“Ko Ha Ongo Fakalaumālie ʻo e Faʻungá,” Liahona, Sepitema 2024.
Ngaahi ʻAta ʻo e Tuí
Ko Ha Ongo Fakalaumālie ʻo e Faʻungá
Naʻe loloto ange ‘a e ʻuhinga ʻa e Fakalelei ʻa Sīsū Kalaisí kiate au ʻi heʻeku tā-tongitongi ‘a e talanoa ʻo ʻĒpalahame mo ʻAisaké.
‘Ū tā ʻa Christina Smith
Ko e tā-valivalí mo e tā-tongitongí ko ha founga ia ʻe taha ʻoku ou fakahaaʻi ai ʻeku houngaʻia ʻi he fakaʻofoʻofa ʻo e māmaní. Kiate aú, ʻoku kamata ʻa e ʻātí ʻaki ha ongo fakalaumālie ʻo e faʻu ha meʻá.
“Ko e Fānau ʻo e Fuakavá”
ʻI he taimi naʻe maʻu vāhenga mālōlō ai haku kaungāmeʻa pea teuteu ke ne hiki ki ha feituʻu ʻe taha, naʻá ku ngaohi ha fakatātā maʻana naʻe ui ko e Fānau ʻo e Fuakavá. Ko ha tā-tongitongi ʻo ʻĒpalahame ʻokú ne pukepuke ʻa e pēpē ko ʻAisaké. Talu mei ai, mo ʻeku faʻu ha ʻū tā-tongitongi kehe fekauʻaki mo ʻĒpalahame mo ʻAisake. Ko e niʻihi ia ʻo e ʻū tā-tongitongi ʻoku ou mahuʻingaʻia taha aí.
Ko e ʻū tā-tongitongi ʻa Sitīveni Sipeli ʻoku ʻasi ai ʻa ʻĒpalahame mo ʻAisaké ko e ʻū meʻa ia ʻokú ne saiʻia taha aí. ʻOku nau fakamanatu ange kiate ia ʻa e ʻofa ʻa e Tamaí ki Hono ʻAlo Pē Taha Naʻe Fakatupú. ʻOku ʻi he taupotu ki he toʻomataʻú ʻa ʻene tā-tongitongi ʻoku ui ko e Fānau ʻo e Fuakavá.
Ko e fakatātā ʻoku ongo taha kiate aú ʻa e fakatātā ʻo hono fakahinohinoʻi ʻe ʻĒpalahame hono fohá mei he ʻū takainga tohí. ʻOku kuku ʻe ʻĒpalahame hono alangá pea ʻokú ne hanga ki ʻolunga ʻi ha fofonga mamahi mo ha ueʻi mei he ʻEikí kuo pau ke ne feilaulauʻi hono foha pē ʻe tahá. ʻOku fāʻofua ʻa ʻAisake kia ʻĒpalahame ka ʻoku ʻikai mahino kiate ia ʻa e ʻuhinga ʻoku ʻikai fai ange ai heʻene tamaí ha talí.
ʻI he tā-tongitongi ko ʻeni ʻa Brother Sipeli ʻoku ui ko e ʻAve Ho Fohá, Ho Foha Pē Tahá, ʻoku maʻu ai ʻe ʻĒpalahame ha ueʻi mei he ʻEikí kuo pau ke ne feilaulauʻi hono foha ko ʻAisaké.
ʻOku fakaʻaliʻali ʻe ha fakatātā ʻe taha ʻoku lolotonga faʻu, ʻa ʻena langa ha ʻesi feilaulaú. ʻOku fehuʻi ʻe ʻAisake pe ko e fē ʻa e [monumanu ke] feilaulaú, pea ʻoku tali ange ʻe ʻĒpalahame ʻe toki ʻomi ia ʻe he ʻEikí. ʻI ha fakatātā kimuʻa atu, ʻoku ʻoange ai kia ʻĒpalahame ha lami ʻi ha veʻe vao pea ʻoku talaange kiate ia ʻoku ʻikai fiemaʻu ke ne feilaulauʻi hono fohá. ʻOku fāʻofua ʻa ʻĒpalahame kia ʻAisake, ʻo kuku ia. (Vakai, Sēnesi 22:1–13.)
