Russell M. Nelson : E peropheta nō tō tātou nei ’anotau

Nā te peresideni Dallin H. Oaks

Tauturu hō’ē i roto i te Peresidenira’a Mātāmua

Nā roto i te hō’ē peropheta nō te arata’i ia tātou i teie mau mahana hope’a nei, e nūna’a ha’amaita’i-mau-hia tātou.

Tē aroha nei te peresideni Russell M. Nelson i te mau ta’ata i muri a’e i te hō’ē purera’a i Tinetāpora i te 20 nō Novema 2019.

I tō te hō’ē pāpa’i ve’a uiui mana’o fa’a’inora’a i Te ’Ēkālesia a Iesu Mesia i te Feiā Mo’a i te mau Mahana Hope’a nei ’ei « ’ēkālesia e arata’ihia nei e te mau rū’au », ’ua pāhono te peresideni Gordon B. Hinckley (1910–2008) : « E ’ere ānei te mea fa’ahiahia ’ia vai te hō’ē ta’ata ferurira’a pa’ari ’ei upo’o fa’atere, e ta’ata mana’o pāpū, ’aore e ’āueue noa i te mata’i i terā parau ’e terā parau ? »

’O te peresideni Russell M. Nelson, te peropheta ora pa’ari roa a’e ’o tei tāvini i roto i teie tau tu’ura’a ’evanelia, terā huru ta’ata. E fa’ahanahana ’oia i te 100ra’a o tōna matahiti i te 9 nō Tetepa 2024. E ta’ata fa’atere ’oia nō te aroha ’e nō te aumihi rahi, nō te hi’ora’a ātea ’e nō te itoito, nō te māhanahana ’e nō te pa’ari.

’Ua here au i te peresideni Nelson. E hoa māua ’a 60 matahiti i teienei, ’e e hoa ’āpōsetolo māua ’a 40 matahiti te maoro i teienei. Mai te ’āva’e Tēnuare 2018, ’ua ha’amaita’ihia vau i te tāvinira’a i raro a’e i tāna arata’ira’a i roto i te Peresidenira’a Mātāmua o te ’Ēkālesia.

’Oia tei pi’ihia nō te arata’i i te ’Ēkālesia a Iesu Mesia tei fa’aho’i-fa’ahou-hia mai ’e nō te riro ’ei ’orometua hopehau, ’ua mātau te peresideni Nelson i te Fa’aora, ’e ’o ’oia tāna peropheta. I te roara’a o te hō’ē tenetere orara’a ’e te ha’api’ira’a, ’ua tāvini hauhope ’oia i roto i tōna tōro’a ’e i te nu’u. I roto i tōna ’utuāfare rahi, ’ua riro ’oia ’ei upo’o fa’atere ’utuāfare here ’e te ’aravihi. Nā roto i te mau pi’ira’a i roto i te ’Ēkālesia ’e nā matahiti e ono i ma’iri a’enei ’ei peropheta nā te Fatu, ’ua riro ’oia ’ei ti’a fa’atere hi’ora’a maita’i i roto i te ’Ēkālesia a te Fatu tei fa’aho’i-fa’ahou-hia mai.

I te roara’a o tōna tenetere orara’a, ’ua ha’api’i te peresideni Nelson ’e ’ua fa’a’ohipa ho’i i te mau tāviri nō te ’oa’oa i roto i teie orara’a ’e te orara’a a muri a’e—te mea tāna i parau ē « te mau ha’api’ira’a faufa’a roa a’e o te orara’a. »

’Ua ha’api’i mai ’oia ia tātou e mea ti’a ’ia « ha’amata ma te hope’a i te ferurira’a. »

’Ua here ’oia i te fare o te Fatu. I roto i tōna mau matahiti ’ei Peresideni nō te ’Ēkālesia, ’ua fa’aara ’oia e 153 hiero ’āpī—fātata ’o te ’āfara’a o nā hiero e 335 a te ’Ēkālesia tei patuhia, ’o tē patuhia nei, ’e ’aore rā ’o tei fa’aarahia i roto i teie tau tu’ura’a ’evanelia.

’Ua ha’api’i mai ’oia ia tātou ē tē ’āfa’i nei tā tātou patura’a hiero ato’a, ’e te mau ha’amaita’ira’a o te mau fafaura’a o te hiero, i te hiero piri atu i te mau tamari’i a te Atua. Terā te ’ōpuara’a a te Atua.

