Fakakomipiuta Pē: Kakai Lalahi Kei Talavoú
ʻI he Taimi Naʻá Ku Fie Fakangata Ai ʻEku Moʻuí, Naʻe Tokoniʻi Au ʻe Sīsū Kalaisi Ke U ʻIlo ʻa e Māmá
ʻI ha taimi faingataʻa ʻo ʻeku moʻuí, naʻá ku ongoʻi ai ko e taonakitá pē ʻa e meʻa ke u filí. Ka naʻá ku lava ʻo maʻu ʻa e nongá ʻia Sīsū Kalaisi.
Te Ne Toe Hāʻele Mai ke Angi mo Pule, tā fakatātaaʻi ʻe Mary R. Sauer
Naʻá ku tupu hake ʻo vaʻinga ʻakapulu ʻi ʻAilani, pea naʻá ku lava ʻo vaʻinga fakapalōfesinale ai ʻi he funga ʻo e māmaní ʻi heʻeku kei talavoú. Lolotonga ʻeku ʻaʻahi ki ʻIngilani ke vaʻinga ʻakapulú, naʻá ku fetaulaki ai mo e ongo faifekaú pea naʻe papitaiso ai au. Naʻá ku ngāue fakafaifekau kimui ange peá u hiki leva ki ʻAositelēlia, ʻo u fetaulaki ai mo hoku uaifí peá u hoko ai ko ha tamai.
ʻI he taimi naʻá ku ului ai ki he ongoongolelei ʻo Sīsū Kalaisí, naʻe liliu ʻeku tōʻonga moʻuí kakato ʻi ha kiʻi taimi nounou pē! Naʻe fakafokifā pē kuó u maʻu ha uaifi, ko ha ʻapi ʻi ha fonua kehe, mo ha foha. Naʻe ʻikai ke u tupu hake ʻi ha fāmili angamaheni, ko ia naʻe foʻou kotoa ʻeni kiate au. Naʻe hoko ʻeku moʻui ʻaki e ongoongoleleí ke u maʻu ai ha ngaahi tāpuaki naʻe ʻikai ke u teitei lava ʻo maʻu kimuʻa, pea naʻá ku houngaʻia ʻaupito ai.
Ka neongo naʻe tāpuekina au ʻi he ngaahi tafaʻaki kehekehe ʻo ʻeku moʻuí, ka naʻá ku kei ongoʻi lōmekina pē.
Ongoʻi Tuenoa ʻi Heʻeku Ngaahi Ongo Fakaelotó
ʻI he vakai ʻa e kakai kehé, naʻe hangē naʻe lavameʻá ʻeku moʻuí, ka naʻá ku fakatokangaʻi naʻe ʻi ai ha ngaahi faingataʻa ʻi he lotolotonga ʻo e ngaahi tāpuakí. ʻI he taimi naʻá ku fakakikihi ai mo hoku uaifí, naʻá ku fāinga ke vahevahe ʻeku ngaahi ongó. Naʻe teʻeki ai ke u ʻilo e founga ke fakahaaʻi lelei ai kinautolú. Pea koeʻuhí naʻá ku tupu hake ʻi ha faʻē taautaha, naʻá ku ongoʻi hē ʻi he taimi ʻoku fekauʻaki ai mo e vā fetuʻutaki ʻo e nofo-malí.
Naʻe liliu ʻa e ngaahi tūkungá, pea naʻe ʻikai ke u toe lava ʻo vaʻinga ʻakapulu. Naʻá ku ongoʻi ʻo hangē naʻe ʻikai ko ha tamai lelei au, husepāniti lelei, pe ko ha tauhi leleí. Pea naʻá ku fuʻu fiemaʻu vivili ke u tauhi hoku fāmilí! Naʻe ʻikai pē ke u ʻilo pe te u kumi tokoní ki fē.
