“Ko e Kāmeni ʻo e Lakanga Fakataulaʻeiki Māʻoniʻoní,” Liahona, Sepitema 2024.
Ko e Kāmeni ʻo e Lakanga Fakataulaʻeiki Māʻoniʻoní
Kuo foaki mai kiate kitautolu ha fakamanatu fakatuʻasino toputapu ʻo ʻetau ngaahi fuakavá ko ha konga ʻo e ʻenitaumeni fakatemipalé—ko ha fakataipe ia ʻo e Fakamoʻuí Tonu.
Fakaikiiki mei he ʻĀtama mo ʻIvi, tā fakatātā ʻe Douglas M. Fryer
Neongo pe ko e hā ʻa e teuteu naʻe ʻoange kia ʻĀtama mo ʻIví pea mo e ongoʻi fakapapau naʻá na feinga ke manatuʻí, ʻoku pau pē naʻe fakaʻohovale kiate kinaua ke na mavahe mei heʻena Ngoue fakapalataisi ko ʻĪtení ke ʻalu atu ki ha māmani hinga.
Naʻá na toki ʻiloʻi fakamātoato ʻa e ʻuhinga ʻo e fakafetongi ʻena moʻui fiemālie mo tauʻatāiná ʻaki ha māmani ʻo e fakafepaki mo e tautaʻa, ʻakau talatala mo e mamahi—pea iku ʻo hoko ki ha meʻa naʻe ui ko e maté. Naʻe ʻikai ke na mei ʻilo ʻi he kamataʻangá ʻa e ʻuhinga kotoa ʻo e ngaahi meʻá ni, ka naʻe ʻikai fuoloa kuó na ʻiloʻi ʻe lava ke ʻomi ʻe he ʻaho takitaha ha mamahi foʻou. Ko e moʻoni, ko e fakamamahi tahá ʻa e ʻiloʻi ko ia te na fehangahangai mo e meʻa kotoa ko ʻení ʻokú na mavahe mei heʻena Tamai ʻi Hēvaní—“kuo toʻo ʻa kinaua mei hono ʻaó,” ʻa ia naʻe toki lekooti ʻe Mōsese kimui ange.
Koeʻuhí ko e māvae mo e taʻelata ko ʻení ʻi ha māmani momoko mo fakataʻelatá, ʻoku pau pē naʻe fakafiemālie lahi kia ʻĀtama mo ʻIvi ke na manatuʻi ha meʻa ʻe taha: ʻa ia kuo fai ha ngaahi talaʻofa—ko ha meʻa toputapu mo taʻengata naʻe ui ko e ngaahi fuakavá. Naʻá na ʻosi palōmesi te na talangofua ki he Tamaí ʻi he kotoa ʻo ʻena moʻuí, pea naʻá Ne talaʻofa ke ʻomi ha Fakamoʻui, ʻa ia te Ne fakafiemālieʻi hona mamahí mo e faingataʻaʻiá, fakalelei maʻa ʻena ngaahi fehalākí, pea fakafoki lelei kinaua ki Hono ʻaó.
Ka ʻe manatuʻi fēfē ʻe he ongo fakamatelie ko ʻení ʻa e meʻa kuó na palōmesi ke faí? ʻE founga fēfē haʻana kei ʻiloʻi hona tūkunga fakatuʻutāmakí—ʻiloʻi ʻi he taimi kotoa pē, ʻaho mo e pō?!
Ko ha Fakamanatu ʻo ʻEna Ngaahi Fuakavá
Koeʻuhí ko ha fakamanatu pehē naʻá Ne ʻoange kiate kinaua ha “kofu kiliʻimanu.” Ko ha meʻaʻofa mahuʻinga ʻeni pea naʻe taimi totonu. Hili hono kai ʻe ʻĀtama mo ʻIvi ʻa e fua naʻe tapuí, naʻá na meimei ʻiloʻi ʻi he taimi pē ko iá naʻá na telefua. ʻUluakí, naʻá na feinga ke ʻufiʻufi hona telefuá ʻaki ʻa e lou fikí. Pea ʻi heʻena manavasiʻi naʻa ʻikai ke feʻunga iá, naʻá na feinga ke toitoi mei he ʻEikí. (Ko e faʻahinga feinga fakavalevale peheé ko ha fakamoʻoni ia naʻe hoko mai ʻa e tuʻunga fakamatelié!) Mei he momeniti ko iá ʻo aʻu mai ki he lolotongá ni, kuo fakaafeʻi ʻe ha Tamai ʻofa ʻa ʻEne fānaú ke nau omi, mei he toitoí, kiate Ia. Pea hangē ko e ngaahi kofu kiliʻimanu ʻi he taimi ko iá mo e ngaahi vala kehekehe talu mei aí, koeʻuhí ko ʻEne ʻaloʻofá kuo teʻeki ai ke Ne liʻaki kitautolu ke telefua ka kuó Ne fakakofuʻi ʻa e talangofuá ʻaki ha “kofu tōtōlofa ʻo e māʻoniʻoní,” ko ha fakamanatu ʻo ʻetau ngaahi palōmesí mo e ngaahi fuakavá. ʻOku fakataipe ʻe he “[ngaahi] kofu [ko ʻeni] ʻo e fakamoʻuí” ʻa e meʻaʻofa maʻongoʻonga tahá, ʻa e Fakalelei ʻa Sīsū Kalaisí.
