Tau ’ahurura’a matahiti tāvinira’a itoito : Te mau ha’api’ira’a mā’itihia a te peresideni Russell M. Nelson

I teienei ’ua 100 matahiti te pa’ari, ’ua tāvini te peresideni Nelson e 40 matahiti ’ei ’āpōsetolo. Teie i muri nei te tahi o tāna mau ha’api’ira’a mai tōna rirora’a mai ’ei Peresideni nō te ’Ēkālesia.

Ha’amata ma te hope’a i te ferurira’a

« Te hope’a tā tātou tāta’itahi e tūtava nei, ’o te fāri’ira’a ïa i te mana i roto i te hō’ē fare o te Fatu, ma te tā’atihia ’ei ’utuāfare, ma te ha’apa’o maita’i i te mau fafaura’a i ravehia i roto i te hiero ’o te fa’aineine ia tātou nō te hōro’a rahi roa a’e a te Atua—’o te ora mure ’ore. E mea faufa’a roa ’ino te mau ’ōro’a o te hiero ’e te mau fafaura’a tā ’outou i rave i reira nō te ha’apūai i tō ’outou orara’a, tō ’outou fa’aipoipora’a ’e te ’utuāfare ’e te ’aravihi ’ia pāto’i i te ’arora’a a te ’enemi. E riro tā ’outou ha’amorira’a i roto i te hiero ’e tā ’outou tāvinira’a i reira nō tō ’outou hui tupuna i te ha’amaita’i ia ’outou ma te heheura’a rahi a’e nō ’outou iho ’e ma te hau ’e e ha’apūai te reira i tā ’outou pūpūra’a ia ’outou nō te fa’aea i ni’a i te ’ē’a nō te fafaura’a. »

« ’A haere ’āmui ai tātou i mua », Liahona, ’Ēperēra 2018, 7.

’A tātarahapa i te mau mahana ato’a

« ’Aita e ’ohipa fa’ati’amā a’e ’e te fa’ahanahana a’e ’e te faufa’a a’e nō tō tātou tāta’itahi haerera’a i mua maori rā te fa’atumura’a tāmau ’e te fa’atumura’a tāmahana i ni’a i te tātarahapa. E ’ere te tātarahapa i te ’ohipa nō te hō’ē noa taime ; e ’ohipa tau maoro rā. E tāviri te reira nō te ’oa’oa ’e te mana’o hau. ’Ia ’āmuihia te reira i te fa’aro’o, e ha’amatara te tātarahapa i te ’ūputa nō te mana o te tāra’ehara a Iesu Mesia. »

« E nehenehe tātou e rave maita’i a’e ’e e ha’amaita’i ia tātou », Liahona, Mē 2019, 67.

Te ravera’a ’e te ha’apa’ora’a i te mau fafaura’a

« E matara hua te mana Atua i te mau vahine ato’a ’e te mau tāne ato’a e rave i te mau fafaura’a ’e te Atua ma te ha’apa’o i te reira ’e ma te ’āmui ti’amā i te mau ’ōro’a o te autahu’ara’a. Te feiā e fāri’i i te ’ōro’a hiero i roto i te fare o te Fatu, e fāri’i rātou i te hōro’a nō te mana autahu’ara’a a te Atua maoti tā rātou mau fafauraa, nā reira ato’a te hōro’a nō te ’ite, ’ia ’ite rātou nāhea i te fa’a’ohipa i terā mana. »

« Te mau tao’a pae vārua », Liahona, Novema 2019, 77.

’A fa’aro’o i te Fatu

« ’Ua ’ite te Metua ē, ’ia hā’atihia tātou i te mana’o tapitapi ’e te mata’u, te mea ’o tē tauturu rahi a’e ia tātou ’o te fa’aro’ora’a ïa i tāna Tamaiti.

« Nō te mea ’ia ’imi tātou ’ia fa’aro’o—’ia fa’aro’o mau—i tāna Tamaiti, e arata’ihia tātou ’ia ’ite e aha tē rave i roto i te mau huru tupura’a ato’a. »

« Fa’aro’o iāna », Liahona, Mē 2020, 89.

