“Ko Hono Maʻu ha Fakafiemālie ʻi Hotau Vā Fetuʻutaki Fakafuakava mo e ʻOtuá,” Liahona, Sepitema 2024.
Ko Hono Maʻu ha Fakafiemālie ʻi Hotau Vā Fetuʻutaki Fakafuakava mo e ʻOtuá
Ko Sīsū Kalaisi ʻa e maʻuʻanga ʻo e ʻofa haohaoá, fakamoʻuí, fiefiá, mo e fakafiemālié.
Konga ne toʻo mei he He Comes Again to Rule and Reign (ʻOkú Ne Toe Hāʻele Mai ke Pule mo Angi), tā ʻa Mary R. Sauer
Kuó u fakakaukau ʻi ha kiʻi taimi ki hono maʻu ʻo e fakafiemālié ʻo fakafou ʻi hotau vā fetuʻutaki fakafuakava mo e ʻOtuá. ʻI hono akoʻi mo naʻinaʻi mai ʻe he palōfita ʻa e ʻEikí ke tau ako fekauʻaki mo e ngaahi fuakavá, temipalé, mo e mālohi ʻo e lakanga fakataulaʻeikí, kuó u fekumi, ʻofa, mo keinanga ʻi he ngaahi moʻoni fakatupulaki ʻoku kātoi ʻi he ngaahi fuakavá.
Naʻe fakataumuʻa ke tau ngāue fakataha mo e ʻEikí ʻi ha founga mālohi ʻo fakafou ʻi heʻetau ngaahi fuakavá. ʻOkú Ne finangalo ke ʻi ai mo kitautolu ʻi he ngaahi meʻa ʻoku tau hohaʻa ki aí mo ʻetau ngaahi filí. ʻOku ʻikai fiemaʻu ia ke tau foua toko taha pē ʻa e ngaahi faingataʻá, mamahi lahí, taʻetaʻepauʻiá, mo e loto-mamahi ʻo e moʻuí. Te Ne ʻafio ʻi hotau tafaʻakí. Kuó Ne folofola ʻo pehē: “ʻE ʻikai te u tuku ke tuenoa ʻa kimoutolu: te u haʻu kiate kimoutolu” (Sione 14:18).
Naʻe fakamatalaʻi ʻe Palesiteni Lāsolo M. Nalesoni ʻa e ʻulungaanga ʻo e ʻOtuá mo ʻEne ʻofa lahi kiate kitautolú ʻi heʻene akonaki “ko e hala ʻo e fuakavá ʻoku fekauʻaki ia mo hotau vā fetuʻutaki mo e ʻOtuá.” Naʻá ne pehē: “ʻI he taimi pē kuó ta fakahoko ai ha fuakava mo e ʻOtuá, ʻoku toe vāofi ange ai hota vā fetuʻutaki mo Iá ʻo laka ange ia ʻi he taimi kimuʻa peá ta fakahoko e fuakavá. Kuo haʻi fakataha ʻeni kitautolu. Koeʻuhí ko ʻetau fuakava mo e ʻOtuá, he ʻikai ke Ne teitei fiu ʻi Heʻene feinga ke tokoniʻi kitautolú, pea he ʻikai ʻaupito ke tau teitei lava ʻo ikunaʻi ʻEne faʻa kātaki ʻaloʻofa kiate kitautolú. ʻOku tau takitaha maʻu ha potu makehe ʻi he loto ʻo e ʻOtuá. ʻOkú Ne ʻamanaki lahi mai kiate kitautolu.”
