Te reo o te feiā mo’a i te mau mahana hope’a nei

Nā te Vārua i fa’atupu i te ta’a-’ē-ra’a

Nā Lisa Nielsen Young, Carolina Apato’a, Marite

’Ua nehenehe iā’u ’ia putapū i te here o te mau melo o te pāroita, ’a hīmene ai rātou ma te ’ore au e fa’ata’i i te hāmonia.

Fa’ahōho’ara’a nā Katy Dockrill

Tē ora ra mātou i roto i te hō’ē ’oire na’ina’i i Georgia, i Marite, i te taime ’a pohe ai tō’u metua tāne i te 55ra’a o te matahiti. Tē ora ra te rahira’a o te mau melo o tō mātou ’utuāfare i roto i te tahi atu tuha’a fenua. ’Aita roa te 3 200 km e fa’ata’a ra ia mātou i hau atu i te roa i taua tau ra.

’O tā’u tāne te ’episekōpo ’e ’o vau te ta’ata fa’ata’i hāmonia nō tā mātou pāroita iti. Ma te mau mana’o tūreru ’e te horuhoru ato’a nō te tauturura’a i te fa’anahora’a i te hunara’a ma’i, ’ua ’ite ta’a ’ē mai au i te rohirohi i taua sābati ra, ’a tae mai ai te taime nō te hīmene hope’a ’o tā mātou purera’a ’ōro’a : « ’Ei te Atua tātou i teienei i tō tātou nei ta’a-’ē-ra’a » (Te mau hīmene, N°86).

I te ’āfara’a ’o te ’īrava piti, ’ua tāpo’ihia vau e tō’u ’oto. Noa atu te reira, ’ua ha’uti au ē tae roa atu i te hope’a o taua ’īrava ra, terā rā ’ua ruru noa tō’u nā rima ’e tō’u mata tei ’ī roa i te roimata, ’e ’ua fa’aea vau i te ha’uti nō te ’īrava hope’a e toe ra. ’Aita i ti’a iā’u e fa’aea i te ta’i.

’Ua tupu te hō’ē fa’aeara’a poto, ’a ’ite ai te ’āmuira’a ē ’ua fa’aea te hāmonia. I muri iho mai rā, ’ua ha’amata te mau melo o te pāroita i te hīmene ma te hāmonia ’ore. E ’ere te hīmene i te mea maita’i roa. E mea iti roa ho’i mātou. ’Ua fa’atupu rā te Vārua i te ta’a-’ē-ra’a. Nā roto i tō’u roimata ’e te ha’amā, ’ua nehenehe iā’u ’ia putapū i te here o te rahira’a, ’a hīmene noa ai rātou.

’Ei te Atua tātou i teienei

E i tōna ra aroha ;

Nāna tātou e fa’a’amu,

Tae atu ai te fārereira’a mau.

I te hopera’a te hīmene, ’ua tāpe’a mai te ta’ata arata’i hīmene iā’u i roto i tōna nā rima, ’a ta’i noa ai au i te roara’a o te pure hope’a. E rave rahi ta’ata tei tāpiri i pīha’i iho i te hāmonia ma te roimata i tō rātou mata, nō te parau i tō rātou ’oto nō tō’u metua tāne.

I muri a’e, ’ua parau vau i te ta’ata arata’i hīmene e ha’uti au i te piāna i te hunara’a ma’i. E riro paha te reira ’ei mana’o ’ino i muri a’e i te ’ohipa i tupu, e mea au roa rā nā tō’u pāpā ’ia fa’aro’o iā’u ’ia ha’uti i te piāna. ’Ua hina’aro vau e ha’uti nōna. I reira tō’u ’itera’a i tōna ha’afātata-rahi-ra’a mai i te taime o te hīmene hope’a.

’Ua māuruuru roa vau nō te mau hīmene. Tē fa’a’ite pāpū nei au ē, e nehenehe te pehe e ha’api’i ’e e tāmāhanahana ia tātou, ma te rāve’a e ’ore te mau parau e nā reira noa. Mai tā te Peresidenira’a Mātāmua i pāpa’i i roto te parau ha’amāramarama o te buka hīmene, « E tauturu teie mau hīmene […] ’ia fa’aitoito i te feiā paruparu, ’ia tāmāhanahana i tei ’oto, ’e e fa’auru ia tātou ’ia fa’aitoito noa ē tae noa atu i te hope’a. » Tē māuruuru ato’a nei au nō te here o te hō’ē pāroita maita’i, ’a ātea roa ai au i tō’u iho ’utuāfare. ’Oia mau, ’ua ’ite au e fārerei fa’ahou ā māua tō’u metua tāne.