’A mā’iti ’ia vaiiho i te Atua ’ia upo’oti’a

« Ma te tātarara’a hebera ’o ’Īserā’ela i roto i te ferurira’a, e aura’a hau atu tō te ha’aputuputura’a ’o ’Īserā’ela. Tē ha’aputuputu nei te Fatu i te feiā e hina’aro e vaiiho i te Atua ’ia upo’oti’a i roto i tō rātou orara’a. Tē ha’aputuputu nei te Fatu i te feiā ’o tē mā’iti ’ia vaiiho i te Atua ’ia riro ’ei fa’aurura’a faufa’a rahi a’e i roto i tō rātou orara’a. »

« ’A vaiiho i te Atua ’ia upo’oti’a », Liahona, Novema 2020, 92.

’Ia upo’oti’a i ni’a i te ao nei

« E ’ere te upo’oti’ara’a i ni’a i te ao nei i te hō’ē ’ohipa ’o tē tupu i roto i te hō’ē mahana ’aore rā e piti. E tupu te reira i te roara’a o te hō’ē orara’a ’a ha’apa’o tāmau ai tātou i te ha’api’ira’a tumu a te Mesia. E fa’atupu tātou i te fa’aro’o ia Iesu Mesia nā roto i te tātarahapara’a i te mau mahana ato’a ’e nā roto i te ha’apa’ora’a i te mau fafaura’a ’o tē hōro’a mai ia tātou i te mana. E fa’aea noa tātou i ni’a i te ’ē’a o te fafaura’a, ’e e ha’amaita’ihia tātou i te maita’i o te pūai i te pae vārua, te heheura’a nā te ta’ata iho, te hō’ē fa’aro’o tupu tāmau noa i te rahi ’e i te aupurura’a a te mau melahi. E nehenehe te orara’a i te ha’api’ira’a tumu a te Mesia e fa’atupu mai i te ’ohura’a maita’i pūai roa a’e, ma te fa’atupu i te hō’ē itoito pae vārua i roto i tō tātou orara’a. »

« Upo’oti’a i ni’a i te ao nei ’e ’ia noa’a te ora », Liahona, Novema 2022, 97.

Mā’iti ’ia riro ’ei ta’ata fa’atupu i te hau

« E fa’aātea te mārōra’a i te Vārua—i te mau taime ato’a. E ha’apūai te mārōra’a i te ’itera’a hape ē e rāve’a te ’arora’a nō te fa’a’āfaro i te mau ta’a-’ē-ra’a ; e ’ere roa atu rā i te reira. E ma’itira’a te mārōra’a. E ma’itira’a te fa’atupura’a i te hau. E ti’amāra’a tō ’outou ’ia mā’iti i te māro ’aore rā te fa’afaite. Tē fa’aitoito atu nei au ia ’outou ’ia mā’iti ’ia riro ’ei feiā fa’atupu i te hau, i teienei ’e i te mau taime ato’a. »

« Hina’arohia te feiā fa’atupu i te hau », Liahona, Mē 2023, 100.

’A feruri tiretiera

« ’Ia rave ana’e ’outou i te mau mā’itira’a, tē ani atu nei au ia ’outou ’ia rave i te hō’ē hi’ora’a ātea—hō’ē hi’ora’a mure ’ore. ’A tu’u ia Iesu Mesia i mua nō te mea, tō ’outou ora mure ’ore, tei te huru ïa o tō ’outou fa’aro’o iāna ’e i tōna tāra’ehara. Tei te huru ato’a o tō ’outou ha’apa’o i tāna mau ture. E ’īriti tō ’outou ha’apa’o i te ’ē’a nō te hō’ē orara’a ’oa’oa i teie mahana ’e i te hō’ē utu’a rahi mure ’ore ananahi. »

« ’A feruri tiretiera ! », Liahona, Novema 2023, 118.