Ko ʻEku Maʻuʻanga Tokoni Maʻongoʻonga Taha ki he Nongá
ʻI heʻeku hoko ko ha fefine kuo teʻeki ai malí, ʻoku ʻi ai ha tākiekina mālohi ʻa e vā fetuʻutaki ʻofa mo ʻaloʻofa ko ʻeni mo ʻeku Tamai Hēvaní mo e Fakamoʻuí ʻi heʻeku moʻuí pea kuo hoko ia, pea ʻoku lolotonga hoko ia, ko hoku maʻuʻanga tokoni maʻongoʻonga taha ʻo e fiemālié mo e nongá. Neongo pe ko e hā hotau tuʻunga pe puipuituʻa ʻi he nofomalí, ka ʻoku finangalo ʻa e ʻEikí ke tau ngāue fakataha mo Ia ʻi ha founga mālohi—ke tau “taha pē” (3 Nīfai 19:23) mo Ia ʻi he “meʻa kotoa pē te [tau] faí” (ʻAlamā 37:37). ʻI heʻetau tangi ki he ʻEikí ke faitokonia kitautolú, pea “tuku ke fai ki he ʻEikí ʻa e ʻofa [hotau] lotó ʻo taʻengatá” (ʻAlamā 37:36; tānaki atu hono fakamamafaʻí), ʻe lava ke fakafonu ʻetau moʻuí ʻaki ʻa e haʻi fakaʻofoʻofa ko ʻeni ʻo e fuakavá.
ʻOku fakafou ʻi hotau Fakamoʻui ko Sīsū Kalaisí ʻa ʻetau lava ʻo maʻu ha fakafiemālie ʻi heʻetau foua toko taha e ngaahi faingataʻa ʻo e moʻuí,
ʻOku takitaha moʻona pē ʻa e ngaahi hohaʻa mo e fiemaʻu te tau lava ʻo ongoʻi tuenoa aí. ʻOkú Ne tokanga mai ki he ngaahi meʻa ʻoku tau hohaʻa ki aí ʻo tatau pē pe ʻoku lahi pe siʻisiʻi. Kuó u ongoʻi ʻa e fiemaʻu ʻo ʻEne tokoní ʻi he taimi ʻoku ou hohaʻa ai ki he fanga kiʻi meʻa ngali iiki hangē ko e meʻa ʻoku fakafiu maʻu pē kiate au ʻa ia ʻoku ou ui ko e “monomono ʻo e falé.” Koeʻuhí ko e ʻikai ha hoa mali ke u talatalanoa mo iá, te u hohaʻa pe ko hai e tokotaha totonu ʻe totongi ke ne fai e ngāué, fakamole ʻoku fakapotopotó, ko e taimi ke u mavahe ai mei he ngāué ke u ʻi ʻapí, pea mo e tokangaʻi lelei ʻeku ngaahi meʻa fakapaʻangá mo hoku ʻapí. Naʻe ola lelei ʻa e ʻaho naʻe fakaleleiʻi ai e matapā ki hoku fale tauʻanga meʻalelé! Naʻe ongona ʻe he ʻEikí ʻeku hohaʻá. Pea neongo ko ha kihiʻi meʻa siʻi ia ʻi he ngaahi meʻa ʻoku maʻongoʻonga angé, ka naʻá Ne tali ʻeku lotú. ʻO fēfē? Naʻe fakafou ʻi ha kaungāʻapi angaʻofa, ko e tokoni ʻa e Laumālié, mo ha vitiō ʻi he YouTube, ʻa ʻeku ʻilo e meʻa ke fai ke fakaleleiʻi ai e matapaá.
Kapau ʻoku tokanga ʻa e ʻEikí ki he ngaahi fiemaʻu īkí, fakakaukauloto ki Heʻene fakaʻamu ke tāpuakiʻi mo poupouʻi kitautolu ʻi he ngaahi faingataʻa mamafa ange ʻo e lotó mo e laumālié, ʻa ia ʻoku lahi hono faʻahingá: ʻa e ngaohikoviá, maʻunimaá, ngaahi vā fakafāmili ʻoku faingataʻá, mole mo e siva e ʻamanakí, ngaahi faingataʻaʻia fakaeʻatamai mo fakatuʻasino hokohokó, faingataʻaʻia fakapaʻangá, hohaʻa maʻu pē ki hono tokangaekina ha mātuʻá, fefaʻuhi mo e tui fakatāutahá, ko ha fānau pe hoa mali ʻoku fili ke ʻoua ʻe kau ki he ongoongoleleí.
