“Monūʻia ʻi Heʻeku Faitotonú,” Liahona, ʻAokosi 2024.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Monūʻia ʻi Heʻeku Faitotonú
Naʻe ʻahiʻahiʻi au ke u tauhi ʻa e paʻanga makehé, ka naʻá ku manatuʻi ʻa e faleʻi mei heʻeku pīsopé.
Tā fakatātā ʻa Allen Garns
ʻI he 2012, naʻe ʻikai ke ʻi ai haʻaku ngāue. Naʻe taʻeʻaonga ʻeku feinga ke kumi ha ngāué. Naʻe fakaiku, ʻou fiemau ha nō naʻe fakafuofua ki ha $28 ʻi he paʻanga Naisīliá ke feau ʻeku ngaahi fiemaʻu fakatuʻasinó.
Naʻe ʻave ʻa e paʻangá ki heʻeku ʻakauní ʻi ha pangikē fakalotofonua. ʻI heʻeku maʻu pē ʻa e tohi ki he feʻāveaki ʻo e paʻangá, naʻá ku ʻalu leva ki he pangikeé. Naʻá ku fakafonu ha laʻi pepa fakapangikē ʻo ʻoange ia ki he taha ʻoku ngāue he paʻangá. Naʻá ne vakaiʻi ʻa e fakaikiiki ʻo e feʻaveaki paʻangá ʻi heʻene komipiutá peá ne talamai fakalelei kiate au ke u tangutu.
ʻOsi nai ha miniti ʻe nima mei ai kuó ne ui au ʻo fakaʻaongaʻi ha mīsini lau paʻanga ke lau eku paʻangá. Peá ne mono mai leva kiate au ʻa e $280—kae ʻikai ko e $28! ʻI heʻeku puputuʻú, naʻá ku kiʻi tuʻu taimi nounou kae fasitanunu ha ngaahi fakakaukau lahi ʻi hoku ʻatamaí.
Naʻe pehē mai ʻa e taha ngāue ʻi he paʻangá, ʻi heʻene fakatokangaʻi ʻeku momoú, “ʻE fiemaʻu ke u tokoni ki ha tokotaha kehe he taimí ni.” Naʻá ku malimali peá u pehē ange, “Kuó ke ʻomai ha paʻanga ʻo ʻova ʻaki ʻa e $252.” Peá u ʻoange leva ʻa e paʻanga naʻe ʻova ʻakí.
Naʻá ne mātuʻaki houngaʻia lahi fau. Naʻá ne talamai kapau naʻá ku ʻosi mavahe, ko e paʻanga naʻe huluʻakí naʻá ne ʻomaí, ʻe toʻo ia mei heʻene vahé.
Naʻá ku lea māvae ange, ka ʻi heʻeku mavahe mei he pangikeé, naʻe haʻu ha fakakaukau ki hoku ʻatamaí: “Ko ha taha vale lahi koe. Naʻe mei tokoni atu ʻa e paʻanga naʻá ke fakafokí ke totongiʻaki ha niʻihi ʻo ho ngaahi moʻua ʻuhilá”
Ka naʻá ku manatuʻi ʻa e faleʻi mei heʻeku pīsopé. Naʻá ne pehē, “Ko ha taimi pē ʻe ʻahiʻahiʻi pe fakataueleʻi ai koe, hivaʻi hoʻo ngaahi himi manakó.” Ko ia naʻá ku kamata ke hivaʻi ʻa e “Huhuʻi ʻo ʻIsilelí,” “ʻOku Mau Fakamāloó,” mo e “Fānau Au ʻa e ʻOtuá.”
Hili ha ngaahi uike mei ai, naʻá ku maʻu ha tohi mei ha kautaha naʻá ku ʻinitaviu mo kinautolu ʻi he māhina ʻe tolu kimuʻá ki he ngāue ko e ʻōfisa he fale tukuʻanga koloa. Kuo nau fakakaukau ke fakangāueʻi au. Naʻá ku lava ʻi he ngāue foʻoú ke totongi hoku ngaahi moʻua naʻe kei toé mo fakalato ʻeku ngaahi fiemaʻu fakatuʻasinó.
Naʻe folofola ʻa Sīsū, “Ko ia ʻoku angatonu ʻi he meʻa siʻí, ʻoku angatonu foki ia ʻi he meʻa lahi: pea ko ia ʻoku taʻeangatonu ʻi he meʻa siʻí, ʻoku taʻeangatonu ia ʻi he meʻa lahi” (Luke 16:10). ʻOku ou fakamoʻoni ʻoku hanga ʻe he vilitakí, tui ki he ʻEiki ko Sīsū Kalaisí, mo e angatonú ʻo fakafeʻungaʻi kitautolu ke tau maʻu ha ngaahi tāpuaki lahi fau.