« Te ’ahu roto o te autahu’ara’a mo’a », Liahona, Tetepa 2024.

Te ’ahu roto o te autahu’ara’a mo’a (garment)

Nā te peresideni Jeffrey R. Holland

Peresideni mono nō te pupu nō te Tino ’Ahuru ma Piti ’āpōsetolo

’Ei tuha’a nō te ’ōro’a hiero, ’ua hōro’ahia mai ia tātou te hō’ē fa’aha’amana’ora’a pae tino mo’a nō tā tātou mau fafaura’a—hō’ē taipe nō te Fa’aora iho.

Ta’a ’ē noa atu te fa’aineinera’a mea pāpū tei hōro’ahia ia rāua ’e te mau ha’apāpūra’a tā rāua i tāmata i te ha’amana’o, ’ua riro mau te reira ’ei ’ohipa māere rahi nō Adamu ’e nō Eva ’ia fa’aru’e i tō rāua ’ō paradaiso i Edene ’e ’ia tomo atu i roto i te hō’ē ao hi’a.

Ma te mana’o pāpū, ’ua ’ite mai rāua i te aura’a ’ia taui i tō rāua orara’a hau ’e te pe’ape’a ’ore nō te hō’ē ao pāto’ira’a ’e te tahe te hou, te tara ’e te ’oto—’āpe’ehia i te pae hope’a e te hō’ē mea tei pi’ihia te pohe. ’Aita i nehenehe ia rāua ’ia ’ite i te ha’amatara’a i te aura’a o teie mau mea ato’a, ’ua ta’a ’oi’oi rā ia rāua ē e nehenehe te mahana tāta’itahi e hōpoi mai i te māuiui ’āpī. ’Oia ïa, te māuiui rahi roa a’e o te mau mea ato’a ’o te ’itera’a ïa ē e fa’aruru rāua i teie mau mea ato’a fa’ata’a-’ē-hia i tō rāua Metua i te ao ra—« ’ua fa’ata’a-’ē-hia ho’i rāua i tōna ra aro », ’ua pāpa’i o Mose i muri a’e.

Nō teie fa’ata’a-’ē-ra’a ’e te vai-’ōtahi-ra’a i roto i te hō’ē ao to’eto’e ’e te ri’ari’a, ’auē ïa ē ’ua riro ’ei tāmāhanahanara’a nō Adamu ’e nō Eva i te ha’amana’ora’a i te hō’ē mea : ’Ua ravehia teie mau parau fafau—te hō’ē ’ohipa mo’a ’e te mure ’ore tei pi’ihia te mau fafaura’a. ’Ua fafau rāua e ha’apa’o i te parau a te Metua i te mau mahana ato’a o tō rāua orara’a, ’e ’ua fafau mai te Metua e hōro’a mai i te hō’ē Fa’aora ’o tē tāmarū i tō rāua māuiui ’e tō rāua ’oto, e tāra’e i tā rāua mau hape, ’e e fa’aho’i ia rāua ma te pāruruhia i mua i tōna aro.

Nāhea rā teie nā ta’ata tāhuti e ha’amana’o ai i te mea tā rāua i fafau ? Nāhea rāua e nehenehe ai e vai ara noa i tō rāua vaira’a fifi—ma te ara noa i te mau taime ato’a, i te ao ’e te pō ?

E fa’aha’amana’ora’a i tā rāua mau fafaura’a

Nō taua huru fa’aha’amana’ora’a, ’ua hōro’a ’oia ia rāua i te « ’ahu ’iri ’ānimara ». ’Auē ïa tao’a hōro’a ’e i te taime tano. I muri a’e i tō rāua ’amura’a i te hotu i rāhuihia, ’ua ’ite Adamu ’e ’o Eva fātata i te reira iho taime ē, ’ua vai taha’a noa rāua. Nā mua atu, ’ua tāmata rāua i te tāpo’i i tō rāua vai-taha’a-ra’a i te mau rau’ere suke. I muri iho, nō tō rāua mata’u e’ita te reira e nava’i, ’ua tāmata rāua i te huna ia rāua i te Fatu. (’Ua riro teie ravera’a ma’ama’a ’ei tāpa’o fa’a’ite ’ua tae mai te tāhuti !) Mai te reira mai ā taime ’e tae roa mai i teie mahana, ’ua ani manihini mai te hō’ē Metua here i tāna mau tamari’i ’ia haere mai i rāpae i tō rātou mau vāhi tāpunira’a, ’ia haere mai iāna ra. ’E mai te mau ’ahu ’iri ’ānimara nā mua atu ’e te mau huru ’ahu mai ā, i roto i tōna aroha, ’aita ’oia i vaiiho noa ia tātou ’ia vai taha’a noa, ’ua fa’a’ahu rā ’oia i te feiā ha’apa’o i te hō’ē « ’ahu nō te parauti’a », e fa’aha’amana’ora’a i tā tātou mau parau fafau ’e mau fafaura’a. E taipe teie mau « ’ahu roto o te fa’aorara’a » i te hōro’a rahi roa a’e i te mau hōro’a ato’a, te tāra’ehara a Iesu Mesia.

