« Nāhea tō’u vāvāhira’ahia i te tauturu iā’u ’ia patu fa’ahou i tō’u niu nō te fa’aro’o », Liahona, Tetepa 2024.
Feiā ʼāpī paʼari
Nāhea tō’u vāvāhira’ahia i te tauturu iā’u ’ia patu fa’ahou i tō’u niu nō te fa’aro’o
I muri a’e i te mau fifi rarahi i te pae ferurira’a, i te pae tino ’e i te pae vārua, ’ua ’itehia iā’u e aha te aura’a ’ia ’ite mai i te fa’aorara’a maoti tō tātou Fa’aora, ’o Iesu Mesia.
Tē tāvini ra vau ’ei misiōnare i Farāni ’a topatari ai te ao nei ’e ’a tu’u ai te ma’i COVID-19 i te fenua tā’āto’a i roto i te hō’ē ’ōpanipanira’a ’eta’eta. ’Ua ’aro vau i te fa’aturumara’a i roto i tō’u orara’a, nō reira ’ua ha’ape’ape’a vau nā roto i te tupura’a te ’ōpanipanira’a e riro te reira i te fa’ata’oto iā’u i roto i te hō’ē tau fa’aturumara’a. Te hepetoma mātāmua rā ’o te ’ōpanipanira’a—te hepetoma nā mua a’e te ’āmuira’a rahi faufa’a roa nō ’Ēperēra 2020—’ua riro ’ei hō’ē o te mau hepetoma pae vārua rahi roa a’e o tō’u orara’a.
’Ia hi’o-ana’e-hia i muri, te mau ’ohipa i tupu ’o tā’u i ora i taua hepetoma ra, ’ua hōro’a mai iā’u i te mana’o ē, tē ha’apūai nei te Fatu iā’u ’ia fa’aruru i te hō’ē vero.
’Ua hōro’a Elder Gary E. Stevenson, nō te pupu nō te Tino ’Ahuru Ma Piti ’āpōsetolo i te hō’ē a’ora’a i taua ’āmuira’a ra nō ni’a i te mau tātā’ira’a ’o tei ravehia i ni’a i te mau niu o te hiero nō Roto Miti. ’Ua fa’aau ’oia i te fa’a’āpīra’a i tō tātou iho orara’a ’e ’ua ani mai ia tātou ’ia feruri i teie uira’a :
« E aha te mau ’ohipa tumu o tō’u huru pae vārua ’e pae ’āehuehu ’o te fa’ati’a iā’u ’e i tō’u ’utuāfare ’ia vai pāpū noa ’e te ’āueue ’ore, ’oia ato’a i te fa’arurura’a i te mau ’āueuera’a fenua ’e te mau tupura’a ’āueuera’a rahi, e mea pāpū e tupu mai i roto i tō tātou orara’a ? »
’A fa’aro’o ai au i tāna a’ora’a, ’ua fa’auru mai te Vārua iā’u ē, mai te hiero, e vāvāhihia vau nā roto i te tahi mau rāve’a i te roara’a o te tau i muri nei o tō’u orara’a. ’Ua putapū ato’a rā vau ē, mai te mea e fāriu atu vau i ni’a i te Fatu i te roara’a o teie mau tāmatara’a, e tauturu mai ’oia iā’u ’ia ha’apūai i tō’u niu o te fa’aro’o.
Tō’u vāvāhira’ahia
Mai tei mana’ohia, ’ua ’oi’oi roa vau i te topara’a i roto i te hepohepo, ’e ’ua tītauhia iā’u i te hō’ē tau roa nō te ’ite i te topara’a i roto i te hō’ē ’ōhura’a hope ’ore nō te mana’o ’ōnohi. ’Ua ’ite au iā’u iho i te vāvāhira’ahia i te pae ferurira’a, i te pae ’āehuehu ’e i te pae vārua.
E piti ’āva’e i muri mai i te vai ’ōpanipanira’a, ’ua maita’i ri’i mai te mau mea. Maoti te mau tauira’a i roto i tō’u huru orara’a, mai te rā’au tāmarū ’e te hopera’a te ’ōpanipanira’a, ’ua ha’amata vau i te maita’i ri’i mai a’e i te pae ferurira’a. ’Aita rā i maoro roa i muri iho, ’ua ha’amata vau i te ’ite ’ua ma’ihia vau ’e ’ua ’ite mai au e toru pu’u rahi i roto i tō’u ’arapo’a.
