« ’Eiaha fa’ahou te mo’emo’e : 7 rāve’a nō te fa’atupu i te tā’amura’a », Liahona, Tetepa 2024.

Te ruhiruhiāra’a i roto te ha’apa’o maita’i

’Eiaha fa’ahou te mo’emo’e : 7 rāve’a nō te fa’atupu i te tā’amura’a

Nā Julianne Holt-Lunstad

’Orometua ha’api’i nō te ihiferurira’a, Fare ha’api’ira’a tuatoru Brigham Young

Te mo’emo’era’a ’o te hō’ē ïa tāmatara’a ’o tē nehenehe e fa’aoroma’i ma te tahi tauto’ora’a, te pūai i te pae ’āehuehu ’e te tauturu a te Fa’aora.

e piti ta’ata e haere ra nā pīha’i iho i te tahi ’e te tahi

E ’ite mai iho ā tātou pā’āto’a i te mo’emo’era’a i te tahi taime. E nehenehe te mau nino’a mana’o mo’emo’e i te tahi taime e riro ’ei mea maita’i ’e te manuia, te hō’ē fa’a’itera’a e tītauhia ia tātou nō te patu i te mau tā’amura’a pūai a’e. Terā rā, pinepine te mo’emo’era’a i te riro ’ei fifi rahi nō te ’oa’oa.

Te ’ōpuara’a nō te oa’oa a te Metua i te ao ra ’o te ha’aputuputura’a ïa ia tātou ’ei ’utuāfare ’e ’ei ’āmuira’a. E tauturu te reira ia tātou ’eiaha noa i roto i tō tātou haerera’a mure ’ore i mua, i roto ato’a rā i tō tātou hina’aro ta’ata ’ia vai i rotopū ia vetahi ’ē, ’ia ’ite tātou tei roto tātou, nō te hōro’a ’e nō te fa’ari’i i te pāturura’a i te pae ’āehuehu. Tē ha’amata nei te ihi i te ’ite i te tū’atira’a tōtiare mai te hō’ē hina’aro ihiora e tū’ati i tō tātou ea ’e tō tātou vai-ora-ra’a.

E hina’aro pae vārua ato’a. E hina’aro tātou i te tahi ’e te tahi nō tō tātou maita’i pae vārua ’e tō tātou tupura’a. ’E te hō’ē ra’i tei ’ī i te mau tā’amura’a mure ’ore ’e te hō’ē mana’o ’oa’oa ta’a ’ē (hi’o Te Ha’api’ira’a Tumu ’e te mau Fafaura’a 130:2).

’A feruri i te mau mana’o i muri nei nō te ’aro i te mo’emo’era’a i roto i tō ’outou orara’a :