Ko e Kāmení ko ha Fakataipe ia ʻo e Fakamoʻuí
Ko e moʻoni, ko e fakakaukau kotoa ko ʻeni fekauʻaki mo ʻĀtama mo ʻIvi mo e ngaahi fuakavá mo e valá, ʻoku mahulu hake ia ʻi ha fakamālohisino fakaʻatamai pē. ʻOku ʻikai faingataʻa ke fakakaukauloto ki he ongo naʻe maʻu ʻe ʻĀtama mo ʻIví, he ʻoku tau fehangahangai foki mo kitautolu mo ha ngaahi faingataʻa ʻi he māmani hingá ni. Kuo fakamavaheʻi foki mo kitautolu mei he ʻao ʻo e ʻOtuá, pea ʻoku tau toe fakamamaʻo ange ʻi he taimi kotoa pē ʻoku tau maumaufono aí. Hangē ko ʻĀtama mo ʻIví, kuo foaki mai kiate kitautolu ʻa e Fakamoʻui tatau ko iá, ʻa Sīsū Kalaisi ʻo Nāsaletí, ʻĀlifá mo e ʻŌmeká, ko e ʻAlo ʻo e ʻOtua moʻuí. Hangē ko ʻĀtama mo ʻIví, kuo tau fai ha ngaahi fuakava mo e ʻOtuá. Pea ko e konga ʻo e ʻenitaumeni fakatemipalé, kuo foaki mai ai kiate kitautolu ha fakamanatu fakatuʻasino toputapu ʻo e ngaahi fuakavá—ko ha fakataipe ʻo e Fakamoʻuí Tonu. ʻOku ui ia ʻi hotau kuonga fakakosipelí ko e kāmeni ʻo e lakanga fakataulaʻeiki māʻoniʻoní.
ʻOku tau tui ʻa e kāmeni ko ʻení ʻi loto ʻi hotau vala ʻi tuʻá. Ko e hā pē ha fatongia ʻoku ou maʻu, ko e hā pē hoku tuʻunga ʻi he moʻuí, ko e hā pē ʻa e ngaahi tufakanga ʻo e moʻui fakaʻahó ʻoku fiemaʻú, ʻoku ʻi loto kotoa ai ʻeku ngaahi fuakavá—maʻu ai pē pea taʻengata. ʻOku ʻi loto ʻi he ngaahi meʻa kotoa ko iá ʻa e ngaahi talaʻofa toputapu ko ia ʻoku ou pikitai ki aí. ʻOku ʻikai fakahāhā pe fakaʻaliʻali ʻa e kāmení ʻi he ʻao ʻo e māmaní, pea ʻoku ʻikai pehē foki mo ʻeku ngaahi fuakavá. Ka ʻoku ou tauhi pē kinaua fakatouʻosi ke ofi kiate au—ʻi he ofi taha te u ala lavá. ʻOkú na mātuʻaki fakataautaha mo toputapu ʻaupito.
ʻI heʻetau manatuʻi ʻa e ngaahi fuakava ko iá, ʻa e ngaahi fefuakavaʻaki ko iá, ʻoku tau tui ʻa e kāmení ʻi he kotoa ʻo ʻetau moʻuí. ʻOku fakahaaʻi ʻe he tōʻonga ko ʻení ʻetau holi ke hoko ʻa e Fakamoʻuí ko ha ivi tākiekina maʻu pē ʻi heʻetau moʻuí. ʻOku ʻi ai mo ha ngaahi fakataipe ʻofeina kehe ʻoku faʻa hoko. ʻOku papitaiso tuʻo taha kitautolu ʻi heʻetau moʻuí. ʻOku tau maʻu ʻa e sākalamēnití tuʻo taha ʻi he uike. ʻOku tau ʻalu ki he temipalé ʻo fakatatau mo e ngaahi tūkunga ʻoku tau ʻi aí. Ka ʻoku kehe ʻa e kāmeni ia ʻo e lakanga fakataulaʻeiki māʻoniʻoní: ʻoku tau fakaʻapaʻapaʻi ʻa e fakataipe ko ʻení ʻi he ʻaho mo e pō kotoa pē.
