiʻi talanoá. Naʻe pehē ʻa Laieni Pētelí. Naʻe fakatokangaʻi ʻe Laieni ʻa e ngaahi tā hoku fāmilí ʻi hoku ʻōfisí, pea ʻi he ʻaʻahi kotoa pē ʻokú ma talanoa ai ki homa ongo fāmilí.

ʻI ha ʻaʻahi ʻe taha, naʻe fakatokangaʻi ai ʻe Laieni ha laʻi tā mali hoku fohá mo hono uaifí ʻi he Temipale Washington D.C. Naʻe iku ʻema talanoá ki he temipalé, ongoongolelei ʻo Sīsū Kalaisí, mo e Tohi ʻa Molomoná.

Naʻá ne pehē, “Kuó u fekumi mo hoku uaifí ki ha siasi.” “ʻOku ou fakaʻamu ke ʻoange ki heʻeku fānaú ʻa e meʻa kuó ke foaki ki haʻaú.”

Naʻá ku hiki ʻeku fakamoʻoní ʻi loto ʻi ha Tohi ʻa Molomona ʻo ʻave ki hoku ʻōfisí, ko e teuteu ki he ʻaʻahi hono hoko ʻa Laiení. Ka ʻi he taʻu hono hokó, naʻe haʻu ai ha taha faisivi ʻātakai kehe ia. Naʻe ʻikai toe ngāue ʻa Laieni ki he potungāué. Naʻe tō hifo hoku lotó, ka naʻá ku tauhi pē ʻa e tohí ʻi hoku ʻōfisí naʻa faifai peá u ongoʻi ke foaki ki ha taha kehe.

Neongo ia, ʻi he ʻosi ha taʻu ʻe taha mei ai, naʻá ku maʻu ha ʻīmeieli meia Laieni ke u fokotuʻutuʻu ha ʻaʻahi mai. Kuo toe foki ki heʻene ngāue motuʻá. Ko e taimi naʻe aʻu mai aí, naʻe fakaiku pē ʻo hiki ʻema pōtalanoá ki he Siasí. Ko e taimi naʻá ku foaki ange ai ʻa e Tohi ʻa Molomoná kia Laiení, naʻá ne huke fiefia ia.

ʻOsi ha ngaahi māhina siʻi mei ai, naʻá ku kau fakataha mo hoku husepāniti ko Pilá ʻi ha malanga alēleaʻanga māʻolunga ʻi Meningitoni, Vesinia Hihifo—ko e kolo tupuʻanga ʻo Laiení. ʻI heʻene ʻosí, naʻe ʻeke mai ʻe ha fefine ʻi he falelotú pe ʻoku ou ʻilo ʻa Laieni pea naʻá ku foaki ki ai ha Tohi ʻa Molomona. Ko Sitefanī ia, ko e uaifi ʻo Laiení.

Naʻe pehē ʻe Sitefanī naʻe palani ʻa Laieni ke papitaiso he pō kimuʻá, ka naʻe puke ʻa Laieni. Ko ha tāpuaki pulipulia! Naʻá ku lava mo Pila ke kau atu ki hona papitaiso naʻe toe fakataimi-tēpileʻi foʻoú, ʻi ha uike ʻe tolu mei ai. Naʻe pehé ʻe Laieni ʻi hona papitaisó, ko e Tohi ʻa Molomona naʻá ku ʻoange ki aí, naʻe ʻikai fakaʻaongaʻi kae tālunga e feutuʻutaki hono uaifí ki he kau faifekaú.

Ko ʻeku konga ʻi heʻena uluí naʻe kamata ia ʻi hono fokotuʻu ʻo ha fakatātā ʻo e temipalé ʻi hoku ʻōfisí. Naʻe fakaiku ʻa e fakatātaá ki ha pōtalanoa. Naʻe fakaiku ʻa e pōtalanoá ki he Tohi ʻa Molomoná.

Ko e ngāue kotoa pē naʻe siʻisiʻi, ka ko hono olá naʻe maʻongoʻonga (vakai, Tokāteline mo e Ngaahi Fuakava 64:33). ʻOku fonu hoku lotó ʻi he fakafetaʻi ʻi he tokoni lahi ʻa ʻeku fanga kiʻi ngāué ʻo taki mai ai ha taha ki he Fakamoʻuí.