« Nāhea vau e ha’apūai ai i tō’u ’itera’a pāpū nō te peropheta ? » Liahona, Tetepa 2024.

Mai, pe’e mai

Nāhea vau e ha’apūai ai i tō’u ’itera’a pāpū nō te peropheta ?

E nehenehe te ’āmuira’a rahi e tauturu ia tātou ’ia ha’apūai i tō tātou ’itera’a pāpū nō te mau peropheta ora.

I roto i te buka a Helamana, tē fa’a’ite pāpū nei te peropheta Samuela te mau ’āti Lamana nō Iesu Mesia ’e tē hōro’a nei ’oia i te mau fa’aarara’a ’e te mau anira’a manihini i te mau ’āti Nephi (hi’o Helamana 13–14). I tō tātou nei ’anotau, e rāve’a ato’a tā tātou nō te fa’aro’o i te mau fa’aarara’a tano a tō tātou peropheta ’e a te tahi atu feiā fa’atere o te ’Ēkālesia. Te pāhonora’a i tā rātou mau anira’a manihini e tauturu ia tātou ’ia pe’e i te ’ē’a nō te fafaura’a.

’Ua riro te ’āmuira’a rahi ’ei rāve’a maita’i roa nō te fa’aro’o i te mau parau ’āpī nā roto mai i tō tātou feiā fa’atere tei fa’auruhia ’e ’ia ha’afātata atu ā ia Iesu Mesia. Teie te tahi mau rāve’a ’o tā ’outou e nehenehe e feruri, te fa’a’ohipara’a i te ’āmuira’a rahi nō te ha’amaita’i i tō ’outou ’itera’a pāpū nō te mau peropheta ora :

Hou te ’āmuira’a rahi, ’a feruri nā roto i te pure nō te aha e mea faufa’a nō ’outou ’ia roa’a te hō’ē peropheta. ’A feruri ’ia pure nō te fa’ari’i i te ha’apāpūra’a a te Vārua ē, te peresideni o te ’Ēkālesia i teienei ’o te peropheta ïa, te hi’o ’e te heheu parau a te Atua i ni’a i te fenua nei i teie mahana. « Te ’itera’a nā roto i te heheura’a ē, tē vai nei te hō’ē peropheta ora i ni’a i te fenua nei, e taui te reira i te mau mea ato’a ».
’A ’imi e aha te aura’a ’ia pāturu ’e ’ia turu i te peropheta ’e i te mau hui mana fa’atere rahi. I roto i te tuha’a purera’a nō te avatea mahana mā’a, ’a ’āmui mai i roto i te pāturura’a ia rātou i roto i tō rātou mau pi’ira’a.
« E nā roto i te mana o te Vārua Maita’i e ’ite ai ’outou i te parau mau i te mau mea ato’a ra » (Moroni 10:5). ’A fa’aro’o ai ’outou i te mau parau poro’i a te feiā fa’atere o te ’Ēkālesia, ’a ’ara maita’i i te Vārua ’o tē fa’a’ite pāpū ra ē, e parau mau tā rātou mau parau.
Hō’ē o te mau ti’ara’a tumu a te peropheta ’o te fa’a’ite-pāpū-ra’a ïa nō Iesu Mesia ’e te ha’api’ira’a mai ia tātou ’ia « hi’o i te Tamaiti a te Atua ma te fa’aro’o » (hi’o Helamana 8:13–16). E nehenehe paha ’outou e pāpa’i e aha tā te peropheta ’e te tahi atu mau ta’ata a’o e ha’api’i nei nō ni’a i te Fa’aora.
« Nā roto mai [te peresideni Russell M. Nelson], ’ua fa’ari’i tātou i te mau anira’a manihini e rave rahi ’e ’ua parau-fafau-hia mai te mau ha’amaita’ira’a hanahana ia tātou, mai te peu e fa’atumu tātou i tō tātou orara’a i ni’a i tō tātou Fa’aora ». ’A feruri e hāmani i te hō’ē tāpura nō te mau anira’a manihini e hōro’ahia mai e te peropheta ’e te tahi atu mau ta’ata a’o i roto i te ’āmuira’a. ’A hi’o i te reira tāpura nō te tauturu ia ’outou ’ia tūtava ’ia riro hau atu mai te Mesia ra te huru.
’A ha’amana’o i te anira’a manihini a te peresideni Nelson : « Tē fa’aitoito atu nei au ia ’outou ’ia tuatāpapa pinepine i te mau parau poro’i o teie ’āmuira’a—noa atu e nā ni’a noa—i roto i nā ’āva’e e ono i muri nei ». ’A fa’aro’o ai ’outou ’aore rā ’a tai’o fa’ahou ai ’outou i te mau parau poro’i, ’a tāpa’o i te mau mea tā ’outou e mana’o ra e mea faufa’a.
Tē ani manihini nei te peresideni Nelson ia tātou ’ia « ’imi ’e ’ia tīa’i i te mau temeio ». ’A ha’apa’o ai ’outou i te parau a’o a te peropheta ’e ’a rave ai i te mau tauira’a i roto i tō ’outou orara’a, ’a ’ara maita’i i te mau ha’amaita’ira’a tā ’outou e fa’ari’i ’e te mau temeio tā ’outou e ’ite ra (hi’o Helamana 16:4–5).

’A pe’e ai ’outou i teie mau ta’ahira’a nō te fa’ananea i tō ’outou ’itera’a pāpū nō te hō’ē peropheta, te hi’o ’e te heheu parau, ’a tūru’i i ni’a i tō ’outou fa’aro’o ia Iesu Mesia ’e i te hō’ē Metua here i te ao ra. ’Ua hōro’a mai te Atua ia tātou ma te here i te mau peropheta nō te arata’i ia tātou iāna ra—mau peropheta tei riro ’ei auvaha nōna nō te heheu mai i tōna hina’aro i tō te ao nei. (Hi’o Te Ha’api’ira’a Tumu ’e te mau Fafaura’a 1:38 ; 21:5–6.) Mai te mea e mā’iti tātou ’ia pe’e i te a’o a tāna mau tāvini, tē mā’iti ra ïa tātou ’ia pe’e iāna.