Te ’ahu roto ’o te hō’ē ïa taipe o te Fa’aora

’Oia mau, teie mau mana’o ato’a nō ni’a ia Adamu ’e ’o Eva ’e te mau fafaura’a ’e te mau ’ahu, e ’ere noa ïa i te hō’ē fa’a’eta’etara’a i te pae ferurira’a. E ’ere i te mea fifi roa ’ia feruri i te mea tā Adamu ’e Eva i putapū, nō te mea tē fa’aruru ato’a nei tātou i te mau fifi o teie nei ao hi’a. ’Ua fa’ata’a-’ē-ato’a-hia tātou i te aro o te Atua, ’e tē fa’aātea rahi nei tātou ia tātou iho i te mau taime ato’a ’a ’ōfati ai tātou i te ture. Mai ia Adamu ’e ’o Eva, ’ua hōro’ahia mai ia tātou teie ā Fa’aora, ’o Iesu Mesia nō Nazareta, te Alepha ’e te ’Omega, te Tamaiti a te Atua ora. Mai ia Adamu ’e ’o Eva, ’ua rave tātou i te mau fafaura’a ’e te Atua. ’E, ’ei tuha’a nō te ’ōro’a hiero, ’ua hōro’ahia mai ia tātou hō’ē fa’aha’amana’ora’a mo’a i te pae tino o teie mau fafaura’a—hō’ē taipe o te Fa’aora iho. I roto i tō tātou tau tu’ura’a, ’ua pi’ihia te reira te ’ahu roto nō te autahu’ara’a mo’a.

Fa’ahitira’a parau a te Peresidenira’a Mātāmua nō ni’a i te ’ahu roto

Fa’ahu’ahu’ara’a nō roto mai The Second Coming, nā Harry Anderson

Tē fa’aha’amana’o nei te ’ahu roto o te autahu’ara’a mo’a ia tātou i te pāruru i roto i te hiero, ’e teie pāruru e taipe ïa o Iesu Mesia. ’Ia ’ō’omo ana’e ’outou i tō ’outou ’ahu roto, tē ’ō’omo nei ’outou i te hō’ē taipe mo’a o Iesu Mesia.

Te ’ō’omora’a i te reira ’o te fa’a’itera’a ’ōrāpae ïa nō tā ’outou parau fafau ’ōroto ’ia pe’e iāna. E fa’aha’amana’ora’a ato’a te ’ahu roto nō tā ’outou mau fafaura’a i te hiero. E ti’a ia ’outou e ’ō’omo i te ’ahu roto i te ao ’e te pō i te roara’a o tō ’outou orara’a. I te taime e tātarahia ai te reira nō te mau ’ātivite e ’ere i te mea tano roa ’ia ’ō’omo i te ’ahu roto, ’a ’imi i te rāve’a ’ia ’ō’omo fa’ahou i te reira i muri noa mai e ti’a ai. ’A ha’apa’o ai ’outou i tā ’outou mau fafaura’a, ’oia ato’a te fana’ora’a mo’a ’ia ’ō’omo i te ’ahu roto mai tei fa’ahitihia i roto i te mau ’ōro’a fa’aineinera’a, e roa’a ia ’outou i te fa’ari’ira’a rahi atu i te aroha o te Fa’aora, te pārurura’a, te pūai ’e te mana.

Tē ’ō’omo nei tātou i teie ’ahu roto i raro a’e i tō tātou ’ahu nō rāpae. Noa atu te huru o tā’u mau hōpoi’a, noa atu te huru o te ti’ara’a tā’u e rave i roto i te orara’a, noa atu te huru o te mau ’ohipa o te orara’a i te mau mahana ato’a, i raro a’e i teie mau mea ato’a tē vai nei tā’u mau fafaura’a—i te mau taime ato’a ’e a muri noa atu. I raro a’e i teie mau mea atoa tē vai nei taua mau parau fafau mo’a ra ’o tā’u e tāpe’a māite nei. ’Eiaha te ’ahu roto ’ia ha’amahorahia ’aore rā ’ia fa’a’itehia i mua i te ta’ata, ’aita ato’a tā’u mau fafaura’a. Tē tāpe’a piri nei rā vau te reira iā’u—ma te fātata roa a’e e ti’a ai iā’u. E mea faufa’a rahi roa a’e te reira nō’u iho ’e te mo’a hanahana roa a’e.