I te ha’amatara’a ’aita vau i tāu’a i te mau ’ōtu’itu’ira’a, ’ua ha’afifi mai rā te mau tupura’a o te ma’i e mea pāpū maita’i ē, e’ita tā’u nehenehe fa’ahou e fa’aea i roto i te ’āua misiōni. ’Ua ho’i au i te fare, i reira te ’itera’ahia ē, e māriri aitoto tō’u—e lymphome hodgkinien.
Nō te mea tā’u mau rā’au tāmarū e mea iti roa te maita’i nō te fa’ateiahara’a i te pae ’āehuehu, ’ua ’ite au te huru tau’a ’ore ’a ha’amata ai au e ono ’āva’e i te rapa’aura’a hīmio [chimiothérapie].
Noa atu rā te reira, ’ua ha’amata vau i te paruparu roa i te pae tino.
Te patu-fa’ahou-ra’a i tō’u niu pae vārua
Hō’ē matahiti i muri a’e i te hopera’a tā’u rapa’aura’a hīmio, ’ua ha’amata vau i te ’ite mai i te maita’i i te pae tino. ’Ua ho’i au i te fare ha’api’ira’a tuatoru ’e ’ua rave i te mau ’ōpuara’a. Terā rā, te māuiui rahi i te pae vārua ’e te fa’ateiahara’a ’o tā’u i putapū i te roara’a o tā’u misiōni, ’e i te taime o tō’u rapa’aura’a hīmio, ’ua taui mai i teienei ’ei hō’ē nino’a mana’o rahi nō te tāu’a ’ore i tō tātou Metua i te ao ra ’e ia Iesu Mesia.
Tē ’aro nei au ma tō’u mau nino’a mana’o nō ni’a i te mea ’o tā’u i ora mai ’e e au ra iā’u ē ’ua fa’aru’e rāua iā’u i te taime tei raro roa vau.
’Ua ’ite rā te Metua i te ao ra e aha te mau ’ē’a e ti’a iā’u ’ia rave ’ia nehenehe iā’u ’ia ora.
E au ra iā’u ’ua mau roa vau i roto i te mau patu pāpararī ’e te mau toetoe’a o tō’u fa’aro’o tei riro ’ei mea pūai nā mua a’enei, ’e tō’u huru ta’ata tei riro ’ei mea itoito i nā mua a’enei. ’Ua ’ite au iā’u iho i te tū’ati-’ore-roa-ra’a iā’u iho. ’Ua tāmarūhia tō’u ’ā’au i mua i te mau tāmatara’a a te Fatu ’ia toro mai i te rima iā’u, i te pae vārua rā ’ua ’ite au e ta’ata hara vau, te hepohepo ’e te ti’amā ’ore nō tō’u tāu’a ’ore i te ’evanelia.
I muri a’e i te ferurira’a i tō’u ea pae vārua i te tahi ma’a ’āva’e, ’ua fa’auruhia vau ’ia rave i te mau tauira’a pae vārua na’ina’i i roto i tō’u orara’a. ’Ua tāu’a ’ore au i te māuiui i te hō’ē taime, ’ua hina’aro rā vau e pāhono i te pēpē ’o tā’u i putapū i roto i tō’u vaerua nō te mau tāmatara’a ’o tā’u i ora mai.
’Aita i maoro roa, ’ua ’ite au i te rima o te Metua i te ao ra i roto i tō’u orara’a. Ma te ’ite ’ore i te huru paruparu pae vārua ’o tā’u i putapū, ’ua ’āfa’i mai te mau hoa ’e te mau ta’ata tei herehia i te tumu parau nō te fa’aorara’a. ’Ua fa’a’ite ato’a mai te hō’ē o rātou i te hō’ē a’ora’a fa’aitoitora’a a Elaine S. Marshall.
Ma te ’ā’au tae ’ore, ’ua tai’o vau.
