Parau poro’i a te feiā fa’atere o te ārea
’A ho’i ’e ’a tāmata fa’ahou
’Ua ha’api’i mai te Fatu ē, e pure tātou i te Metua nā roto i tōna i’oa. ’Ua parau ato’a ’oia ē :
« ’O vau te vine mau, ’e ’o tā’u Metua te fa’a’apu. ’A ’ati mai iā’u ’e nā’u e ’ati atu ia ’outou. ’E te mau ’āma’a hotu ’ore ato’a i roto iā’u nei ra, nāna ïa e tāpū ’ē atu. Mai te ’āma’a ’e’ita e hotu noa iāna ana’e ra, ’ia ’ore ’ia ’ati mai i te vine ra, e ’ore ato’a ’outou ’ia ’ore ’ia ’ati mai iā’u ra.
« ’O vau te vine, ’o ’outou te ’āma’a : ’O tē ’ati mai iā’u ra ’e ’o tē ’ati atu iāna ra, ’oia tē hotu rahi : i ta’a ’ē atu ’outou iā’u ra, ’aore roa ïa e mea e ti’a ia ’outou. I ’ati mai ’outou iā’u ra, ’e ’ia vai maīte tā’u parau i roto ia ’outou na, e ani noa ïa ’outou i tā ’outou i hina’aro ra, ’e e hōro’ahia ïa ia ’outou ».
I tō’u ’āpīra’a i Tona, ’ua fa’ahiahia vau i te ’ā’amu o te Tuku Fonua, e ’ohipa ta’a ’ē roa tei tupu i Pouono, i Vava’u, i te matahiti 1839. ’Ua riro ïa ’ei tāpa’o nō te hopera’a te mau tama’i fenua ’e te ha’amaura’a o te fa’aterera’a a Siaosi Taufa’āhau Tupou I. I roto i te pure Tuku Fonua, ’ua fa’ariro ’o Siaosi Taufaʻāhau Tupou I ia Tona ’ei « Fenua hōro’ahia i te Atua ». ’Ua tāhō’ē teie ’ohipa ta’a ’ē roa i te mau ta’ata Tona ’ei ta’ata Tona ’e ’ei keretiano.
E ’itehia te mau parau tumu keretetiano i te mau vāhi ta’ata ’e i te mau vāhi ’ōmo’e, ’e e ’ite ta’a-’ē-hia te reira i te sābati, te mahana fa’afa’aeara’a. Tae roa atu i te hīmene ’āi’a tōna, e pure ato’a i te Atua, i te anira’a i tāna pārurura’a. I teie mahana, tē ’ite nei au i te ha’amaita’ira’a maoti te fa’aro’o ’e te ti’aturi o te Ari’i Siaosi Taufa’ahau Tupou 1 i te Atua. ’Ua riro te Tuku Fonua ’ei ’ōmuara’a nō tō te mau ta’ata Tona ’imira’a i te hina’aro o te Atua i roto i te mau mea ato’a tā mātou e rave. ’Ua rau te huru te reira e fa’ariro nei ia mātou ’ei mea ta’a ’ē, ’e e mea faufa’a rahi te fa’ati’a-fa’ahou-ra’a i teie ’ā’amu i te mau u’i a muri a’e.
I roto i nā 18 matahiti mātāmua o tō’u orara’a, ’ua pe’e au i tō’u nā metua ’e i tō’u nā metua pa’ari i te fare purera’a i te mau sābati ato’a. I tō’u ’itera’a i tō rātou ’oa’oa, ’ua fa’atupu te reira i te hina’aro i roto i tō’u ’ā’au ’ia ’ite ato’a tā’u mau tamari’i i te ’oa’oa nō te haerera’a i te purera’a ’e te ’āparaura’a i te Metua i te ao ra. Nō tō’u pa’arira’a i roto i te ’Ēkālesia Ti’amā nō Tona, ’ua ’ite au i te hina’aro tu’utu’u ’ore o te mau ’orometua ’ia ha’api’i ia mātou ’ia tu’u tāmau noa i te Atua nā mua roa i roto i tō mātou orara’a. ’Ua hōro’a mai te reira i te mau ha’amaita’ira’a rahi iā’u. ’Ua reva mātou i Auckland, Niuterani, nō te ’imi i te hō’ē orara’a maita’i a’e, ma te ’ite ’ore ē, tē fa’aineine ra te Atua ia mātou nō te hō’ē ’opuara’a rahi a’e.