Ma te ha’amana’ora’a i teie mau fafaura’a, i teie mau parau fafau o nā pae e piti, tē ’ō’omo nei tātou i te ’ahu roto i te roara’a o tō tātou orara’a. Tē fa’a’ite nei teie ravera’a i tō tātou hina’aro ’ia riro te Fa’aora ’ei fa’aurura’a tāmau i roto i tō tātou orara’a. Te tahi atu mau taipe herehia mea tāmau ïa. E bāpetizohia tātou hō’ē taime i roto i tō tātou orara’a. Tē rave nei tātou i te ’ōro’a mo’a hō’ē taime i te hepetoma. Tē haere nei tātou i te hiero i te taime e nehenehe ai tātou. ’Āre’a rā te ’ahu roto o te autahu’ara’a mo’a e mea ta’a ’ē ïa : teie taipe e fa’atura tātou i te reira i te ao ’e te pō.

’E mai te reira te huru o te mau fafaura’a—’aita te reira e tu’uhia i te hiti nō te fa’a’ōhie ’aore rā nō te tau’a ’ore ’e ’eiaha ’ia fa’ahuru-’ē-hia nō te fa’atano i te huru ’e te mau peu o te tōtaiete. I roto i te orara’a o te hō’ē pipi a Iesu Mesia, e ti’a i te mau haere’a o te ao nei ’ia fa’ahuru-’ē-hia nō te ’āna’i i ni’a i tā tātou mau fafaura’a, ’eiaha rā i ni’a i te tahi atu rāve’a.

’Ia ’ō’omo ana’e tātou i te ’ahu roto, mai tā te Peresidenira’a Mātāmua i ha’api’i, tē ’ō’omo nei tātou i te hō’ē taipe mo’a o Iesu Mesia. I roto i teie fa’auera’a, nō te aha tātou e ’imi ai i te ’ōtohera’a nō te tātara i teie taipe ? Nō te aha tātou e fa’a’ere ai ia tātou i te parau fafau nō te mana, te pārurura’a ’e te aroha ’o tā te ’ahu roto e mono nei ? ’Ia hurituahia, te mau taime ato’a e ti’a ia tātou ’ia ’īriti i te ’ahu roto nō te hō’ē taime poto, e ti’a ia tātou ’ia hina’aro vitiviti e ’ō’omo fa’ahou i te reira i te taime iho ā e ti’a ai, nō te mea tē ha’amana’o nei tātou i te hō’ē ā taime i te mau parau fafau ’e te mau ’ati ’o tē hōro’a i te aura’a nō tā tātou mau fafaura’a. E ha’amana’o iho ā ra tātou i te sātauro ’e te mēnema ta’ata ’ore o te Mesia.

E parau paha vetahi ē, « e rāve’a ’ē atu tā’u nō te ha’amana’o ia Iesu ». ’E e pāhono atu vau, e mea fa’ahiahia mau ïa. Rahi noa atu ā, e maita’i a’e ïa. E feruri ana’e na tātou pā’āto’a i te mau rāve’a ato’a e ti’a ai, nō te ha’apa’o i tā tātou fafaura’a ’ia « ha’amana’o noa iāna ». Terā rā ’ia nā-reira-hia, e mea parauti’a ’ore te tau’a-’ore-ra’a ma te hina’aro mau i te fa’aha’amana’ora’a tā te Fatu iho i hōro’a i te feiā tei fa’ari’i i te ’ōro’a hiero, te ’ahu roto o te autahu’ara’a mo’a.

E mea faufa’a roa Iesu Mesia ’e tāna ’evanelia nō’u. Tō’u mau tīa’ira’a ’e tō’u mau hina’aro mure ’ore ato’a, te mau mea ato’a tā’u e ha’afaufa’a maita’i roa nei, tē vai nei i ni’a iāna. ’O ’oia « te papa nō tō’u fa’aorara’a », tō’u ’ē’a nō te tae atu i tō’u Metua i te ao ra, tō’u ana’e ’ē’a nō te ho’i atu i te mea tā’u i roa’a nā mua a’e nei ’e ’o tā’u e hina’aro i teienei e fa’ari’i fa’ahou ā, ’e hau fa’ahou atu ā. Tāna hōro’a nō tātou ’o te hōro’a rahi roa a’e ’o tā’u i ’ore a’e nei i fa’ari’i, te hōro’a rahi roa a’e i ’ore na i pupuhia—tei ho’ohia i te māuiui fāito ’ore, tei pūharahia i te hō’ē nūmera hope ’ore, tei hōro’ahia ma te here hope ’ore. Te mau rā’au taratara ’e te mau tātarāmoa, te māuiui ’e te ahoaho, te ’oto ’e te hara o teie nei ao hi’a, ’ua « horomi’ihia ïa i roto i te Mesia ».

