“ʻOku Tataki Kitautolu ʻe he Palōfitá kia Sīsū Kalaisi,” Liahona, Sepitema 2024.
ʻOku Tataki Kitautolu ʻe he Palōfitá kia Sīsū Kalaisi
ʻOku ʻiloʻi ʻe he palōfitá ʻa e halá koeʻuhí he ʻokú ne ʻiloʻi ʻa Sīsū Kalaisi, ʻa ia “ko e halá, mo e moʻoní, pea mo e moʻuí” (Sione 14:6).
Fekumi ki he Toko Tahá, tā fakatātā ʻa Liz Lemon Swindle, ʻoua naʻa hiki hano tatau
Naʻá ku maʻu meʻatokoni hoʻatā ʻi ha ʻaho ʻe taha ʻi he falekai ʻa e ʻŌfisi Pule ʻo e Siasí mo ha toko tolu ʻo hoku kaungāngāue ʻi he Kau Fitungofulú. Lolotonga ʻemau kaí, ne haʻu ʻa Palesiteni Lāsolo M. Nalesoni ki homau tēpilé mo ʻene poulu supó peá ne pehē mai, “ʻE lava ke u tangutu fakataha mo kimoutolu?”
Naʻa mau pehē kotoa atu, “ʻIo Palesiteni!” Ko hai ia ʻe taʻe fie maʻu meʻatokoni hoʻatā fakataha mo e palōfitá?
Lolotonga ʻemau kaí, naʻe vahevahe ʻe Palesiteni Nalesoni ha ngaahi aʻusia naʻá ne maʻu ʻi he ngaahi fonua lahi kuó ne ʻaʻahi ki aí peá ne talanoa fekauʻaki mo ha kakai kuo nau ueʻi fakalaumālie ia. Naʻá ne angalelei, poto, mo angaʻofa.
ʻI he ʻosi ʻemau maʻu meʻatokoni hoʻataá, naʻá ku tafoki kia Palesiteni Nalesoni ʻo pehē ange, “Palesiteni, ʻoku ʻikai ke u ʻilo pe te u toe tangutu fakataha mo koe ʻi he tēpile tatau ʻi he kahaʻú. Ka ʻi he efiafi ní, te u sio ki hoku uaifí mo e fānaú pea te u talaange ne u maʻu meʻatokoni hoʻatā fakataha mo e palōfitá. ʻOku ou ʻiloʻi te nau fehuʻi mai, ʻKo e hā e meʻa naʻá ne tala atu ke talamai kiate kimautolú?’ Palesiteni, ko e hā ha meʻa ʻokú ke loto ke u tala ki hoku uaifí mo e fānaú?”
Naʻe sio mai ʻa Palesiteni Nalesoni kiate au ʻi ha kiʻi taimi siʻi. Naʻá ku vēkeveke ke fanongo ki he meʻa te ne talamaí! Naʻá ne pehē mai, “ʻOku ʻi ai ha foʻi lea ʻe fā te u tala atu kiate koe. Talaange ki ho fāmilí naʻá ku tala atu, ʻTauhi e ngaahi fekaú.’”
Kuo tau ʻosi fanongo kotoa ki he faleʻi ko ʻení meia Palesiteni Nalesoni kimuʻa, ka ʻi he momeniti ko iá, ne u ongoʻi ha fakamoʻoni mālohi mo fakataautaha ko Palesiteni Nalesoní ko e palōfita moʻoni ia. Naʻá ku fakamālō ange kiate ia, pea kimui ange ʻi he ʻaho ko iá ne u talaange ki hoku fāmilí ʻa e meʻa naʻe hokó. Naʻe ngaohi ʻe heʻema fānaú kimui ange ha ngaahi sitika ʻoku tohi ai ʻa e “Tauhi e Ngaahi Fekaú” pea fakapipiki ia ʻi heʻemau ʻaisí mo e sioʻatá ke fakamanatu mai kiate kimautolu ʻa e meʻa naʻe lea ʻaki ʻe Palesiteni Nalesoní.
Talu mei ai mo ʻeku fakalaulauloto ki he faleʻi ʻa Palesiteni Nalesoní. ʻI he taimi ʻoku tau tauhi ai e ngaahi fekaú, ʻoku tau fakahaaʻi ai ʻetau ʻofa ki he Tamai Hēvaní pea mo e Fakamoʻuí. ʻOku tau ʻunu ke ofi ange kiate Kinaua pea nofo maʻu ʻi Heʻena ʻofá. (Vakai, Sione 14:21; 15:10.)
Kuo fakapapauʻi mai kiate au ʻe he aʻusia ko ʻeni mo e palōfitá ha foʻi moʻoni loloto mo mahuʻinga fakalaumālie. ʻOku tau hiva ʻi he Palaimelí, “Muimui he palōfitá, ʻilo ʻe ia e halá.” ʻOkú Ne ʻiloʻi ʻa e halá! ʻOku ʻiloʻi ʻe he palōfitá ʻa e halá koeʻuhí he ʻokú ne ʻiloʻi ʻa e Fakamoʻuí, ʻa ia “ko e halá, mo e moʻoní, pea mo e moʻuí” (Sione 14:6). ʻI he taimi ʻoku tau muimui ai ki he palōfitá, ʻoku tataki ai kitautolu kia Sīsū Kalaisi.
