Talitali Lelei Kimoutolu ki he Makasini ko ʻEní

Ko Hono Maʻu ʻa e Fakafiemālié ʻia Sīsū Kalaisí

ʻOku tau lau he māhiná ni ʻi heʻetau ako ʻa e Haʻu, ʻo Muimui ʻIate Aú fekauʻaki mo ha aʻusia makehe: ko e ʻaʻahi ʻa e Kalaisi kuo toetuʻú ki he ongo ʻAmeliká ʻo fakaafeʻi ʻa e kakai Nīfaí ke nau “ʻunuʻunu mai kiate au, koeʻuhí ke mou ʻai homou nimá ki hoku vakavaká, pea ke mou ala foki ki he mataʻi faʻo ʻi hoku nimá mo hoku vaʻé, koeʻuhí ke mou ʻiloʻi ko au ko e ʻOtua ʻo ʻIsilelí, pea ko e ʻOtua ʻo e māmaní kotoa pē, pea kuo tāmateʻi au koeʻuhi ko e ngaahi angahala ʻa e māmaní” (3 Nīfai 11:14).

Hangē ko e meʻa naʻe fai ʻe Sīsū Kalaisi ki he kakai Nīfaí, ʻoku pehē pē ʻa ʻEne fakaafe mai kiate kitautolu takitaha ke tau haʻu ʻo maʻu ha aʻusia fakataautaha mo Ia pea fakatupulaki ha vā fetuʻutaki fakafuakava mo Ia. ʻOku ou fakafetaʻi ʻi Heʻene ʻofa ʻiate kitautolu ʻi he founga ko ʻení mo ʻEne finangalo ke kau fakataha mo kitautolú. ʻOku ʻikai ʻaupito ke tau tuenoa koeʻuhí ko Ia. ʻOku ou vahevahe ʻi heʻeku fakamatalá ʻo pehē, “naʻe fakataumuʻa ke tau ngāue fakataha mo e ʻEikí ʻi ha founga mālohi ʻo fakafou ʻi heʻetau ngaahi fuakavá” (peesi 44). ʻI heʻetau haʻu kiate Ia ʻo fakafou ʻi heʻetau ngaahi fili fakaʻaho ke tauhi ʻa e ngaahi fuakava toputapú, ʻoku tau langaki ai ha vā fetuʻutaki mo Sīsū Kalaisi ʻa ia ʻe ʻomi ai ʻEne ʻofá mo e fakafiemālié ki heʻetau moʻuí pea mo e moʻui hotau fāmilí.

ʻOku fakamatalaʻi ʻe Palesiteni Sefilī R. Hōlani ʻi heʻene fakamatala “Ko e Kāmeni ʻo e Lakanga Fakataulaʻeiki Māʻoniʻoní,” (peesi 4) ʻoku tau manatu kia Sīsū Kalaisi ʻi heʻetau tui ʻa e kāmeni fakatemipalé hili hono maʻu hotau ʻenitaumení. ʻOkú ne vahevahe ʻa e talaʻofa ʻa e Kau Palesitenisī ʻUluakí ʻe hanga ʻe hono tauhi ʻetau ngaahi fuakavá mo hono tui ʻo e kāmení ʻo ʻomi ha faingamālie lahi ange ke tau maʻu ai ʻa e maluʻi mo e mālohi ʻa e Fakamoʻuí.

ʻOku ou fakamoʻoni ʻoku ʻofa ʻetau Tamai Hēvaní mo e Fakamoʻuí ʻiate koe pea naʻe hāʻele mai ʻa Sīsū Kalaisi koeʻuhí ko e taumuʻa pē ko ʻení: ke ʻomi kiate kitautolu ʻa e fakafiemālie ʻoku tau fekumi ki aí. Ko Sīsū Kalaisi ʻa e fakafiemālié.

Fakaʻapaʻapa atu,

Kristin M. Yee

Tokoni Ua ʻi he Kau Palesitenisī Lahi ʻo e Fineʻofá

“ʻI heʻeku kei ʻi māmaní, ko e maama au ʻo māmaní.

“Hili [e] lea [ʻa Sīsuú], naʻe ʻaʻanu ia ki he kelekelé, ʻo ne ngaohi ʻaki ʻa e ʻaʻanú ʻa e ʻumea, ʻo ne pani ʻaki ʻa e ʻumeá ʻa e mata ʻo e tangata kuí,

“ʻO ne pehē kiate ia, ʻAlu, ʻo kaukau ʻi he ano vai ko Seiloamí. … Ko ia naʻe ʻalu ai ia ʻo kaukau, pea haʻu kuo ʻā.”

Sione 9:5–7

Naʻá Ne Pani e Mata ʻo e Tangata Kuí, tā ʻa Walter Rane