Nō reira ’ua ’ō’omo vau i te ’ahu roto o te autahu’ara’a mo’a—i te mau ao ato’a ’e i te mau pō ato’a ma te ti’a, mai te taime ā ’a fa’ari’i ai au i tō’u ’ōro’a hiero a 64 matahiti i teienei, i te 19ra’a o tō’u matahiti—nō te mea ’ua here au iāna ’e nō te mea ’ua hina’aro vau i te mau parau fafau tā te reira e mono nei.

Te mau uira’a nō ni’a i te ’ō’omora’a i te ’ahu roto ?

E tai’o paha vetahi o ’outou i teie parau pāpa’i ma te ti’aturi e pāhono atu vau i te hō’ē uira’a ta’a ’ē nō ni’a i te ’ahu roto. E nehenehe ’outou e ti’aturi i te hō’ē « tē parau mai ra Iehova »—’aore rā hō’ē « tē nā ’ō mai ra tāna mau tāvini »—i ni’a i te hō’ē tumu parau faufa’a rahi roa nō ’outou. E nehenehe tā ’outou uira’a e tupu mai nā roto mai i te hō’ē tupura’a o te ta’ata iho e tū’ati i ni’a i te ’ohipa, te fa’a’eta’etara’a tino, te ihomā [hygiene], te ’ahureva [climat], te mōteti [pudeur], te mau vāhi haumitira’a, ’aore rā ’oia ato’a te fifi i te pae ea.

E nehenehe vetahi mau pāhonora’a nō teie mau huru uira’a e ’itehia i ni’a temples.ChurchofJesusChrist.org ’e i roto i te tuha’a 38.5 nō te Buka arata’i rahi. E nehenehe e fārerei atu i te mau melo o te ’utuāfare ’e te feiā fa’atere e ti’aturihia nō te hō’ē uira’a a te ta’ata iho. Tē vai nei rā hō’ē arata’ira’a pāpū maita’i tei hōro’ahia i roto i te mau ’ōro’a fa’aineinera’a, ’e tē vai nei i te mau taime ato’a ’e a muri noa atu tō ’outou Metua i te ao ra, tei ’ite maita’i ’e tei here ia ’outou ’e tei māramarama i te mau mea ato’a nō tō ’outou huru orara’a. E ’oa’oa roa ïa ’oia mai te mea e ui ’outou iho i teie mau uira’a iāna.

’Eiaha ’ia ta’a-’ore-hia. Mai te mea e ’imi ’outou i te arata’ira’a hanahana, e’ita te Vārua e fa’auru ia ’outou ’ia rave iti a’e i te pe’era’a i te arata’ira’a tei fa’ari’ihia i roto i te hiero ’e te parau a’o tohu tei fa’a’itehia mai e te Peresidenira’a Mātāmua i roto i tā rātou fa’ahitira’a parau hope’a. E’ita te hō’ē Metua here e tauturu ia ’outou ’ia feruri e rave iti a’e i tā ’outou e nehenehe, nō te ’āna’i atu i tāna mau fa’aturera’a o te pūpūra’a ’e te peu mā, ’o tē ha’amaita’i ia ’outou i teienei ’e a muri noa atu. Tē māramarama ānei rā ’oia i tā ’outou mau uira’a ’e e tauturu ānei ’oia ia ’outou ’ia fa’ari’i i te mau ha’amaita’ira’a o te fa’aturara’a i te ’ahu roto ’e te ha’apa’ora’a i tā ’outou mau fafaura’a ? ’Ē ! E ti’a ato’a ānei ia ’outou ’ia fārerei atu i te feiā tōro’a i te pae rapa’aura’a ’aravihi mai te mea e hina’arohia ? ’Oia ïa ! E ti’a ānei ia ’outou ’ia tāu’a ’ore i te mana’o mātauhia ’aore rā ’ia hi’o i’ō atu i te tāpa’o ? Tē pure nei au ’eiaha ’outou e nā reira.

E’ita tā’u e nehenehe e pāhono i tā ’outou mau uira’a ato’a. E’ita tā’u iho e nehenehe e pāhono i te mau uira’a ato’a. Terā rā, e nehenehe tā’u, ’ei ’āpōsetolo nā te Fatu Iesu Mesia, e fafau ia ’outou i te tauturu a te hō’ē Atua here, ’o tē ’imi nei i tō ’outou manuiara’a ’e tā ’outou mau ha’amaita’ira’a ato’a, nā roto i te mau rāve’a e’ita e ti’a ia ’outou ’ia hāro’aro’a ’aore rā ’ia ’ite i teienei, ’a ha’apa’o ai ’outou i te mau fafaura’a tā ’outou i rave ’e ’ōna.