« 3 rāve’a nō te fa’a’oroma’i i te orara’a ’e nō te ’oa’oa i te reira », Liahona, Tetepa 2024.
Feiā ʼāpī paʼari
3 rāve’a nō te fa’a’oroma’i i te orara’a ’e nō te ’oa’oa i te reira
Tē hina’aro nei te Metua i te ao ra ’ia ’ite mai tātou i te ’oa’oa i roto i te orara’a tei hōro’ahia mai ia tātou.
Guido nō Helemani
E aha te taime hope’a i ’oa’oa mau ai ’outou ?
E mea fifi ānei ’ia pāhono i teie uira’a ?
I roto i te mau taime fifi, e nehenehe tātou i te a’a-roa-hia i roto i tō tātou mau tāmatara’a ’o tā tātou e ’ore mau e ha’amana’o mai te aha rā te huru o te ’oa’oa. Mai tā te tuahine Reyna I. Aburto, tauturu piti tahito i roto i te Peresidenira’a Rahi o te Sōtaiete Tauturu, i fa’ata’a : « E nehenehe te mau ata ’ere’ere […] e tupu mai i roto i tō tātou orara’a, ’o tē nehenehe e ha’amatapō ia tātou i te māramarama ’o te Atua ’e e tūra’i ato’a ia tātou ’ia uiui ē, tē vai noa ra ānei taua māramarama ra nō tātou ».
Nō te rahira’a o tātou te feiā ’āpī pa’ari, e nehenehe te orara’a e riro i te tahi taime mai te hō’ē mea e fa’a’oroma’i noa—te hō’ē mea e fa’aruru atu ē tae roa atu i te taime e fa’ari’i ai tātou i te mau ha’amaita’ira’a ’o tei fafauhia mai ia tātou.
Te mea tā tātou e ha’amo’e i te tahi taime, ’o te hō’ē ato’a ïa mea e oa’oa. E nehenehe te ha’amaita’ira’a nō te ’oa’oa mure ’ore e ha’amata i teienei.
Teie te tahi mau rāve’a nō te fa’aoraora fa’ahou ā i te māramarama ’e te oa’oa i roto i tō tātou orara’a.
’A ha’amana’o i te mau parau mau ’ōhie
’Āhiri i te ha’api’ipi’ira’a i tō tātou mata ’ia hi’o i roto i te pōiri, e nehenehe tātou e ’imi i te mau hihi o te māramarama tā te ’evanelia a Iesu Mesia e hōpoi mai i roto i tō tātou orara’a.
’Ua fa’aha’amana’o mai Russell M. Nelson ia tātou ē, « nō ’ō mai i te ’oa’oa ’e maoti ’o [Iesu Mesia]. ’O ’oia te tumu o te ’oa’oa ato’a ». ’Ia fifi ana’e ’outou i te ’ite mai i te māramarama i roto i tō ’outou orara’a, ’ia riro noa te fāriura’a ia Iesu Mesia ’ei ta’ahira’a mātāmua.
E nehenehe ato’a ’outou e ani i te Metua i te ao ra ’ia tauturu mai ia ’outou ’ia ha’amana’o i te aura’a ’o tō ’outou ihota’ata hanahana.
’Ua ha’api’i Elder Gary B. Sabin nō te Hitu ’Ahuru, « e mea faufa’a rahi nō tō tātou poupou ’ia ha’amana’o tātou ē, e mau tamaiti ’e e mau tamāhine tātou nā te hō’ē Metua here i te ao ra ». Te ’itera’a mau ē, ’ua ’ite maita’i te Atua ia ’outou ’e tē hina’aro nei ’oia i te mea maita’i roa a’e nō ’outou, e nehenehe te reira e ha’amāramarama i tō ’outou orara’a.
Noa atu te mau tāmatara’a tā ’outou e fa’aruru nei, te ha’amana’o-noa-ra’a i teie mau parau tumu niu o te ’evanelia e tauturu ia ’outou ’ia tītau manihini i te māramarama o te Fa’aora i roto i tō ’outou orara’a.
’A ’ite mai i te mea e hōpoi mai ia ’outou i te ’oa’oa
E riro i te tahi taime e mea fifi ’ia ha’amana’o ē, e ’ere noa tō tātou oa’oa i te hō’ē ā huru ’e tō vetahi ’ē. ’Oia mau, ’ei feiā ’āpī pa’ari e mea fifi roa i te fa’aau i tō tātou orara’a i tō te feiā ’ati a’e ia tātou. ’A ha’amana’o rā ē, tei ia ’outou te fa’aterera’a i tō ’outou iho ’oa’oa.