Lolotonga e ngaahi mālohinga mo e ngaahi vaivai ʻo e moʻuí, kuó u fakafalala lahi mo pīkitai ki hoku vā fetuʻutaki fakafuakava mo e ʻOtuá. ʻI heʻeku falala ki Heʻene tauhi ʻofá mo feinga hoku lelei tahá ke fakatapui ʻeku moʻuí kiate Iá, kuó Ne ʻomi ha fakafiemālie ʻo fakafou ʻi Hono mālohi ʻo e lakanga fakataulaʻeikí pea kuó Ne hoko ko ha Tauhi ʻo ʻeku ngaahi fiemaʻu fakalaumālié mo fakatuʻasinó. Kuó Ne fakafiemālie ʻeku ilifiá, fakafiemālie ʻeku ongoʻi taʻepauʻiá, fakahaofi au mei he hīkisiá, fakahaofi au mei he angahalá, fakafiemālieʻi au ʻi heʻeku ongoʻi tuenoá, fakafiemālieʻi ʻeku mamahí.
Naʻe akoʻi ʻe Palesiteni Nalesoni ʻi he mahino mo e fakapapau “ko e pale ki he tauhi ʻo e ngaahi fuakava mo e ʻOtuá, ko e mālohi fakalangi—ko e mālohi ʻokú ne fakamālohia kitautolu ke tau matuʻuaki lelei ange hotau ngaahi faingataʻá, ʻahiʻahí, mo e loto-mamahí.”
ʻOku fakafou ʻia Sīsū Kalaisi ʻa ʻetau lava ʻo maʻu ha fakafiemālie ʻi heʻetau foua toko taha e ngaahi faingataʻa ʻo e moʻuí,
Ko Sisitā Yee mo ha ongo fafine ʻi Maikolonīsia ʻokú na ohi hake ha fānau ne liʻaki ʻe heʻenau mātuʻá.
Kau Fafine “ʻi he Ngaahi Motu ʻo e Tahí”
ʻI heʻeku fakakaukauloto ki he ngaahi tāpuaki ʻo e haʻi fakafuakava ʻoku tau maʻu mo e ʻOtuá, naʻá ku fakakaukau ki hono vahe mai ke u ʻaʻahi ki he ʻĒlia ʻĒsia Tokelaú.
Ne u maʻu e faingamālie ke folau ki he kiʻi motu ko Suki ʻi Maikolonīsia, ʻoku maile nai ʻe 1,500 (2,400 km) ki he tonga-hahake ʻo Siapaní. Kuo tauhi ʻe ha ongo fafine ʻi Ueno, Suki, ha fānau kuo liʻaki kinautolu ʻe heʻenau mātuʻá. Naʻe ongoʻi ʻe he ongo fefine ko ʻení naʻe mahuʻinga ke ohi hake ʻa e fānau ko ʻení ʻi he ongoongoleleí. Ko ha taha ʻi he ongo fafine ko ʻení ʻoku teʻeki ai mali pea ʻokú ne ngāue taimi kakato ko ha faifaleʻi ʻi he akó.
Naʻá ku vahevahe mo kinaua ʻa e pōpoaki ʻa Palesiteni Nalesoni ki he houʻeiki fafine ʻo e Siasí, ʻa ia ʻoku ʻofaʻi, ʻaonga pea mahuʻinga ʻa kimoua ongo fafine.
Naʻe kamata ke tangi ʻa e fefine taautaha fakaʻofoʻofa ʻokú ne ohi hono fakafotú mo e ʻilamutú peá ne pehē mai kuo teʻeki ke ne ongoʻi mahuʻinga kimuí ni mai; kuó ne ongoʻi liʻekina. Ka naʻá ne fakamoʻoni naʻá ne ongoʻi e ʻofa mo e tokanga ʻa e ʻOtuá kiate iá ʻi he ngaahi lea ʻa e palōfitá ʻokú ne “mahuʻinga” moʻoni, pea naʻá ne ʻiloʻi naʻe moʻoni ia. Naʻá ne ongoʻi e ʻofa faifakamoʻui ʻa e ʻOtuá; naʻá ne ongoʻi ha fakafiemālie.
