Te reo o te feiā mo’a i te mau mahana hope’a nei

’Ua hōpoi mai te Buka a Moromona i te hau iā’u

Nā Américo Chantre Fernandes, nō Cape Verde

’Ua ’ite a’era vau e hina’arohia te Buka a Moromona nō te taui i tō’u orara’a ’e nō te ha’afātata atu ā iā’u ia Iesu Mesia.

Faʼahōho’araʼa nā Allen Garns

I te hope’a o te matahiti 2013, ’ua ha’amata e piti nā taure’are’a ma te ’ahu ’uo’uo ’e te tā’amu ’arapo’a e haere e fārerei i tō’u tuahine e piti taime i te hepetoma. ’Ite ’oi’oi roa vau ē nō roto mai rāua i te hō’ē ’ēkālēsia. Nō’u, ’aita te rirora’a ’ei melo nō te hō’ē ’ēkālēsia i roto i tā’u mau fa’anahora’a, nō reira ’ua fa’aoti au ’eiaha e paraparau ia rāua.

Te mau taime ato’a e haere mai rāua, ’ua ’imi au i te rāve’a ’eiaha e fa’aea i te fare ’ia tāpae mai rāua. ’Ua haru rā tō’u mana’o i ni’a i te hō’ē mea. E hōpoi noa mai rāua i te hō’ē buka nīnamu. ’Aita vau i ’ite a’enei i te reira nā mua atu, ’e e mea huru ’ē te reira nō’u.

I te hō’ē mahana i roto i te piha fa’afa’aeara’a, ’ua ha’amata tō’u tuahine i te parau mai iā’u nō ni’a i te reira buka. Tae mai nei nā taure’are’a tamāroa e piti. Te fifi rā, ’aita i taimehia nō te tāpuni ia rāua. ’Ua ’ite mai rāua ia māua e te buka nīnamu—te Buka a Moromona—’e ’ua ha’amata i te ani e aha tā’u i ’ite nō ni’a ia Iesu Mesia.

’A fa’aro’o ai au i nā misiōnare mai taua atu mahana ra, ’ua fa’ahiahia roa vau i tō rāua ’ite ’ia fa’atū’ati i tā rāua mau ha’api’ira’a i ni’a i te Buka a Moromona. I te fa’ahope’ara’a, ’ua iti mai te huru-’ē-ra’a o te buka nīnamu nō’u.

’Ua vai noa tō’u fē’a’ara’a rahi nō ni’a i te reira, terā rā ’ua ha’amata vau i te tai’o i te reira. ’Ua ’ite a’era vau e ’ere te Buka a Moromona i te mono nō te Bibilia terā rā e mea hina’arohia ’oia nō te taui i tō’u orara’a ’e nō te ha’afātata atu ā iā’u ia Iesu Mesia. ’Ua ha’api’i mai au ē ’ua fa’atumuhia te Buka a Moromona i ni’a i te Fa’aora. ’Ua tauturu te reira mau ha’api’ira’a iā’u ’ia ’ite ’o vai ’oia ’e ’o vai te Metua i te ao ra.

’Ua tauturu ’oi’oi te Buka a Moromona iā’u ’ia riro ’ei ta’ata maita’i a’e, ’ei pipi mau nā Iesu Mesia. ’Ua tauturu ato’a te reira iā’u ’ia ha’amaita’i i tō’u huru ’a fa’aruru ai au i te mau tāmatara’a i te mau mahana ato’a. Nā roto i tā’u tai’ora’a i te reira, ’ua ’ite au e tauturu te reira i te ta’ata ’ia haere mai i te Mesia ra ’e ’ia ora i te ’evanelia (hi’o Moroni 10:32). E fa’aitoito te reira ia tātou ’ia pe’e i te mau ha’api’ira’a a te Mesia ’e ’ia fa’a’ohipa i te reira i roto i tō tātou orara’a i te mau mahana ato’a. E hōro’a mai te reira ia tātou i te ’itera’a e mau tamāroa ’e e mau tamāhine tātou nā te Atua. E fa’atupu mai te reira i te hau.

I muri a’e e rave rahi hepetoma i te fārereira’a ’e te mau misiōnare ’e te tai’ora’a i te Buka a Moromona, ’ua bāpetizohia vau. Tē fa’a’ite nei au i tō’u ’itera’a pāpū ma tō’u ’ā’au ato’a ē e parau mau te Buka a Moromona ’e e ’āfa’i mai te tai’ora’a i te reira i te tīa’ira’a ’e te māramarama i roto i te mau taime pōiri roa a’e, ma te tauturu ia tātou ’ia fa’ari’i i te here ’e te pārurura’a a te Fatu. Tē māuruuru nei au i te fa’ari’ira’a i te Buka a Moromona i roto i tō’u orara’a.