Mau hōho’a o te faʼaroʼo

E fa’aurura’a nō te poietera’a

Nā Stephan Seable, Oregon, Marite

E mea hōhonu atu ā te aura’a o te tāra’ehara a Iesu Mesia nō’u ’a tarai ai au i te ’ā’amu o Aberahama ’e o Isaaka.

Hoho’a nā Christina Smith

’Ua riro te pēnira’a hōho’a ’e te taraira’a hōho’a ’ei rāve’a nō’u nō te fa’a’ite i tō’u māuruuru i te nehenehe o te fenua nei. Nō’u nei, e ha’amata te mau anoihi nā roto i te hō’ē fa’aurura’a nō te poietera’a.

« Te tamari’i nō te fafaura’a »

I te haerera’a te hō’ē hoa i tāna fa’atuha’ara’a ’e ’a fa’aineine ai ’oia e taui i tōna nohora’a, ’ua tarai au i te hō’ē hōho’a nāna tei pi’ihia Te tamari’i nō te fafaura’a. E hōho’a tarai nō Aberahama e hi’i ra i tāna ’aiū ’o Isaaka. Mai te reira atu taime, e rave rahi atu ā mau hōho’a tā’u i tarai ma te rave ia Aberahama ’e ia Isaaka ’ei hi’ora’a. ’O rāua tā’u mau hāmanira’a au roa a’e i roto i tā’u mau hāmanira’a faufa’a roa a’e.

I roto i te mau taraira’a a Stephan Seable, tāna mea au roa a’e ’o Aberahama rāua Isaaka. E fa’aha’amana’ora’a te reira iāna i te here o te Metua i tāna Tamaiti Fānau Tahi. I te pae ’atau roa, ’o tāna ïa hāmanira’a tei pi’ihia Te tamari’i nō te fafaura’a.

Te mea pūai roa a’e nō’u, ’o tō Aberahama ïa ravera’a i te mau ’ōtaro parau nō te ha’api’i i tāna tamaiti. Tei tōna iho hūhā ava’e te rima o Aberahama ’a hi’o atu ai tāna mata ’oto mai te huru ra ’ua ’ite roa ’oia i te hina’aro o te Fatu ’ia hōro’a ’ei tūsia i tāna tamaiti hō’ē roa. Tē tauahi nei Isaaka ia Aberahama, ’aita rā ’oia i māramarama nō te aha ’aita tōna metua tāne i pāhono mai iāna.

Teie hāmanira’a tā te taea’e Seable i pi’i ’A rave i tō tamaiti hō’ē roa, ’ua iho te fa’aurura’a a te Fatu ia Aberahama ra ’ia hōro’a ’ei tūsia i tāna tamaiti ’o Isaaka.

Tē fa’a’ite nei te tahi atu pēha’a e hāmanihia nei, ia rāua tē hāmani ra i te hō’ē fata. Tē ani nei Isaaka tei hea te tūsia, ’e tē pahono nei Aberahama ē nā te Fatu e hō mai. I roto i te pēha’a nā mua atu, ’ua hōro’ahia ia Aberahama te hō’ē rama i roto i te uru ’aihere ’e ’ua parau atu ’oia ē e’ita i te mea faufa’a nōna ’ia hōro’a ’ei tūsia i tāna tamaiti. Tē tauahi nei Aberahama ia Isaaka ma te mau pāpū iāna. (’A hi’o Genese 22:1–14.)

Tē tauahi nei Aberahama ia Isaaka i roto i teie hāmanira’a nā te taea’e Seable tei pi’ihia I muri a’e i te tāmatara’a.

Te mea faufa’a roa nō ni’a i teie ’ā’amu, ’o te huru ïa, ’aore rā te tāpa’o nō te tusia a te Tamaiti a te Atua. ’Ua mā’iti ato’a tō tātou Metua i te ao ra, tei here i tāna Tamaiti Fānau Tahi, ’ia hōro’ahia ’ei tūsia, ’aita rā i fa’aora iāna i te taime hope’a. ’Ia au i te mau parau a Elder Neal A. Maxwell (1926–2004) nō te pupu nō te Tino ’Ahuru Ma Piti ’āpōsetolo : « ’Aita e rama i roto i te uru ’aihere i Kalavaria ra nō te fa’aora iāna, teie Hoa nō Aberahama ’e Isaaka » (« O, Divine Redeemer », Ensign, Novema 1981, 8).

’Ua fa’ati’a rā te Metua i tāna Tamaiti ma’itihia (’a hi’o Mose 4:2) ’ia fa’atupu i te Tāra’ehara nō tātou, ’ia ti’a ho’i ia tātou pā’ato’a ’ia ho’i fa’ahou i te fare ra nō te ora fa’ahou i pīha’i iho ia rāua mai te mea e hina’aro tātou ’ia ora ’ei mea ti’amā i taua ha’amaita’ira’a ra (’a hi’o Ioane 3:16–17).

Tē fa’a’ite mai nei tō’u ’itera’a ē, tei roto te Atua i tō tātou orara’a. Tē vai nei tātou ’ia « noa’a tō tātou ’oa’oa » (2 Nephi 2:25), e noa’a rā ia tātou te ’itera’a nā roto i te mau mea tā tātou e māuiui nei. Mai te mea ē, e tupu te mau mea maita’i, tē vai nei rā, « nā pae e piti i te mau mea ato’a ra » (2 Nephi 2:11). Terā rā, tei reira te Atua nō tātou, ’e e nehenehe tātou e upo’oti’a i ni’a i te mau mea ato’a e vai ra i ni’a ia tātou, noa atu te mau mea e tupu mai i ni’a ia tātou. E ’ite tātou ē, e nehenehe tātou e fa’aruru i tō tātou mau tāmatara’a ’a tāmau noa ai tātou i te tāmata i te here, i te tāvini, ’e i te riro mai ’ei mea aroha a’e—mai tō tātou Fa’aora ra te huru.

Tē māuruuru nei au nō te ’evanelia, nō tō’u ’utuāfare ’e nō te mau ta’ata nehenehe ato’a i roto i te ’Ēkālesia. Noa atu e aha te misiōni e haerehia e māua tā’u vahine ’o Kathleen nā te ao nei, ’ua ’itehia ia māua te Feia Mo’a tei here i te tahi ’e te tahi ’e tei tavini, ’o tē ha’amaita’i ’e ’o tē fa’atūsia nō te tahi ’e te tahi. Tē here nei tō tātou Metua i te ao ra ia tātou, ’e e mau tamari’i tātou nāna. ’Aita e mea faufa’a a’e i te ha’apa’o-maita’i-ra’a iāna ’e i tāna Tamaiti, tei ha’apa’o maita’i roa ia tātou.

Noa atu e aha te misiōni e haerehia e te taea’e Seable ’e tāna vahine ’o Kathleen nō te tāvini nā te ao nei, ’ua ’itehia ia rāua te feiā mo’a i te mau mahana hopea nei, « tei here i te tahi ’e te tahi ’e ’o tē tāvini nei, ’o tē ha’amaita’i nei ’e ’o tē fa’atūsia nei nō te tahi ’e te tahi. »