Pea ko e founga ia ʻo e ngaahi fuakavá—ʻoku ʻikai tukunoaʻi ia koeʻuhí he ko e meʻa ia ʻoku fakafiemālié pe ko haʻate taʻetokanga pea ʻoku ʻikai liliu ia ke feʻunga mo e sīpinga mo e ākenga ʻa e sōsaietí. ʻI he moʻui ʻa ha ākonga ʻa Sīsū Kalaisí, kuo pau ke liliu ʻa e ngaahi founga ʻa e māmaní ke fenāpasi mo ʻetau ngaahi fuakavá, kae ʻikai ko hono fehangahangaí.
ʻI he taimi ʻoku tau tui ai ʻa e kāmení, ʻoku tau tui ai ha fakataipe toputapu ʻo Sīsū Kalaisi, hangē ko ia kuo akoʻi ʻe he Kau Palesitenisī ʻUluakí. ʻI heʻene peheé, ko e hā ʻa e ʻuhinga ka tau ka kumi ʻuhinga ai ke toʻo ʻa e fakataipe ko iá? Ko e hā ka tau ka toʻo ai meiate kitautolu ʻa e talaʻofa ʻo e mālohi, maluʻi, mo e ʻaloʻofa ʻoku fakafofongaʻi ʻe he kāmení? ʻI he tafaʻaki ʻe tahá, ko e taimi pē ʻoku fiemaʻu ai ke tau toʻo fakataimi ʻa e kāmení, ʻoku totonu ke tau vēkeveke ke toe tui ia, ʻi he vave taha ʻe ala lavá, koeʻuhí he ʻoku tau manatuʻi ʻa e ngaahi talaʻofa mo e ngaahi fakatuʻutāmaki fakatouʻosi ʻokú ne ʻomi ai ʻa e ʻuhinga ki heʻetau ngaahi fuakavá. Kae hiliō aí, ʻoku tau manatuʻi ʻa e kolosí mo e ngeʻesi fonualoto ʻo Kalaisí.
Mahalo ʻe pehē ʻe ha niʻihi, “ʻOku ʻi ai ha ngaahi founga kehe ke u manatuʻi ai ʻa Sīsū.” Pea te u tali atu, ʻoku fakaʻofoʻofa ia. Ko e lahi angé ko e leleí ange ia. Tau fakakaukau ki he lahi taha te tau lavá ke tauhi ʻetau tukupā ke “manatu maʻu ai pē kiate iá.” Ka ʻi heʻetau fai iá, ʻe taʻefaitotonu ia ke fakataumuʻa ke taʻetokanga ki he fakamanatu naʻe fai ʻe he ʻEikí Tonu ki he kau maʻu ʻenitaumení, ʻa e kāmeni ʻo e lakanga fakataulaʻeiki māʻoniʻoní.
ʻOku mahuʻinga ʻaupito ʻa Sīsū Kalaisi mo ʻEne ongoongoleleí kiate au. Ko ʻeku ngaahi ʻamanaki mo e fakaʻamu taʻengata kotoa pē, ʻa e meʻa kotoa pē ʻoku ou mahuʻingaʻia aí, ʻoku fakafalala ia kiate Ia. Ko Ia ʻa e “maka ʻo hoku fakamoʻuí,” ko ʻeku founga ia ke u lava ai ʻo hū ki heʻeku Tamai Hēvaní, ko ʻeku founga pē ia ʻe taha te u lava ai ʻo foki ki he meʻa naʻá ku maʻu kimuʻá pea ʻoku ou toe fiemaʻu ʻi he taimi ní, fakataha mo ha ngaahi meʻa lahi ange. Ko ʻEne meʻaʻofa kiate kitautolú ko e meʻaʻofa lahi taha ia kuó u maʻú, ko e foaki lahi taha kuo foakí—ʻa ia naʻe fakatau ʻaki ʻa e faingataʻaʻia taʻe-fakangatangatá, ʻo fakaaʻu ki ha kakai taʻefaʻalaua, pea foaki ʻaki ʻa e ʻofa taʻefakangatangatá. Ko e ʻakau talatalá mo e talatalaʻāmoá, ko e mamahí mo e faingataʻaʻiá, ko e loto-mamahi mo e angahala ʻo e māmani hinga ko ʻení ʻoku “folo hifo [kotoa ia] ʻia Kalaisi.”
Ko ia kuó u tui ʻa e kāmeni ʻo e lakanga fakataulaʻeiki māʻoniʻoní—ʻi he ʻaho mo e pō kotoa pē talu mei hono maʻu hoku ʻenitaumení ʻi he taʻu ʻe 64 kuohilí, ʻi hoku taʻu 19—koeʻuhí ʻoku ou ʻofa ʻiate Ia pea koeʻuhí ʻoku ou fiemaʻu ʻa e ngaahi talaʻofa ʻokú ne fakafofongaʻí.
