Te reo o te feiā mo’a i te mau mahana hope’a nei

E ’ohipa maita’i a’e tā te Atua nō tātou

Nā Ronald Baa, Northern Mindanao, Firipino

I te ha’api’ira’a te mau misiōnare iā’u ē e tamari’i au nā te Atua, ’ua ’ite au e mau ha’amaita’ira’a hau atu ā tāna i fa’aherehere nō tō’u ’utuāfare ’e nō’u.

Hōho’a nō roto mai i te ta’ata pāpa’i

’Ua pa’ari au i roto i te hō’ē ’oire iti fa’a’apu i te fenua Firipino. E mea veve tō’u ’utuāfare. I te fenua Firipino, mai te mea ’aita tā ’oe e moni, e’ita ’oe e nehenehe e haere i te fare ha’api’ira’a. Noa atu taua fifi ra, e taure’are’a ’ā’au tae tu’utu’u ’ore tō’u.

’Ua parau vau i tō’u nā metua e hina’aro vau e riro ’ei taote ’aore rā ’ei ’orometua ha’api’i ’aore rā, ’ei ta’ata tōro’a, terā rā i te mau taime ato’a e parau mai rāua iā’u ’ia fa’aea i te moemoeā. ’Aita tā mātou e moni ’ia nehenehe iā’u e haere i te hō’ē fare ha’api’ira’a teitei. ’Ua hina’aro tō’u nā metua ’ia ’oa’oa vau ’e ’eiaha vau ’ia au ’ore i tō’u orara’a.

« E ’ere nō tātou te rirora’a ’ei ta’ata tōro’a », ’ua parau rāua. ’Aita rāua i ti’aturi ē, tē vai ra te hō’ē ’ohipa maita’i a’e tei fa’ahereherehia nō tō mātou ’utuāfare, i te mea tā mātou i roa’a a’ena.

Te reira rā, nō nā mua atu ïa ’a tomo mai ai mātou i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei.

’Ua ora mātou i te ātea ’ē i te mau ’oire ato’a, ’ua ’itehia rā mātou e te mau misiōnare ’e ’ua tāmau noa rātou i te ho’i mai. ’Ua rave rātou e rave rahi fa’atusiara’a nō te ha’api’i i tō’u ’utuāfare, ’ua fa’ataui rā te reira i tō mātou orara’a ē a muri noa atu.

I tō mātou tomora’a mai i roto i te ’Ēkālesia, ’ua ha’api’i mai au ē, e tamari’i au nā te Atua ma te fāito pūai nō te tupu i te rahi ’e nō te ha’api’i mai ’e nō te riro mai (hi’o Mose 1:39 ; « Te ’Utuāfare : E Poro’i i tō te ao nei », Vaira’a buka ’evanelia). Maoti te ’itera’a i te ’evanelia, ’ua ’ite au ’ua tae i te taime nō te fa’ateitei i te fāito o tō’u ’utuāfare. E ’ere fa’ahou mātou i te feiā veve nō te hō’ē ’oire iti—e mau tamaiti ’e e mau tamāhine ti’a-mā mātou nā te Atua i te fana’ora’a i te mau ha’amaita’ira’a ’o tāna i parau fafau i tāna mau pipi ha’apa’o maita’i.

’Ua ’āfa’i mai te mau misiōnare i te ’evanelia i roto i tō’u orara’a, ’ua hōpoi mai te ’evanelia i te pehe i roto i tō’u orara’a, ’e ’ua hōro’a mai te pehe i te moni tauturu ’ia haere i te fare ha’api’ira’a teitei. ’Ua noa’a iā’u te parau tū’ite tuatoru tuha’a rua ’e i muri iho, te hō’ē parau tū’ite nō te hīmene, ’aravihi nō te arata’i i te pupu hīmene. I teienei, tē ha’api’i nei au i te pehe i te fare ha’api’ira’a teitei nō Liceo de Cagayan ’e tē arata’i nei i te Liceo U High School Glee Club. Tē arata’i ato’a nei au i te hō’ē pupu hīmene o te mau melo o te ’Ēkālesia. Tā mātou misiōni ’o te fa’a’itera’a ïa i te parau mau a te Atua nā roto i te pehe.

’Ua hōro’a mai tā’u parau tū’ite nō te fare ha’api’ira’a teitei iā’u i te hō’ē orara’a ’āpī. ’Aita vau i ’ite tei hea vau i teie mahana, ’aita ana’e te ’evanelia a Iesu Mesia.

E ti’a i te ta’ata ato’a ’ia fāna’o i te ha’api’i mai, mai iā’u ē, tē vai nei tōna hō’ē Metua i te ao ra ’e ’ua hōro’a ’oia iāna i te fāito pūai nō te tupu i te rahi ’e nō te ha’api’i mai ’e nō te riro mai.