’A ui ia ’outou iho : E aha te mea e fa’a’oa’oa nei ia ’outou ?
E aha te mea e fa’a’ata’ata ia ’outou ?
Mai tā te peresideni Dieter F. Uchtdorf i parau i te taime ’a riro ai ’oia ’ei tauturu piti i roto i te Peresidenira’a Mātāmua, « ’A fa’aiti i te rūra’a ’e ’a rave i te tahi atu ā taime nō te ha’amātau maita’i a’e ia ’outou iho ». ’A ’imi i te nehenehe i roto i te mau mea iti ha’iha’i : ’A haere e orihaere. Haere i te hiero. ’A tāpa’o atu ia ’outou i roto i te hō’ē ’ohipa tōtauturu. ’A ’ite mai i te hō’ē fa’a’ana’anataera’a ’āpī ’aore rā ’a rave fa’ahou mai i te hō’ē mea tahito i te vāhi ’a vaiiho ai ’outou i te reira.
’Ua parau Elder Richard G. Scott (1928–2015) nō te pupu nō te Tino ’Ahuru Ma Piti āpōsetolo i te hō’ē taime, e mea nāhea te hāmanira’a i te hō’ē ’ohipa i te tūrama i tō tātou orara’a : « ’A mā’iti i te hō’ē ’ohipa mai te pehe, te ’ori, te nana’o, ’aore rā te pehepehe. Te rirora’a ’ei ta’ata hāmani ’ohipa e tauturu ia ’outou ’ia ’oa’oa i te orara’a. E fa’atupu te reira i te hō’ē vārua mehara. E fa’ananea te reira i te tareni ’ite-’ore-hia, e fa’a’oi i tō ’outou ’aravihi ’ia feruri, ’ia rave ’e ’ia ’ite mai i te hō’ē ’ōpuara’a i roto i te orara’a. E ti’avaru te reira i te vai-’ōtahi-ra’a ’e te māuiui. E hōro’a mai te reira i te hō’ē fa’a’āpīra’a, hō’ē pura nō te ’ana’anatae ’e te ’oa’oa nō te orara’a ».
Te ’itera’a mai e aha te mea e fa’a’ī i tō ’outou ā’au i te ’oa’oa, e nehenehe te reira e tauturu ’ia fa’a’ama fa’ahou i te māramarama i roto i tō ’outou orara’a, tei roto ana’e ’outou i te hō’ē ’ohipa tāmau noa.
Fa’atumu i ni’a i te mau mea faufa’a a’e
Mai te peu e mea teimaha roa te orara’a ’e e au ra ia ’outou e hina’arohi te tā’āto’ara’a o tō ’outou pūai nō te tāpae i te mahana tāta’itahi, ’a rave i te hō’ē taime hau nō te fa’atumu ia ’outou i ni’a i te mau mea faufa’a a’e.
Nō te rave i te reira, ’ua parau te peresideni Uchtdorf ē « e fa’a’ōhie ri’i tātou i tō tātou orara’a ». ’A fa’atumu fa’ahou i tō ’outou orara’a i ni’a i te here o te Metua i te ao ra ’e te hōro’a nehenehe o te Tara’ehara a te Mesia. ’A tu’u nā mua roa i tō ’outou mau tā’amura’a ’e tō ’outou ’utuāfare, te mau hoa, ’e ia ’outou iho.
’A aro i te mea ’ino nō te maita’i, te pōiri nō te māramarama ’o Iesu Mesia ’e i tāna ’evanelia.
Mai tā te peresideni Nelson i fa’aitoito ia tātou : « ’Eiaha tātou e fa’a’oroma’i noa i teie pu’e tau. E fāri’i na tātou i te ’ananahi ma te fa’aro’o ! » ’A fa’a’oroma’i noa ai i te mau fifi o te orara’a, ’a ha’api’i ato’a mai ’ia ha’afa’ahiahia i te nehenehe o te reira. E’ita te ’oa’oa mure ’ore ’o tā te ’evanelia i parau fafau mai e ha’amata i te tauāmuri—e ha’amata te reira i teienei.