Ngaahi Fehuʻi fekauʻaki mo Hono Tui ʻo e Kāmení?
Mahalo ʻoku ʻi ai ha niʻihi ʻiate kimoutolu ʻoku mou lau ʻa e fakamatala ko ʻení mo ʻamanaki te u tali ha fehuʻi pau fekauʻaki mo e kāmení. Mahalo te mou ʻamanaki ki ha “ʻOku folofola peheni ʻe he ʻEikí”—pe ko ha “ʻOku pehē Heʻene kau tamaioʻeikí”—fekauʻaki mo ha meʻa ʻoku fifili ki ai homou lotó. Mahalo ʻe tupu homou fehuʻí mei ha tūkunga fakataautaha fekauʻaki mo e ngāue maʻuʻanga moʻuí, fakamālohisinó, haisiní, ʻeá, teunga tāú, ngaahi falemālōlō ʻi he feituʻu fakapuleʻangá (sanitary facilities), pea naʻa mo ha tuʻunga fakafaitoʻo.
ʻE lava ke maʻu ʻa e ngaahi tali ʻe niʻihi ki he faʻahinga fehuʻi pehení ʻi he temples.ChurchofJesusChrist.org pea ʻi he konga 38.5 ʻo e Tohi Tuʻutuʻuni Fakakātoá. ʻE lava ke fai ha talanoa ki he kau mēmipa falalaʻanga ʻo e fāmilí mo e kau takí fekauʻaki mo ha meʻa fakataautaha. Ka neongo ia, ʻoku ʻi ai ha fakahinohino mahino ʻaupito ʻoku ʻomi ʻi he ngaahi ouau ʻinisitolí, pea ʻoku ʻi ai maʻu pē hoʻo Tamai Hēvaní ʻo taʻengata pea ʻokú Ne ʻafioʻi mo ʻofa ʻiate koe pea ʻoku mahino kiate Ia ʻa e meʻa kotoa pē fekauʻaki mo ho ngaahi tūkungá. Te Ne hōifua ke ke ʻeke fakataautaha kiate Ia ʻa e ngaahi fehuʻi ko ʻení.
Tā ʻo e taua ʻo e Temipale St. George Utah
Kātaki, ʻoua naʻa mou maʻuhala. ʻI hoʻomou fekumi ki ha fakahinohino fakalangí, he ʻikai ueʻi kimoutolu ʻe he Laumālié ke siʻisiʻi ange hoʻomou muimui ki he fakahinohino ʻoku maʻu ʻi he temipalé pea mo e faleʻi fakaepalōfita naʻe vahevahe ʻe he Kau Palesitenisī ʻUluakí ʻi heʻenau fakamatala fakamuimuitahá. He ʻikai tokoniʻi koe ʻe ha Tamai ʻofa ke ke kumi ʻuhinga ʻo fai ha meʻa ʻe siʻisiʻi ange ʻi he meʻa te ke lavá ke fakafenāpasi mo ʻEne ngaahi tuʻunga moʻui ʻo e moʻui līʻoá mo e teunga tāú ʻa ia te ne tāpuakiʻi koe ʻi he taimí ni pea aʻu ʻo taʻengatá. Ka ʻoku mahino nai kiate Ia hoʻo ngaahi fehuʻí, pea te Ne tokoni nai ke ke maʻu ʻa e ngaahi tāpuaki ʻo hono fakaʻapaʻapaʻi ʻo e kāmení mo hono tauhi hoʻo ngaahi fuakavá? ʻIo! ʻOku totonu nai ke ke talanoa mo ha kau mataotao fakafaitoʻo mo e kau palōfesinale ʻi he moʻui leleí ʻi he taimi ʻe fiemaʻu aí? ʻIo! ʻOku totonu nai ke ke taʻetokanga ki he fakakaukau fakapotopotó pe tokanga ki he ngaahi meʻa ʻoku ʻikai mahuʻingá? ʻOku ou lotua ke ʻoua naʻá ke fai ia.
He ʻikai ke u lava ʻo tali ʻa e fehuʻi kotoa pē ʻokú ke maʻú. ʻOku ʻikai foki ke u lava au ʻo tali ʻa e fehuʻi kotoa pē ʻoku ou maʻú. Ka ʻi heʻeku hoko ko ha ʻAposetolo ʻa e ʻEiki ko Sīsū Kalaisí, ʻoku ou lava ʻo palōmesi atu ʻa e tokoni ʻa ha ʻOtua ʻofa, ʻokú Ne fekumi ki hoʻo lavameʻá mo e tāpuaki kotoa pē, ʻi ha ngaahi founga he ʻikai te ke lava ʻi he taimí ni ʻo makupusi pe ʻiloʻi, ʻi hoʻo tauhi ʻa e ngaahi fuakava kuó ke fai mo Iá.