’Ua ha’api’i te peresideni Nelson : « ’Ua ha’api’i mai au ē te fa’anahora’a a te Metua i te ao ra nō tātou e mea fa’ahiahia mau, e faufa’a rahi te mau mea tā tātou e rave i roto i teie orara’a, ’e nā te tāra’ehara a te Fa’aora e fa’atupu i te fa’anahora’a a tō tātou Metua. » Nō tōna māramaramara’a i terā fa’anahora’a, ’ua parau ’oia, « e ’īriti ’ē atu te reira i te parau ’aro i roto i te orara’a, ’e te pāpū ’ore ’o tō tātou ananahi. Nā te reira e tauturu ia tātou tāta’itahi ’ia mā’iti nāhea tātou ’ia ora i ni’a i te fenua nei ’e i hea tātou e ora ai ē a muri noa atu. »

’Ei Feiā Mo’a i te mau Mahana Hope’a nei, e mau ta’ata ha’amaita’i-mau-hia tātou ’ia arata’ihia e te tāvini ha’eha’a a te Fatu, te peresideni Nelson, ’o tē hōro’a nei iāna iho nō te fa’aineine i te ao nei nō te Tae-Piti-Ra’a mai o tō tātou Fa’aora ’e Tāra’ehara, o Iesu Mesia. ’Ia tāmau na tātou pā’āto’a i te pure, i te fa’a’ite pāpū, i te pāturu, ’e i te ha’amāuruuru i te Atua nō tō tātou peropheta—te peresideni Russell Marion Nelson.

Teie i muri nei te tahi o te mau ha’api’ira’a faufa’a roa a’e a te peresideni Nelson :

’Ua a’o mai ’oia ’ia fa’a’ohipa i te i’oa ti’a o Te ’Ēkālesia a Iesu Mesia i te Feiā Mo’a i te mau Mahana Hope’a nei.

’Ua parau mai ’oia ia tātou e nāhea i te vaiiho i te Atua ’ia upo’oti’a i roto i tō tātou orara’a.

’Ua fa’aitoito ’oia ia tātou ’ia « feruri tiretiera. »

’Ua ha’api’i ’oia ia tātou i te hi’ora’a ’ā’ano nō te ha’aputuputura’a ia ’Īserā’ela i nā pae e piti o te pāruru.

’Ua fa’auru mai ’oia ia tātou ’ia haere i mua i ni’a i te ’ē’a nō te fafaura’a, ’e ’ua ani manihini mai ma te here ’ia ho’i fa’ahou i ni’a i taua ’ē’a ra mai te mea ’ua hahi ’ē tātou.

’Ua a’o ’oia i te mau melo nō te ’Ēkālesia i te mau vāhi ato’a ’ia pe’e i te hōho’a nō te ha’api’ira’a ’evanelia e fa’atumuhia i ni’a i te ’utuāfare ’e turuhia e te ’Ēkālesia.

Fa’ata’ara’a

1. Gordon B. Hinckley, i roto David A. Bednar, « Ma’itihia no te hopoira’a atu i te parau fa’a’ite nō tō’u nei i’oa », Liahona, Novema 2015, 128.

2. Russell M. Nelson, « ’A feruri tiretiera ! », Liahona, Novema 2023, 117.

3. Russell M. Nelson, « ’A haere ’āmui ai tātou i mua », Liahona, ’Ēperēra 2018, 7.

4. Hi’o Russell M. Nelson, « Fa’atumu i ni’a i te hiero », Liahona, Novema 2022, 121.

5. Russell M. Nelson, « ’A feruri tiretiera ! », 117.

6. Hi’o Russell M. Nelson, « Te i’oa ti’a o te ’Ēkālesia », Liahona, Novema 2018, 87–90.

7. Hi’o Russell M. Nelson, « ’A vaiiho i te Atua ’ia upo’oti’a », Liahona, Novema 2020, 92–95.

8. Russell M. Nelson, « ’A feruri tiretiera ! », Liahona, 117–20.

9. Hi’o Russell M. Nelson, « Te tauturura’a a te mau tuahine i te ha’aputuputura’a ia ’Īserā’ela », Liahona, Novema 2018, 68–70 ; hi’o ato’a Russell M. Nelson ’e Wendy W. Nelson, « Ti’aturira’a nō ’Īserā’ela » (purera’a nā te Feiā ’Āpī ’ati ti’a i te ao, 3 nō Tiunu 2018), Vaira’a buka ’evanelia.

10. Hi’o Russell M. Nelson, « Haere mai, ’a pe’e mai iā’u », Liahona, Mē 2019, 91 ; hi’o ato’a Russell M. Nelson, « ’A haere ’āmui ai tātou i mua », 7.

11. Hi’o Russell M. Nelson, « Mau parau ’ōmuara’a », Liahona, Novema. 2018, 6–8.