Tē fa’a’ite pāpū nei mātou nō tō tātou peropheta ora

Māuruuru mātou, e te Atua.

’Ua ’ite au ē e peropheta te peresideni Russell M. Nelson nā te Atua, ’e tē māuruuru nei au ē tē paraparau nei te Atua iāna. Te here o te peresideni Nelson nō tātou ’o te hō’ē ïa fa’a’itera’a nō te here o te Atua. ’Ua here au ia Peresideni Nelson. Te mau fafaura’a tāna i fa’ahiti nō ’ō mai ïa i te Atua ra.

Justine Hinautan, Firipino

Tē ha’api’i nei te peresideni Nelson iā’u ē te ’ohipa faufa’a roa a’e i teie mahana ’o te mā’itira’a ïa i te Mesia nā roto i te poiherera’a ’e te fa’aturara’a i te mau fafaura’a.

Ryan Hulme, Niu Terani

’Ua māuruuru roa vau nō te peropheta, Russell M. Nelson. Tē fa’a’ite nei au i tō’u ’itera’a pāpū ē, ’o ’oia te ta’ata tei pi’ihia e te Atua nō te arata’i ’e nō te ha’apūai ia tātou i te mau mahana hope’a nei. Mai te mea e pe’e tātou i tāna parau a’o, e maita’i ïa te mau mea ato’a.

Nelson Almeida, Cabo Verde

Māuruuru e te peresideni Nelson, mai te hōhonu o tō mātou ’ā’au, nō te hōro’ara’a mai i roto ia mātou i te mau parau pa’ari nō ’ō mai i tō tātou Metua i te ao ra. ’Ia ha’amaita’i mai te Atua ia ’oe, e tō mātou peropheta here !

Brenda Boyle, ’Etotia

Māuruuru e te peresideni Nelson nō tā ’oe mau ha’api’ira’a fa’auru ’e te fa’aitoito. ’Ua here mātou ia ’oe.

Thuong Putheary, Taputiha

Tē māuruuru roa nei au nō te here ’e te hi’ora’a tā te peresideni Nelson e hōro’a nei ’ei peropheta. Nā tāna a’ora’a i ni’a i te hiero i tauturu iā’u ’ia fa’ari’i i tō’u ’ōro’a hiero, ’ua fa’aha’amana’o mai tōna turu rahi i te feiā ’āpī pa’ari iā’u ’ia ’ite i tō’u ti’ara’a tumu ’ei tamari’i nā te Atua, ’e ’ua riro tāna mau tauto’ora’a nō te ha’aputuputu ia ’Īserā’ela i ha’apurarāhia ’ei tumu parau tāmau i roto i tō’u ’utuāfare ’e i te orara’a huira’atira ’o tā’u pāroisa. Te mea faufa’a roa atu, ’ua tauturu ’oia iā’u ’ia ha’afātata atu ā i tō’u Fa’aora.

Grace Burt, Marite

’Ua feruri hōhonu vau i te mau ha’api’ira’a a tō tātou peropheta here, ’o Russell M. Nelson. ’Ua fa’auru tāna mau ha’api’ira’a i tō’u orara’a. ’Ua fa’aitoito tāna mau parau tohu iā’u ’ia tāmau noa i te haere i mua ’e ’ia ora māite atu ā i te ’evanelia i roto i teie ao ’ārepurepu ’e te fifi. ’Ua rahi roa atu ā tō’u hau i te ’itera’a e peropheta tō tātou i tō tātou ’anotau ’o tē a’o mai nei ia tātou ’ia mau i te hō’ē vārua hau, ’ia fa’a’ore i te mārōra’a i rotopu ia tātou ’e tō tātou mau hoa. Tē ha’afaufa’a nei au i tāna mau ha’api’ira’a fa’ahiahia.

Ana Montoya, Honetura

E ’itera’a pāpū pūai tō’u ē, e peropheta te peresideni Russell M. Nelson nā te Atua i te mau mahana hope’a nei. ’Ua fāna’o vau i te rirora’a ’ei ’ite piri nō tōna ha’eha’a, tōna huru peu ’ore ’e tōna here i te ta’ata. ’Oia mau, ’o ’oia te ta’ata i mā’itihia nō te arata’i i te bāsileia o te Atua i ni’a i te fenua nei i teie tau ta’a ’ē roa. ’Ua fa’aro’o ’e ’ua pe’e au i tāna a’o, tei arata’i iā’u ’ia ora i te hō’ē orara’a parau ti’a ’e ’ia fa’aruru i te mau tāmatara’a o te tāhuti nei. E here rahi tō’u ia Peresideni Nelson, ’e ’ua ’ite au i tāna tauturu fa’ahiahia nō te terera’a o te bāsileia o te Atua ’e te ha’aputuputura’a ia ’Īserā’ela nā roto i tāna mau fa’aurura’a ’e te mau fa’aarara’a nō te patura’a i te hiero nā te ao ato’a nei.

David G. Fernandes, Peretīria

I te 24 nō ’Ātete 2019, ’ua paraparau te peropheta nā roto i te reo pāniora ’e ’ua ha’api’i mai ia mātou ’ia ha’apa’o i te mau fa’auera’a a te Fatu. ’Ua ’ite pūai au i te here o Iesu Mesia nō te tauto’ora’a a te peropheta i te ha’api’ira’a mai i tō mātou reo. ’Ua ’ite au ē nā roto i te peropheta ora, tē fa’aitoito nei te Atua, tē ha’api’i nei, tē pāruru nei, tē arata’i nei, ’e tē ha’amaita’i nei ’oia ia tātou.

Saúl Alfredo Rojas de León, Guatemala