Nō te mau metua

Māuruuru nō te hō’ē peropheta

Tē fa’ari’i nei te peresideni Russell M. Nelson i te feiā mo’a i te mau mahana hope’a nei i Kona, Hawaii, i te 16 nō Mē 2019, i roto i tōna tere ’ohipa tāvinira’a i Patifita.

E te mau metua here ē,

I teie ’āva’e tē fa’ahanahana nei te peresideni Russell M. Nelson i te 100ra’a ’o tōna mahana fānaura’a. Tē ha’apāpū nei te mau parau pāpa’i i roto i teie ve’a e nāhea ’oia ’e te tahi atu mau peropheta i te fa’afāriu ia tātou i ni’a ia Iesu Mesia.

Hō’ē rāve’a e nehenehe ai te feiā ’āpī e pe’e i te peropheta ’o te pāhonora’a ïa i tāna anira’a ’ia haere tāmau i te séminaire ’e ’ia tai’o tāmau noa i te mau pāpa’ira’a mo’a i te mau mahana ato’a. ’Ua parau fafau mai ’oia i te mau ha’amaita’ira’a fa’ahiahia nō te feiā e rave, ’oia ato’a te ha’api’ira’a mai ’ia fāri’i i te heheura’a nō te ta’ata iho, te ’itera’a mai i te mau pāhonora’a i te mau uira’a fifi o te orara’a, ’e te ha’api’ira’a mai ’ia ’ite i te Fa’aora. ’Ua fa’aro’o ānei tā ’outou mau tamari’i ’āpī i teie anira’a a te peropheta ? ’A haere i roto te seminary.ChurchofJesusChrist.org nō te ’ite mai i te tahi atu mau ha’amāramaramara’a.

Mau ’āparaura’a ’evanelia

Pure nō vetahi ’ē

’Ua ’ite ānei ’outou ’aore rā, tā ’outou mau tamari’i i te hō’ē ta’ata e fa’aruru nei i te hō’ē tau fifi ? ’A pe’e i te hi’ora’a o Elder Dieter F. Uchtdorf e tāna vahine ’o Harriet, i te purera’a ’ei ’utuāfare nō te hō’ē ta’ata (hi’o ’api 4). ’A ’āparau ’e tā ’outou mau tamari’i i te faufa’a rahi nō te ti’aturira’a i te hina’aro o te Atua, noa atu ’aita te ta’ata nōna ’outou e pure ai e ’ite ’oi’oi mai i te mau ha’amaita’ira’a.

Ha’apa’o i te mau fa’auera’a

’Ua ani Elder Isaac K. Morrison i te peresideni Nelson i te hō’ē parau poro’i nō tāna vahine ’e tāna mau tamari’i iho. Te pāhonora’a a te peropheta, ’oia ho’i, ’a « ha’apa’o i te mau fa’auera’a. » (Hi’o ’api 20.) E nehenehe ’outou e ui i tā ’outou mau tamari’i : Nāhea tā ’outou mau mā’itira’a e ta’a ’ē ai ’āhani e pārahi mai te peropheta i te ’aira’amā’a ’e ’o ’outou, ’e ’a ani mai ai ia ’outou ’ia ha’apa’o i te mau fa’auera’a ?

Pe’e i te peropheta

E fa’ahanahana te peresideni Nelson i te 100ra’a o tōna matahiti i teie ’āva’e ! Tē fa’a’ite nei te peresideni Dallin H. Oaks i te tahi o te mau ha’api’ira’a tāna i ha’api’i mai nā roto mai i te peropheta (hi’o ’api 12). E aha tā tā ’outou mau tamari’i i ha’api’i mai nā roto mai i te peropheta ? Tē vai ra ānei hō’ē a’ora’a ’aore rā hō’ē purera’a ta’a ’ē tei ha’aputapū ia rātou ? ’A fa’a’ite mai i tō ’outou mau mana’o. E nehenehe ’outou e māta’ita’i i te hō’ē parau poro’i video mai roto mai iāna.