Kuo folofola ʻa e ʻEikí, “ʻIkai ʻoku mou ʻilo ko au, ko e ʻEiki ko homou ʻOtuá, kuó u fakatupu ʻa e kakai kotoa pē, pea ʻoku ou manatuʻi ʻa kinautolu ʻoku ʻi he ngaahi motu ʻo e tahí?” (2 Nīfai 29:7).
ʻOku ʻafioʻi ʻa e ongo fafine ko ʻení ʻe heʻena Tamai Hēvaní mo e Fakamoʻuí. ʻOku ʻikai ke na tuenoa. Pea ʻoku pehē foki mo koe mo au ʻi hota ngaahi ʻahiʻahí mo e faingataʻá. Naʻe fekauʻi au ʻe he ʻEikí ke u folau ʻi ha meimei maile ʻe 8,500 (13,700 km) ʻi he vakapuna, lēlue, kā, mo e vaka ke ʻave e ʻofa mo e fakafiemālie ʻa e ʻOtuá ki he “toko taha” ʻi he ʻotu motu ʻo e tahí. Ko ia te Ne kumi koe mo au ʻi ha feituʻu pē te ta ngali ongoʻi tuenoa ai ʻi he ngaahi hohaʻa mo e kavenga ʻokú ta fuesia ʻi hota lotó. ʻOkú Ne ʻi ai mo mateuteu ke tāpuakiʻi, tataki, mo fakafiemālieʻi kitautolu.
“Te U Lava ʻo ʻAlu Atu Kiate Koe”
Naʻe fakamatalaʻi ʻe Palesiteni Kōtoni B. Hingikelī (1910–2008) ʻa e aʻusia ʻo ha fefine kei talavou ka kuo vete mo hono malí ko ha “faʻē ki ha fānau ʻe toko fitu naʻe ʻi he vahaʻa ʻo e taʻu 7 ki he taʻu 16. Naʻá ne pehē naʻá ne kolosi he halá ʻi ha efiafi ʻe taha ke ʻave ha meʻa ki hono kaungāʻapí.” Ko e ngaahi lea ʻeni ʻa e fefiné ʻi he manatu ki ai ʻa Hingikelií:
“ʻI heʻeku tafoki ke lue ki ʻapí, ne u vakai atu ki he ulo mai homau falé. Naʻe lava ke u ongona e vanavanaiki e leʻo ʻo e fānaú ʻi heʻeku mavahe mei aí. Naʻa nau pehē mai: ‘Mami, ko e hā ʻetau kai efiafí?’ ‘Te ke lava ʻo ʻave au ki he laipelí?’ ‘Kuo pau ke ʻomai haʻaku saati he pooni.’ Ne u ongoʻi helaʻia mo ongosia ʻi heʻeku sio atu ki he falé ʻoku ulo mai e maama he loki taki taha. Ne u fakakaukau atu ki he fānau kotoa ʻoku tatali mai ai ke u foki ange ke fakatōliʻa ʻenau ngaahi fiemaʻú. Naʻe toe mamafa ange ʻeku kavengá ʻi he meʻa ne u lava ke fuesiá.