Naʻe fakaʻau ke toe kovi ange ʻeku aʻusia ʻa e ongoʻi lōmekiná. Naʻe kamata ke mole ʻeku fakatuʻamelie ki ha tūkunga lelei angé, pea naʻe fakaʻau ke toe lahi ange ʻeku loto-mafasiá. ʻI he fakalau ʻa e taimí, naʻe kamata ke u maʻu ha ngaahi fakakaukau ke taonakita. Koeʻuhí naʻe ʻikai faitoʻo ʻeku ngaahi fakakaukau taonakitá mo e loto-mafasiá, naʻá ku fili ai ke u feinga ke taonakita.
Naʻe hoko ha meʻa fakaofo ʻo u hao moʻui ai mei heʻeku feinga ke taonakitá. Naʻá ku fakatokangaʻi ʻa e tuʻunga kovi ʻo ʻeku moʻui lelei fakaeʻatamaí, pea naʻe kamata ke u talanoa mo ha faifaleʻi. Naʻe tokoniʻi au ʻe he tokotaha faifaleʻi ko ʻení ke u maʻu ha fakakaukau lelei ange mo ako ke fakatokangaʻi mo vahevahe ʻa e ongo moʻoni naʻá ku maʻú.
Ko Hono Fakaafeʻi ʻa e Maama ʻo e Ongoongoleleí
ʻI heʻeku tokanga makehe ki he ʻamanaki leleí, pea mo e tokoni fakapalōfesinale ki heʻeku moʻui lelei fakaeʻatamaí, naʻá ku fakapapauʻi ai te u kamata ʻa e fakaakeaké. Naʻe kamata ke mahino kiate au neongo naʻe ʻikai ke u haohaoa, ka te u lava ʻo tauhi hoku vā fetuʻutaki ʻi he nofo-malí ke mālohi, hoko ko ha tamai lelei, pea tokonaki maʻa hoku fāmilí, ʻi he tokoni ʻa e Tamai Hēvaní.
Naʻe poupouʻi foki au ʻe hoku uōtí ʻi heʻeku fua fatongia ʻi he kau pīsopelikí. ʻI heʻeku malava ke tokoniʻi e niʻihi kehé, ne u toe maʻu ai ha taumuʻa ʻe taha ki heʻeku moʻuí.
Ko ha tāpuaki fakaofo ʻe taha naʻá ne tokoniʻi au ke u ʻilo ʻa e māmá ko hono ako ʻeku tāpuaki fakapēteliaké. Naʻe fakamanatu mai ʻe he ngaahi leá ʻa e ngaahi talaʻofa kuo fai mai ʻe he Tamai Hēvaní kiate aú mo tokoniʻi au ke u ʻiloʻi te u lava ʻo tokonaki maʻa hoku fāmilí kapau te u fakamuʻomuʻa ʻa e ʻEikí.
Kuó u kamata ke lotu fakamātoato ange ke fakaafeʻi mai e maama ʻo e ongoongoleleí ki heʻeku moʻuí. ʻOku ou lau folofola ʻi he ʻaho kotoa pē. ʻOku ou feinga maʻu pē ke fakaafeʻi ʻa e Laumālié koeʻuhí ke u lava ʻo maʻu ha ngaahi fakakaukau ʻoku leleí mo fakatupulaki hoku vā fetuʻutaki mo hoku uaifí mo e fohá.
Naʻe akonaki ʻa ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
“ʻE lahi e ngaahi taimi ʻi heʻetau moʻuí ʻe hangē ʻoku uesia pe ʻātakaiʻi ai kitautolu ʻe he fakapoʻulí. …
“… ʻOku ou fakamoʻoni atu ko ʻetau ʻamanaki leleí ʻoku ʻia Sīsū Kalaisi! Ko Ia ʻa e moʻoní, haohaoá, mo e hūʻanga pau ki he maama fakalangí.
“ʻOku ou fakamoʻoni atu he ʻikai hanga ʻe he fakapoʻulí ʻo lavaʻi ʻa Kalaisi.”