I te matahiti 2019, hō’ē o te mau misiōnare tei ’ite ’ia mātou ’e tei ani mai ia mātou ’ia pe’e i tō tātou Fa’aora ’o Iesu Mesia, ’ua fa’ati’a mai ’oia i te hō’ē ’ā’amu i tā’u vahine ’o Lupe ’e ’o vau. ’Ua parau mai ’oia ē, i te matahiti 1990, ’ua tūturi ’oia ’e tōna hoa nō te pure, nō te ’imi i te hina’aro o te Fatu. ’Ua arata’ihia rāua i roto i te hō’ē purūmu ta’a ’ē i reira rāua i te pātōtōra’a i te mau ’ōpani ato’a, ’aita rā hō’ē ta’ata i hina’aro i te fa’aro’o i tā rāua parau poro’i.
’A fa’aineine ai rāua nō te haere ’ē atu, ’ua fa’ari’i rāua i te mana’o ’ia ho’i ’e ’ia tāmata fa’ahou. Ma te fa’aro’o, ’ua ha’amata rāua i te pātōtō i ni’a i taua mau ’ōpani nei ā nō nā mua atu, ’e i tō rāua taera’a i te ono o te fare, tē pārahi ra vau i rāpae. Mea nā reira te ha’amatara’a tō’u ’itera’a i te ’evanelia a Iesu Mesia.
’Ua ha’api’i mai teie nā misiōnare nehenehe iā’u nō ni’a i te fa’anahora’a nō te ’oa’oa a te Metua i te ao ra, nō ni’a i te ’ōrama mātāmua, ’e te Buka a Moromona. ’Ua ha’api’i mai rāua e mea nāhea tō Iosepha Semita ’imira’a ’ia ’ite e aha te ’Ēkālesia tāna e ’āmui atu, ’ua tai’o ’oia i te buka a Iakobo ’e ’ua pure i te Atua, ma te fa’aro’o ē, e pāhonohia tāna pure.
’Ua fa’a’ite nā misiōnare i te ’itera’a pāpū ē, ’ei pāhonora’a i tāna pure, ’ua fā mai te Atua te Metua ’e tāna tamaiti here ’o Iesu Mesia ia Iosepha Semita, ’ua pi’ihia ’oia ’ia riro ’ei peropheta, ’e ’ua fa’aho’ihia mai te ’evanelia a Iesu Mesia nā roto iāna.
E mau mea ’āpī ana’e teie nō’u, terā rā ’ua fafau mai rāua ē, e nehenehe ’o vau iho e ’ite ē, ’ua tupu mau te reira. ’Ua hōro’a mai rāua i te hō’ē Buka a Moromona ’ei tao’a hōro’a nā’u, ma te ani mai ’ia tai’o, ’ia feruri, ’e ’ia fa’a’ohipa i te anira’a manihini a Moroni ’ia ani i te Atua e parau mau ānei te reira buka.