’Ei tuati ma’i, ’ua ha’amau Elaine i te mau tū’atira’a i rotopū i te fa’aorara’a pae tino ’e te fa’aorara’a pae vārua, ma te parau ē : « E ’ere te fa’aorara’a i te rapa’aura’a. E mea mā te rapa’aura’a, e mea vitiviti ’e e rave-pinepine-hia—i raro a’e i te fa’ata’otora’a […] Te fa’aorara’a […] pinepine te reira i te riro ’ei fa’anahora’a ’ia maita’i mai ’e ’ia tupu i te rahi i roto i te orara’a tā’āto’a, maoti ’e penei a’e te tumu nō te mau ’arora’a tāmau i te pae tino, i te pae ’āehuehu ’aore rā i te pae vārua. E tītau te reira i te taime ».
’Aita vau e mana’o ra ’ua riro ’ei tupu-’āpīpiti-ra’a, mai te mea te rapa’aura’a o tō’u māriri ’aita’ata ’ua tītauhia e ono ’āva’e nō te hīmio. Te mau tupura’a o te hīmio e mea ’eta’eta, te pe’ape’a ’e te tītau-roa-hia. E mea fa’ahiahia roa, te ha’api’ira’a mai ’ia vaiiho i tō’u tino ’ia ora i te pae tino, ’ua ha’api’i te reira iā’u i te hō’ē parau tumu faufa’a rahi nō te fa’aorara’a i te pae vārua—nāhea ’ia tāipu mai i roto i te aroha o Iesu Mesia ’e ’ia vaiiho iā’u iho i te taime ’e i te vāhi nō te fa’aora i tō’u tā’amura’a ’e ’ōna ’e te Metua i te ao ra.
Te fa’ari’ira’a i te aroha o te Fa’aora
Te aroha ’o te tauturu ïa nō te ra’i mai, te mana fa’atupu ’e te ha’apūai, ’e te fa’aorara’a pae vārua. E hōro’a nō ’ō mai i tō tātou Metua i te ao ra, « tei hōro’ahia mai ia tātou nā roto i te tāra’ehara a te Fatu ra ’o Iesu Mesia ».
Tā’u hi’ora’a au roa a’e nō te hō’ē ta’ata tei noa’a iāna i te mana fa’aora o Iesu Mesia nā roto i tāna tāra’ehara, ’o Alama tamaiti ïa. ’A vai ai ’oia i roto i te moeari [coma] e toru mahana te maoro, ’ua māuiui ’oia i « te mau ’ati o te vārua fa’ahapahia ra », ’ua ha’amana’o ’oia i te mau ha’api’ira’a a tōna metua tāne nō ni’a ia Iesu Mesia (hi’o Alama 36:16–17). ’Ua hina’aro ’oia nā mua roa i te tauturu ’e i muri iho ’ua fāriu atu i ni’a i te Mesia, ’o tei taui roa i tōna haere’a ’e ’ua fa’ati’a iāna ’ia fa’aorahia i te pae vārua (hi’o Alama 36:18–22).
Te ta’ahira’a mātāmua ’o tā’u i rave nō te fa’aorara’a i te pae vārua ’o te ’itera’a mai ïa i te hina’aro ’ia tū’ati atu i te Atua. ’Ua ha’api’i mai Alama iā’u nāhea ’ia ha’amata ’a parau ai ’oia, e « fa’atupu ho’i i te fa’aro’o iti ha’iha’i noa iho, ’oia ïa, ’aita atu i ti’a ia ’outou, maori rā o te hina’aro i te fa’aro’o, ’ia tupu ā taua hina’aro i roto ia ’outou ra e tae noa atu i te fa’aro’o iti ha’iha’i, e ti’a ai ia ’outou i te fāri’i i te tufa’a ’o tā’u nei parau » (Alama 32:27).
Tē fa’a’ite pāpū nei au nā roto i te mau ’ohipa o tā’u iho i ora mai ē, e parau mau teie ha’api’ira’a.
E nehenehe tātou e fa’ananea i te hō’ē hina’aro, e tanu i te hō’ē huero (te parau a te Atua), ’e e ’atu’atu i te reira huero ē tae roa atu e riro mai te reira ’ei ’ohipa mau ’e te ’ite-mata-hia. I te hope’a, e rahi mai te mau hotu o tō tātou fa’aro’o ia Iesu Mesia ’ia ’ite ana’e tātou i te mau tauira’a i roto i tā tātou mau ’ohipa, tō tātou mau mana’o, tō tātou mau ti’aturira’a, tō tātou ’ā’au, tō tātou mana’o, ’e i muri iho tō tātou vaerua. Tō tātou niu tei ni’a ïa iāna (hi’o Helamana 5:12).