ʻI he taimi ní ʻoku ou talanoa ki he Tamai Hēvaní ʻi he ʻaho kotoa pē. ʻI he taimi ʻoku ou faingataʻaʻia aí, ʻoku ou tūʻulutui ʻo fakahā ke Ne ʻiloʻi ʻoku ou kei feinga pē ʻaki hoku lelei tahá. ʻOku mahino kiate au he taimí ni neongo pe ko e hā e lahi ʻeku ongoʻi lōmekiná, te u lava maʻu pē ʻo tafoki ki hoku Fakamoʻuí ke maʻu ha tokoni.
ʻOku ʻikai ʻaupito ke u tuenoa moʻoni. Ko e fānau moʻoni au ʻa e ʻOtuá.
Pea ʻoku pehē pē mo koe.
Te Ke Lava ʻo Maʻu ʻa e Melinó mo e ʻAmanaki Leleí
ʻOku akoʻi mai ʻe he folofolá ʻoku mahuʻinga lahi ʻa e ngaahi laumālié ʻi he ʻao ʻo e ʻOtuá (vakai, Tokāteline mo e Ngaahi Fuakava 18:10). Pea ʻoku ʻofa lahi ʻa e Tamai Hēvaní ʻi Heʻene fānaú takitaha pea ʻokú Ne ʻafioʻi hotau ngaahi faingataʻaʻiá. Naʻa mo e taimi ʻoku faingataʻa ai ʻa e moʻuí, te tau lava maʻu pē ʻo tui te Ne tataki kitautolu ki he kakai totonú pea mo e ngaahi maʻuʻanga tokoni totonú.
ʻOku ou toe fakaongo atu ʻa e meʻa naʻe akoʻi ʻe Palesiteni Sefilī R. Hōlaní, ko e Palesiteni Leʻoleʻo ʻo e Kōlomu ʻo e Kau ʻAposetolo ʻe Toko Hongofulu Mā Uá: “Ko e hā pē meʻa ʻokú ke hohaʻa pe faingataʻaʻia aí, ʻoku ʻikai ko e talí ʻa e mate taonakitá. … ʻI ha māmani ʻoku fuʻu fiemaʻu ai ʻa e maama kotoa pē ʻe ala maʻú, ʻoua muʻa naʻá ke fakasiʻia e maama taʻengata naʻe foaki ʻe he ʻOtuá ki ho laumālié kimuʻa pea fakatupu e māmani ko ʻení. Talanoa ki ha taha. Kole ha tokoni. … Te ke lava ʻo kātekina ʻa e ngaahi faingataʻa ʻo e moʻui fakamatelié ni koeʻuhí te mau tokoniʻi koe ke ke kātekina kinautolu. ‘Okú ke mālohi ange ʻi he meʻa ʻokú ke mafakakaukauá. ʻOku maʻu ʻa e tokoní, mei he niʻihi kehé kae tautautefito mei he ʻOtuá. ‘Oku ʻofaʻi, fakamahuʻingaʻi mo fiemaʻu koe. ʻOku mau fiemaʻu koe!”
ʻI he kamataʻangá, naʻe ʻikai ke u fakatokangaʻi naʻá ku fefaʻuhi mo ʻeku moʻui lelei fakaeʻatamaí, kae ʻoua kuo aʻu ia ki ha tuʻunga fakatupu vaivai ʻaupito naʻe ʻikai ai ke u kei lava ʻo ngāue lelei. Kuo tokoniʻi au ʻe heʻeku ako ke talanoa fekauʻaki mo ʻeku ngaahi ongó mo e tokanga taha ki hoku Fakamoʻuí mo Hono mālohi faifakamoʻuí ke u toe ongoʻi ai e nongá mo ʻamanaki leleí ʻi heʻeku moʻuí.
ʻOku ou ʻiloʻi ʻe tokoniʻi foki mo koe ʻe he tokanga taha kiate Iá ke ke maʻu ʻa e fakamoʻuí.