“ʻOku ou manatuʻi ʻeku tangi pē mo hanga hake ki he langí ʻo pehē ange, ‘ʻE Tamai, he ʻikai ke u lava ia he pooni. ʻOku ou fuʻu ongosia. He ʻikai ke u lava ʻo matatali ia. He ʻikai lava ke u ʻalu ki ʻapi ʻo tokangaʻi toko taha pē ʻa e fānau kotoa aí. ʻE lava nai ke u ʻalu atu ki he ʻAfioná ʻo kiʻi nofo pē mo Koe ʻi ha pō pē ʻe taha? …’
“Naʻe ʻikai ke u ongoʻi lelei ʻa e tali ne fai maí, ka ne u ongoʻi ia ʻi hoku ʻatamaí. Naʻe pehē mai e talí: ‘ʻIkai, ʻe hoku ʻofefine, he ʻikai te ke haʻu kiate au he taimí ni. … Ka te u lava ʻo ʻalu atu kiate koe.’”
“Te u lava ʻo ʻalu atu kiate koe.” Naʻá Ne hāʻele mai kiate ia, pea te Ne hāʻele mai kiate koe mo au, ʻo hangē pē ko e hāʻele mai ʻa e Fakamoʻuí ki he fefine ʻi he veʻe vaitupú ʻa ia naʻá ne ngāue mo ongosia ai ʻi hono ngaahi ʻahó (vakai, Sione 4:3–42). Naʻá Ne fakalotolahiʻi ia, akoʻi ia, fakahā ange Hono tuʻunga faka-Mīsaiá kiate ia, peá Ne ʻofa kiate ia neongo naʻe ʻikai mahalo ke ʻofa ʻa e fefiné ʻiate ia. Ko e fefine ʻi he veʻe vaitupú, ko e faʻē kei talavou ʻa e fānau ʻe toko fitú, pea mo koe mo au, ʻoku mateuteu ʻa Sīsū Kalaisi ke ʻomi ha fakafiemālie. ʻOku ou fakamoʻoni te tau lava ʻo maʻu ʻa e fakafiemālié ʻi heʻetau fehokotaki fakafuakava mo ha ʻOtua ʻofá.
Mahalo kuó ke kolea ha tokoni, ʻo hangē ko aú, ke ʻoua naʻá ke tuenoa lolotonga e ngaahi taimi faingataʻa fakaeloto, fakatuʻasino mo fakalaumālie taha ʻo hoʻo moʻuí. Kuo hoko e ngaahi taimi faingataʻa ko ʻeni ʻo e tupulakí ke ne fakatupunga ai ʻa e meʻa ʻoku ou ui ko e “ngaahi fakaʻilonga mafao fakalaumālie” ʻi he laumālié. Ka ʻoku ou fakamoʻoni kuó Ne tokonia au, pea te Ne tokoniʻi koe. Kuó Ne tohitongi koe ʻi Hono ʻaofi nimá (vakai, ʻĪsaia 49:16; 1 Nīfai 21:16). Kuó Ne ʻi ai ʻi hoʻo faifeinga ke “māʻoniʻoni ʻi he fakapoʻulí.” Kuo teʻeki ke Ne liʻaki au, pea he ʻikai te Ne liʻaki koe. Pea te u ʻofa kiate Ia ʻo taʻengata koeʻuhí ko e meʻa ko iá.
Siʻi kāinga ʻofeina, ko e maʻuʻanga ʻo e ʻofa haohaoá, fakamoʻuí, fiefiá mo e fiemālié kuo maʻu ia ʻia Sīsū Kalaisi. ʻOku ou fakamoʻoni ko Sīsū Kalaisi ʻa e fakafiemālié.
ʻOkú Ne finangalo ke tauhi koe, ke tāpuekina mo fakamolemoleʻi koe. Naʻá Ne hāʻele mai koeʻuhí ko e taumuʻa ko ʻení, ke foaki kiate koe ʻa e fakafiemālie lahi ʻokú ke fekumi ki aí. Ko Ia ʻa e Huhuʻi ʻo e māmaní, pea ʻoku ou fakamoʻoni ʻokú Ne moʻui pea ʻokú Ne ʻofa ʻiate koe.
Mei ha lea ʻi he Konifelenisi ʻa e Kakai Fefiné ʻi he ʻUnivēsiti Pilikihami ʻIongí naʻe fai ʻi he ʻaho 3 ʻo Mē 2023.