Te ’itera’a i te tāmarūra’a i roto ia Iesu Mesia

I teie ’āva’e i roto i tā tātou ’imira’a maita’i o te Mai, pe’e mai, tē tai’o nei tātou nō ni’a i te hō’ē ’ohipa ta’a ’ē ’e te hō’ē roa tei tupu : te Mesia tei ti’afa’ahou e haere ra i te fenua Amerika ’e te ani-manihini-ra’a i te mau ’āti Nephi ’ia « haere mai iā’u nei, ’ia tu’u mai i tō ’outou rima i tō’u nei ’ao’ao, ’e ’ia fāfā ato’a mai ’outou i te mau puta naero i tō’u nei nā rima ’e i tō’u nei nā ’āvae, ’ia ’ite ’outou ē, ’o vau nei te Atua nō ’Īserā’ela, ’e te Atua nō tō te ao ato’a nei, ’e i taparahihia na vau nō te mau hara a tō te ao nei » (3 Nephi 11:14).

Mai tāna i rave ’e te mau ’āti Nephi, tē ani manihini nei Iesu Mesia ia tātou tāta’itahi ’ia haere mai e ora i te hō’ē ’ohipa e tupu nō te ta’ata iho ’e ’ōna ’e ’ia fa’ananea i te hō’ē tā’amura’a o te fafaura’a ’e ’ōna. ’Auē ïa tō’u māuruuru ē, ’ua here ’oia ia tātou mai te reira te huru ’e tē hina’aro nei ’ia pārahi mai ’e ’o tātou. Maoti ’oia, ’aita tātou e vai ’ōtahi noa. I roto i tā’u parau pāpa’i, tē fa’a’ite nei au ē, « ’ua fa’ata’ahia tātou nō te ’āpiti atu ma te pūai hope i te Fatu nā roto i tā tātou mau fafaura’a » (’api 44). ’A haere ai tātou iāna ra nā roto i tā tātou mau mā’itira’a i te mau mahana ’atoa ’ia ha’apa’o i te mau fafaura’a mo’a, e patu tātou i te hō’ē tā’amura’a ’e o Iesu Mesia ’o tē hōpoi mai i tōna here ’e tāna tāmarūra’a i tō tātou orara’a ’e te orara’a o tō tātou ’utuāfare.

I roto i tāna parau pāpa’i, tē fa’ata’a nei Elder Dieter F. Uchtdorf nō te pupu o te Tino ’Ahuru Ma Piti ’āpōsetolo i te Fa’aora ’ei Fatu o te Ora ’e tē fa’a’ite pāpū nei ē, « te mana ora o te tara’ehara a te Fa’aora e nehenehe e fa’atupu mai i te hō’ē hope’ara’a hau a’e i te rahi i ni’a i tō tātou ea i te pae manava, i te pae vārua ’e ’oia ato’a i te pae tino i te tahi atu rapa’aura’a o te fenua nei ’o tā tātou e nehenehe e fāri’i » (’api 4).

Tē fa’a’ite pāpū nei au ē ’ua here tō tātou Metua i te ao ra ’e te Fa’aora ia ’outou ’e ’ua haere mai Iesu Mesia nō teie ’ōpuara’a mau : e hōpoi mai i te tāmarūra’a ’o tā tātou e ’imi nei. ’O Iesu Mesia te tāmarūra’a.

Ma te here mau,

Kristin M. Yee

Tauturu piti i roto i te Peresidenira’a rahi o te Sōtaiete Tauturu

Iesu e fa’aora ra i te hō’ē ta’ata matapō — « Tē pārahi nei au i te ao nei, ’o vau te māramarama o teie nei ao.

« I nā reira atu ra [Iesu] i te paraura’a atu, ’e ’ua tufa ihora i te huare i raro i te repo, ’ua o’i ihora i taua huare i te repo, ’ua parai atu ra i te repo i te mata o taua ta’ata matapō ra,

« ’Ua parau atu ra iāna, ’a haere, ’a horoi i tō mata i te pape ra i Siloama […] Haere atu ra ’oia, horoi ihora, e haere mai ra ho i ma te ’ite. »