Mai te ’ohipa i tupu nō Alama, tō’u hina’aro ’ia putapū fa’ahou i te Vārua ’e te oa’oa o te ’evanelia, ’ua fa’atupu i te hō’ē tauira’a tā’āto’a o te haere’a ’o tei fa’ahaere iā’u nā roto i te fa’anahora’a o nō te fa’aorara’a. Mai te reira taime, ’ua tauturu mai te Fa’aora iā’u ’ia fa’afaite i tō’u mau nino’a mana’o tahito ma te ha’api’i mai iā’u ’ia fa’aru’e i tō’u mau ino’ino i te Atua, iāna e’ i tō’u iho mau paruparu.
Maoti ’oia, te mau tuha’a nō ni’a iā’u iho ’o tā’u i mana’o ’ua mo’e roa i rōpū i tō’u mau tāmatara’a—mai tō’u ihota’ata, tō’u mau hina’aro ’e tō’u here i te ’evanelia—’ua fa’aho’ihia mai iā’u ’e ’ua fa’ati’a te reira iā’u ’ia ’ite i tō’u tā’āto’ara’a, te fa’a’āpīra’a ’e te fa’aho’i-fa’ahou-ra’a mai.
Te hō’ē niu pāutuutu a’e
’Ua taui te māuiui ’e te mau tāmatara’a iā’u, terā rā i te taime ’a ’ite mai ai au i te fa’aorara’a maoti Iesu Mesia, ’ua patu fa’ahou mau vau i tō’u niu o te fa’aro’o i ni’a iāna. ’A tere noa ai te tau ’e ’a ora mai ai au, tē ’ite nei au ē maoti Iesu Mesia, e nehenehe au e ha’api’i mai ’ia roa’a te oa’oa noa atu tō’u mau arora’a. ’Ua ta’a iā’u i teienei ē, te tuha’a faufa’a roa a’e o te hō’ē tāmatara’a, e ’ere i te mea e vāvāhi ia tātou ’aore rā te māuiui tā tātou e fa’ari’i nei—’o te mea rā e tupu mai i muri iho ’a ora ai tātou i te ’ohipa i tupu o te fa’aorara’a ’e te fa’aho’i-fa’ahou-ra’a maoti i te aroha o te Fa’aora.
’Ua ha’api’i Elder Patrick Kearon nō te pupu nō te Tino ’Ahuru Ma Piti ’āpōsetolo ē, : « E au mau hoa here […] ’o tē amo nei i te mau ’ohipa ti’a ’ore o te orara’a—e nehenehe ’outou e fa’ari’i i te hō’ē ha’amatara’a ’āpī. I Getesemane ’e i Kalavaria, ’ua ’rave Iesu i ni’a iāna iho […] i te tā’āto’ara’a ’o te ahoaho ’e te mamae ’aita ā i ’itehia a’e nei e ’outou ’e ’o vau nei’ [Russell M. Nelson, « Te i’oa ti’a o te ’Ēkālesia », Liahona, Novema 2018, 88], ’e ’ua upo’oti’a ’oia i ni’a i te mau mea ato’a ! »
Nō reira, i te feiā e putapū nei i te vāvāhira’a, tē tāparu nei au ia ’outou ’ia vai itoito noa, ’ia tāpe’a noa, ’e ’ia ti’aturi i te Fatu ’e i tōna mana fa’aora. Nā roto i te tau, te fa’a’oroma’i, e tae noa atu i te hina’aro ha’iha’i roa, e nehenehe tōna aroha e taui ia ’outou, e patu fa’ahou i tō ’outou niu, ’e e tauturu ia ’outou ’ia ’ite fa’ahou mai i tō ’outou tā’āto’ara’a.
’O te hōro’a teie tāna e pūpū nei ia tātou tāta’itahi.
Tē ora nei te ta’ata pāpa’i i Caroline apato’erau, i Marite.