I tō rāua ho’ira’a mai e piti mahana i muri iho, ’ua fa’ata’a vau ia rāua ē, i muri a’e i tō’u tai’ora’a i te ’ōmuara’a, te ’itera’a pāpū o te mau ’ite, ’e te ’ā’amu o te Mesia i te fārereira’a i te ta’ata i roto i te 3 Nephi, ’ua tāparu vau i te Atua nō te ’ite ē, e parau mau ānei te reira. ’Ua ’ite au i te māhanahana nā ni’a i tō’u tino tā’āto’a ’aita rā vau i tā’a ē, e aha te reira. ’Ua ha’api’i mai ra nā elders iā’u ē, tē fa’a’ite pāpū ra te Vārua Maita’i i tō’u vārua, nā te reira i fa’atupu i te ’oa’oa i roto i tō’u ’ā’au. ’Ua ’āmui mai tō’u metua vahine ’e nā teina taea’e e toru i tā mātou ha’api’ira’a i muri iho, ’e ’ua bāpetizohia mātou pā’āto’a i roto i te ’Ēkālesia a Iesu Mesia i te Feiā Mo’a i te mau Mahana Hope’a nei.
Ma te roimata ’oa’oa ’ua fa’a’ite teie misiōnare tahito ’o Tomasi Takau, i te ’ohipa i tupu i ni’a iāna ’a 30 matahiti i ma’iri, ’e i teienei, tē fāna’o nei ’oia i te ha’amaita’ira’a ’ia riro ’ei ’ite nō te hotu o tāna ’ohipa. Maoti te mau pure, te fa’aro’o ’e te itoito ’o Elder Tomasi Takau ’e tōna hoa, ’o Elder Johnson, ’ua tāvini au i tā’u misiōni i Wellington, Niuterani, mai te matahiti 1991 tae atu i te matahiti 1993, i muri iho ’ua fārerei ’e ’ua fa’aipoipo vau i tā’u vahine ’o Lupe i te hiero nō Hamilton (Niutirani), ’e i teienei, e maha tamāroa ’e hō’ē tamāhine tā māua, e piti mo’otua ’e e tae mai te toru i teie matahiti.
’Auē tō māua ’o Lupe ’oa’oa i te fārereira’a i te tamaiti a Tomasi Takau, tē tāvini nei i teie nei i tāna misiōni i roto i te Bāsileia nō Tona. Ma te hi’o i roto i te mata o te taure’are’a ra ia Elder Takau, ’ua ha’amāuruuru vau i tōna metua tāne nō te hōpoira’a mai i te ’oa’oa o te ’evanelia i roto i tō’u orara’a ’e i te purera’a ma te ’ā’au tae ’e tōna hoa ’ia ’ite i te hina’aro ’o te Atua i te roara’a o terā mau maitahiti i ma’iri, ’e tē ha’amāuruuru ato’a nei au i teie taure’are’a nō te pāhonora’a i te anira’a a te peresideni Russell M. Nelson i te mau taure’are’a tamāroa ato’a ’ia tāvini i te hō’ē misiōni. E faufa’a rahi tō te mau vārua ta’ata i tō te Atua hi’ora’a mai.
’Ua taui tō’u orara’a nō te mea ’ua roa’a i nā misiōnare e piti te itoito ’ia fa’aha’eha’a i mua i te hina’aro o te Fatu ’e ’ia haere fa’ahou nō te piti o te taime’. ’Ua ’ite au e fa’aro’o ’e e pāhono te Metua i te ao ra i te mau pure a tāna mau tamari’i. Tē māuruuru nei au nō tō’u ti’ara’a melo i roto i te ’Ēkālesia a Iesu Mesia i te Feiā Mo’a i te mau Mahana Hope’a nei, ’e ’ua ’ite au ē, tē arata’ihia nei tātou nā te hō’ē peropheta ora a te Atua. ’O Iesu Mesia te Fa’aora ’e te Tāra’ehara nō tō te ao nei. E mata na tātou i te tā’ati ia tātou iho i ni’a iāna, ’oia tei mau i te mau mana ato’a nō te fa’aora, nō te fa’a’ore i te hara, ’e nō te ha’amaita’i i tō tātou orara’a, nā roto i te i’oa o Iesu Mesia. ’Āmene.