’A tūru’i i ni’a i te Fa’aora. ’Ua ’ite maita’i tō ’outou Metua i te ao ra ’e ’o Iesu Mesia i tō ’outou mo’emo’era’a ’e tē hina’aro nei rāua e tauturu. Te ’itera’a ē ’ua ’ite maita’i te Fa’aora i te māuiui o te mo’emo’era’a, e nehenehe e tauturu ia ’outou ’ia ’ite ē, ’ua hāro’aro’a maita’i ’oia i te mea tā ’outou e putapū nei. Te ha’afātatara’a i te Metua i te ao ra ’e i te Fa’aora nā roto i te pure, te ’imi-maita’i-ra’a i te mau pāpa’ira’a mo’a ’e te ha’amorira’a i te sābati ’e i roto i te hiero, e tauturu te reira ia ’outou ’ia ’ite ’aita roa atu ’outou i vai ’ōtahi noa. Mai tā te peresideni Russell M. Nelson i ha’api’i, « Mai te mea tei ni’a te fa’atumura’a o tō tātou orara’a […] ia Iesu Mesia ’e i tāna ’evanelia, ’ei reira te ’oa’oa e tae mai ai noa atu te mea e tupu ra—’aore rā ’aita e tupu ra—i roto i tō tātou orara’a. »
’A fa’ahoa. I te tahi taime e nehenehe te mo’emo’era’a e fa’atupu ia tātou te fē’a’a ē, te ravera’a i te hō’ē tauto’ora’a e tauturu i te fa’aiti mai i tō tātou māuiui. ’A rave i te hō’ē hi’opo’ara’a nō ’outou iho nō te hi’o e ta’ata ti’aturi ’ore ānei ’outou. ’Ia ’imi ana’e ’outou i te auhoara’a, ’a ha’amana’o e mea pinepine e tītauhia ’ia auhoa tātou. Te paraura’a ’ia ora nā i te hō’ē ta’ata tupu, e nehenehe te reira e fa’atupu i te ta’a-’ē-ra’a. ’E te ’imira’a i te mau rāve’a nō te ha’amaita’i i te orara’a o vetahi ’ē ’o tē aro ato’a nei i te mo’emo’era’a, e nehenehe e riro ’ei araira’a pūai roa a’e i te mau araira’a ato’a.
’A patu i ni’a i te mau fa’a’ana’anataera’a ’āmui. ’A ’imi i te mau ta’ata ’e te mau pupu e mau fa’a’ana’anataera’a, e mau hi’ora’a ātea ’e e mau fa’aturera’a tō rātou e tū’ati i tō ’outou. E nehenehe ’outou e ’imi (’aore rā e ’ōpua e fa’atupu !) i te hō’ē pupu tai’ora’a buka, hō’ē pupu tāvinira’a, hō’ē pupu haerera’a nā ni’a te mou’a, hō’ē pupu nō te hīmene, hō’ē pupu nō te pō ahiahi i te fare ’aore rā hō’ē pupu nō te metua ’ōtahi.
Ha’apūai i te mau tā’amura’a e vai ra. Te rahira’a o te ta’ata tē vai ra tō rātou mau tā’amura’a ’e te ’utuāfare, te mau hoa, te mau ta’ata tupu ’e te mau melo nō te pāroita. Te aupurura’a i teie mau tā’amura’a e vai ra e riro ’ei hō’ē vāhi fa’ahiahia nō te ha’amata i te pāto’i i te mo’emo’era’a. E tītau te auhoara’a i te taime nō te patu ’ōhie noa, nō reira ’a fa’a’oroma’i ’ia aupuru ana’e ’outou i te mau tā’amura’a. ’A ha’amana’o e mea faufa’a a’e te maita’i o tō ’outou mau tā’amura’a i te rahira’a o te mau tā’amura’a tā ’outou e aupuru nei.
’A ’imi i te mau rāve’a nō te tāvini ’e nō te fa’a’ite i tō ’outou mau tāreni ’e mau hōro’a pae vārua. Tē vai nei te mau rāve’a fātata roa ’aita e ’ōti’a nō te aupuru ’e nō te tāvini i roto i te ’Ēkālesia, tō tātou mau ’utuāfare ’e te huira’atira. ’Ia ’ite ana’e tātou ē e fa’atupu tā tātou mau tauto’ora’a i te maita’i i ni’a ia vetahi ’ē, e hōro’a mai te reira i te hō’ē aura’a ’e te ’ōpuara’a i roto i tō tātou orara’a. Te nino’a mana’o ē e aura’a tō tō tātou orara’a nō vetahi ’ē, e riro ’ei rāve’a pūai nō te fa’ataiāra’a i mua te mo’emo’era’a.
’A fa’anaho nō te mau taime fifi. E nehenehe te mau mahana fa’aeara’a ’e te mau tai’o mahana faufa’a rahi, mai te tai’o mahana nō te pohera’a o te hō’ē ta’ata tei herehia, e riro ’ei taime fifi. ’A tāmata i te fa’anaho i te mau fa’a’oa’oara’a ’e te mau hoa ’aore rā te ’utuāfare i te reira mau mahana, ’ia ’ore ’outou ’ia vai noa i ni’a i te mau aura’a ’o tā ’outou e hina’aro roa ’ia roa’a mai.
’A ’āmui atu i roto i te ’ohipa hiero ’e te ’ā’amu ’utuāfare. E hō’ē rāve’a pūai te reira nō te putapū i te tāmāhanahana ’e te tā’amura’a. ’Ua parau fafau mai Elder Dale G. Renlund nō te pupu nō te Tino ’Ahuru Ma Piti ’āpōsetolo e rave rahi ha’amaita’ira’a ’o tā tātou e nehenehe e fa’ari’i, ’oia ho’i « e rahi a’e te here ’e te fa’ahiahiara’a nō te mau tupuna ’e te mau feti’i ora, ’ia ’ore tātou ’ia ’ite fa’ahou te mo’emo’era’a ».

Nō te rahira’a o te mau ta’ata, ’ua riro te mo’emo’era’a ’ei hō’ē tāmatara’a ’o tē nehenehe e fa’a’oroma’i ma te tahi tauto’ora’a, te pūai i te pae āehuehu ’e te tauturu a te Fa’aora.