ʻOku fāʻofua ʻa ʻĒpalahame kia ʻAisake ʻi he tā-tongitongi ko ʻeni ʻa Brother Sipeli ʻoku ui ko e Hili ʻa e Siví.
Ko e meʻa ʻoku fuʻu mahuʻinga fekauʻaki mo e talanoa ko ʻení he ko ha fakataipe ia, pe fakatātā, ʻo e feilaulau ʻa e ʻAlo ʻo e ʻOtuá. Naʻe fili foki ʻe heʻetau Tamai ʻi Hēvaní, ʻa ia ʻokú Ne ʻofa ʻi Hono ʻAlo Pē Taha Naʻe Fakatupú, ke feilaulauʻi Ia ka naʻe ʻikai ke Ne fakahaofi Ia ʻi he momeniti fakaʻosí. ʻI he lea ʻa ʻEletā Niila A. Mekisuele (1926–2004) ʻo e Kōlomu ʻo e Kau ʻAposetolo ʻe Toko Hongofulu Mā Uá, naʻá ne pehē, “Naʻe ʻikai ha lami ʻi he vao ʻi Kālevale ke fakahaofi Ia, ʻa e Kaumeʻa ko ʻeni ʻo ʻĒpalahame mo ʻAisaké” (“O, Divine Redeemer,” Ensign, Nov. 1981, 8).
Ka naʻe fakaʻatā ʻe he Tamaí ʻa Hono ʻAlo kuo filí (vakai, Mōsese 4:2) ke Ne fakahoko ʻa e Fakaleleí maʻatautolu koeʻuhí ka tau lava kotoa ʻo foki ki ʻapi ʻo toe nofo fakataha mo Kinaua ʻo kapau ʻoku tau loto ki ai pea moʻui taau mo e tāpuaki ko iá (vakai, Sione 3:16–17).
ʻOku talamai ʻe heʻeku aʻusiá ʻoku kau ʻa e ʻOtuá ʻi heʻetau moʻuí. ʻOku tau ʻi aí ke tau “maʻu ʻa e fiefiá” (2 Nīfai 2:25), ka ʻoku tau maʻu ʻa e taukeí ʻi he ngaahi meʻa ʻoku tau kātekiná. Hangē ko ia ko e pau ke hoko ha ngaahi meʻa leleí, kuo pau foki ke ʻi ai mo e “fehangahangai ʻi he meʻa kotoa pē” (2 Nīfai 2:11). Ka neongo ia, ʻoku ʻi ai maʻu pē ʻa e ʻOtuá ke tokoniʻi kitautolu, pea te tau lava ʻo ikunaʻi ha meʻa pē te tau fehangahangai mo ia, ʻo tatau ai pē pe ko e hā ha meʻa te tau foua ʻi he moʻuí. Te tau ʻiloʻi te tau lava ʻo matuʻuaki hotau ngaahi ʻahiʻahí ʻi heʻetau hokohoko atu ke feinga ke ʻofa, tokoni, pea manavaʻofa ange—ʻo hangē ko hotau Fakamoʻuí.
ʻOku ou houngaʻia ʻi he ongoongoleleí, ko hoku fāmilí, pea mo e kakai fakaʻofoʻofa kotoa pē ʻi he Siasí. Neongo pe ko e fē ha feituʻu naʻá ku ʻalu mo hoku uaifi ko Kefilini ʻo ngāue fakafaifekau ai ʻi he funga ʻo e māmaní, naʻá ma ʻilo ai ha Kāingalotu ʻoku nau feʻofaʻaki mo fetokoniʻaki, faitāpuekina mo feilaulau maʻá e niʻihi kehé ʻOku ʻofa ʻa e Tamai Hēvaní ʻiate kitautolu, pea ko ʻEne fānau kitautolu. ʻOku ʻikai ha meʻa ʻe toe mahuʻinga ange ka ko e tui faivelenga kiate Ia mo Hono ʻAló, ʻa ia ʻokú Na tauhi faivelenga kitautolú.
Neongo pe ko e fē ha feituʻu naʻe ngāue fakafaifekau ai ʻa Brother Sipeli mo hono uaifi ko Kefiliní ʻi he funga ʻo e māmaní, naʻá na ʻilo ai ha Kāingalotu ʻoku nau “feʻofaʻaki mo fetokoniʻaki, faitāpuekina mo feilaulau maʻá e niʻihi kehé.”