Fa’a’ana’anataera’a ’utuāfare a te Mai, pe’e mai

Fa’aro’o i te reo o te Atua

3 Nephi 11:5

I roto te 3 Nephi 11, tē tai’o nei tātou nāhea te mau ’āti Nephi i te ’orera’a e fa’aro’o i te reo o te Atua, ē tae roa i te taime ’a fāriu ai rātou i tō rātou mata i ni’a i te reo ’e ’a ’īriti ai i tō rātou tari’a.

1. ’A ti’a i mua i te hō’ē ta’ata. ’A fa’ahuri ia ’oe ’ia ’ore ’ore ’ōrua ’ia hi’o i te tahi ’e te tahi.

2. Hō’ē ta’ata ’ei ta’ata a’o ’e te tahi atu ta’ata ’ei ta’ata fa’aro’o ïa. ’A ani i te ta’ata fa’aro’o ’ia ’ōroi i tōna tari’a.

3. E ani i te ta’ata a’o ’ia fa’ahiti i te hō’ē pereota ma te reo marū, mai teie « Tē tāmata nei au ’ia riro mai ia Iesu ».

4. ’A hi’o na ē, e nehenehe ānei te ta’ata fa’aro’o e parau i te mea tā te ta’ata a’o e parau ra.

5. I teienei, e ’īriti te ta’ata fa’aro’o i te ’ōroi o tōna tari’a ’e e fāriu atu i ni’a i te ta’ata a’o.

6. E fa’ahiti fa’ahou te ta’ata a’o i te reira ā pereota.

’Āparaura’a : E mea ’ōhie ānei ’ia fa’aro’o i te reo tei mua ana’e te ta’ata fa’aro’o i te ta’ata a’o ? ’A tai’o te 3 Nephi 11:5. Nāhea ’outou ’ia fāriu atu i tō ’outou mata ’e ’ia ’īriti i tō ’outou tari’a i te reo o te Atua i teie mahana ?

Nō roto mai i te ve’a Nō te pūai o te feiā ’āpī

’A haere nā roto i te māramarama o te Fa’aora

Ha’api’i mai nā roto mai ia Elder Dieter F. Uchtdorf, nāhea te mana nō te fa’aora ’e te ha’apūaira’a o te Fa’aora e nehenehe ai e tātara mai ia ’outou i rāpae i te pōiri, ’a tātarahapa ai ’outou.

E ea maita’i a’e i te pae ferurira’a

Tē fa’a’ite nei te tuahine Tamara W. Runia i te tahi mau mana’o nō te ha’amaita’i ’e nō te tāpe’a i te hō’ē ea maita’i i te pae ferurira’a ’e nō te fa’aea fātata noa i te Vārua.

E ’ere i te mea tu’iro’o noa, e mea tohu rā

Mai tā Samuela te ’āti Lamana i ha’api’i, e ’ere te mau peropheta i te mea tu’iro’o noa, tē ha’api’i nei rā rātou ia tātou i te mea tā tātou e ti’a ’ia fa’aro’o.

Nō roto mai i te ve’a Hoa

Ha’api’i i te tātarahapa

’A tai’o i te hō’ē parau poro’i a te peresideni Dallin H. Oaks nō te tauturu i tā ’outou mau tamari’i ’ia ha’api’i rahi mai nō ni’a i te tātarahapara’a.

’Ia ora nā nā Timipāpue mai !

Fārerei mai i tō mātou hoa ia Sariah nō Timipāpue mai ’e ’a ha’api’i mai nāhea ’oia i te pe’e ia Iesu Mesia.

Tauturu ’e te Mai, pe’e mai

’A ’ite mai i te mau ’ohipara’a ’ārearea i te mau hepetoma ato’a, nō te tauturu i tō ’outou ’utuāfare ’ia ha’api’i mai nā roto mai i te Buka a Moromona.

Te ferurira’a ’e te ’ā’au mā

I roto i te tuha’a nā te mau tamari’i pa’ari’i a’e, ’a ’ite mai i te mau ā’amu ’e te mau mātēria e tano nō te mau tamari’i nō ni’a i te ea i te pae ferurira’a.