« Nāhea vau e fa’aineine ai nō te fa’ari’i i te Fa’aora ? » Liahona, Tetepa 2024.

Mai, pe’e mai

Nāhea vau e fa’aineine ai nō te fa’ari’i i te Fa’aora ?

Teie e maha rāve’a e nehenehe ia ’outou e fa’ari’i i te Fa’aora i roto i tō ’outou orara’a.

’Ua tītauhia i te mau ’āti Nephi ’ia fa’aineine ia rātou iho nō te fa’ari’i tino i te Fa’aora i rotopū ia rātou. E aha tā tātou e nehenehe e ha’api’i mai nā roto mai i tō rātou hi’ora’a nō te tauturu ia tātou, ’ia fa’ari’i i te Fa’aora i te pae vārua i roto i tō tātou orara’a ?

Feruri hōhonu i te mau mea a te Atua

I terā tau : ’A « ’oto noa » ai te peropheta Nephi, ’ua feruri hōhonu ’oia « i te mau mea tā te Fatu i fa’a’ite mai iāna ra » (Helamana 10:2–3).

I teienei : Te ha’amana’ora’a i te mea tā te Atua i rave nō tātou, i roto i te mau taime maita’i ’e te mau taime ’ino, e hōro’a mai ’oia ia tātou i te pūai ’e te itoito nō te fa’aea fātata noa iāna ’e ’ia fa’aruru i te ananahi ma te fa’aro’o.

’Ua parau te peresideni Henry B. Eyring, tauturu piti i roto i te Peresidenira’a Mātāmua, ’ia feruri tātou i te mau mahana ato’a ’e ’ia pāpa’i i tō tātou mau mana’o. ’Ua parau ’oia : « E pure ’e e feruri hōhonu paha ’outou, ma te ui i te mau uira’a : ’Ua fa’atae mai ānei te Atua i te hō’ē parau poro’i nō’u ? ’Ua ’ite ānei au i tōna rima i roto i tō’u orara’a ’aore rā, i roto i te orara’a o tā’u mau tamari’i ? »

Mea nāhea ’outou i te ’itera’a i te here, te fa’aurura’a ’aore rā te mau ha’amaita’ira’a a te Atua i roto i tō ’outou orara’a i teie mahana ?

Rave i ni’a ia ’outou i te i’oa o Iesu Mesia

I terā tau : ’Ua itoito Moromona i te fa’a’itera’a ē, « e pipi ’oia nā Iesu Mesia » (3 Nephi 5:13).

I teienei : ’Ua parau Elder Jonathan S. Schmitt nō te Hitu ’Ahuru ē, e nehenehe tātou e fa’atumu i ni’a ia Iesu Mesia nā roto i te ravera’a i ni’a ia tātou i tōna mau ti’ara’a rau. ’Ei hi’ora’a, Iesu « hō’ē ā ho’i huru tōna i nanahi, i teie nei mahana, ē a muri noa atu » (1 Nephi 10:18). Tē parau nei Elder Schmitt ē, e nehenehe tātou e rave i ni’a iho ia tātou i teie ti’ara’a ma te orara’a tū’ati maita’i i te ’evanelia.

E aha te tahi atu mau i’oa ’aore rā mau ti’ara’a o Iesu Mesia, tā ’outou e nehenehe e feruri ’e e fa’a’ohipa ia ’outou iho ?

Vaiiho i te Fa’aora ’ia ha’aputuputu ia ’outou iāna ra

I terā tau : I roto te 3 Nephi 10:4–6, ’ua fa’aau Iesu Mesia iāna iho i te hō’ē moa e ha’aputuputu ra i tāna mau fanau’a. E fa’ahōho’ara’a nehenehe teie nō te mea tē pi’i tāmau nei ’oia ia tātou ’ia haere mai iāna ra, ’ia ti’a iāna ’ia pāruru ’e ’ia fa’a’amu ia tātou. E ti’a rā ia tātou ’ia ma’iti ’ia haere iāna ra. ’Ua parau ’oia, « ’oia ïa, e rave rahi tō’u ha’aputuputura’a ia ’outou mai te moa e ha’aputuputu i tōna mau fanau’a, ’e ’aita rā ’outou i nā reira ».(’īrava 5).

I teienei : Tē tāmau noa nei Iesu i te ha’aputuputu ia tātou i teie mahana, e ti’a rā ia tātou ’ia vaiiho ia tātou ’ia ha’aputuputuhia iāna ra. E vaiiho ānei ’outou ia ’outou ’ia ha’aputuputuhia i te Fa’aora ’e ’ia ’ite mai i te pārurura’a i pīha’i iho iāna, ’aore rā tē pāto’i nei ’outou ’e e fa’aea noa i mua i te ’ati ?

E aha te anira’a manihini tā te Fa’aora e vauvau nei ia ’outou, ’e e aha tei tītauhia ia ’outou ’ia rave nō te fa’ari’i i te reira ?

’A hi’o i ni’a i te ra’i

I terā tau : ’Ua tītauhia e toru tāmatara’a i te mau ’āti Nephi nō te fa’aro’o i te reo o te Atua. « ’Ua fa’aro’o fa’ahou a’era i te reo i te toru o te taime, ’e ’ua ha’amahora ihora i tō rātou tari’a nō te fa’aro’o i te reira ; ’e ’ua hi’o atu ra tō rātou mata i te vāhi nō reira mai te haruru o te reo ; ’e ’ua hi’o māite atu ra rātou i ni’a i te ra’i, i te vāhi nō reira mai te haruru o te reo » (3 Nephi 11:5).

I teienei : Hō’ē rāve’a e nehenehe ai tātou e « hi’o māite atu i te ra’i » ’oia ho’i ’ia au i te parau a te peresideni Russell M. Nelson, « ’ia feruri tiretiera ». Tē fa’ata’a nei ’oia ē, te hō’ē huru nō te feruri tiretiera, ’o te « mana’ora’a ïa ma te pae vārua ».

E aha tā ’outou e nehenehe e rave nō te mana’o hau atu ma te pae vārua ’e e « hi’o māite atu i te ra’i » ?