Ko e Fatongia Toputapu ʻo e Kau Palōfitá
Kuo foaki ʻe he ʻEikí ha fatongia mahuʻinga mo toputapu ki he kau palōfitá ʻo tatau pē ʻi he kuonga muʻá pea mo hotau kuongá ni. ʻOku tau lau ʻi he folofolá “ko e moʻoni ʻe ʻikai fai ha meʻa ʻe [he ʻEiki] ko e ʻOtuá, kae taʻe fakahā ia ki heʻene kau tamaioʻeikí ko e kau palōfitá” (Joseph Smith Translation, Amos 3:7).
ʻI he tohi ʻa ʻIsikielí, ʻoku tau ako lahi ange ai fekauʻaki mo e meʻa ʻoku fiemaʻu mei he kau palōfitá. Naʻe folofola ʻa e ʻEikí ki he palōfita ko ʻIsikielí, “Kuó u tuku koe ko e leʻo ki he fale ʻo ʻIsilelí; ko ia te ke fanongo ki he folofola mei hoku fofongá, peá ke valokiʻi ʻa kinautolu meiate au” (ʻIsikieli 33:7).
Hangē ko e kau tangata leʻo ʻi ha tauá, ʻoku maʻu ʻe he kau palōfitá ʻa e fekau makehe ke hoko ko e tangata lea ʻa e ʻEikí pea talaki ʻa e meʻa kuó Ne fakahā kiate kinautolú. ʻOku finangalo ʻa e ʻEikí ke hoko ʻEne kau palōfitá ko ha kau tangata tui, kau tangata angatonu, mo ha kau tangata ʻoku taʻe-ilifia.
Fakatātā ʻo Samuela ko e Tangata Leimaná tā fakatātā ʻa Dan Burr
Hangē ko ʻení, naʻe fakahaaʻi ʻe Samuela ko e Tangata Leimaná ʻa ʻene līʻoa kakato kia Sīsū Kalaisí ʻi he taimi naʻá ne tuʻu ai ʻi he funga ʻaá ʻo talaki ki he kau Nīfaí ʻa e ngaahi meʻa kuo fakahū ʻe he ʻEikí ki hono lotó (vakai, Hilamani 13:4).
Naʻe pehē ʻe Samuela, “Pea vakai, kuo fakahā mai ia ʻe ha ʻāngelo ʻa e ʻEikí kiate au, pea naʻá ne ʻomi ʻa e ngaahi ongoongo fakafiefia ki hoku laumālié. Pea vakai, kuo fekauʻi mai au kiate kimoutolu ke fakahā ia kiate kimoutolu foki, koeʻuhí ke mou maʻu ʻa e ngaahi ongoongo fakafiefiá; kae vakai ʻoku ʻikai te mou fie tali au (Hilamani 13:7).
ʻOku fakaofo kiate au hono fakamoʻoniʻi loto-toʻa ʻe Samuela ʻa e moʻoní—ʻo aʻu pē ki he taimi naʻe hanga ai ʻe he kau Nīfaí ʻo “tolongaki ia ʻaki ʻa e ngaahi maka … pea … nau fana foki kiate ia ʻaki ʻa e ngaahi ngahau ʻi heʻene tuʻu ʻi he funga ʻaá” (Hilamani 16:2). ʻOku tau mātā ʻa e loto-toʻa ko ʻení ʻi he kau palōfita, kau tangata kikite, mo e kau tangata maʻu fakahā ʻo e ʻaho ní.
Ko Hono Ngaohi e Māmaní ke Hoko ko ha Feituʻu Lelei Ange
Ne u fetaulaki kimuʻa atu mo ha ongomeʻa ʻi ha konifelenisi fakasiteiki ʻi Nesivila, Tenesī, USA. Naʻe tupu hake pē ʻa e uaifí ʻi he Siasí ʻi he kotoa ʻo ʻene moʻuí. Naʻe ʻikai mēmipa ʻa e husepānití ʻi he Siasí.
Naʻá na haʻu kiate au, pea pehē mai ʻe he husepānití, “Kuó u mateuteu ke papitaiso.”
Ne u fiefia ke fanongo ki ai! Naʻá ku fehuʻi ange, “Ko e hā e meʻa naʻe liliú?”
Naʻá ne talamai, “ʻI heʻeku fanongo ki he pōpoaki ʻa Palesiteni Nalesoni ʻi he konifelenisi lahí, naʻe ongo moʻoni ia kiate au. Naʻá ku ʻiloʻi leva he taimi ko iá ko e palōfita ia. Naʻá ku maʻu ha fakamoʻoni, pea kuó u mateuteu he taimí ni ke papitaiso.”
ʻOku ou ʻiloʻi foki ha fefine ʻi Keipi Kousi, Kana, naʻá ne mamata he konifelenisi lahí. Kuo teʻeki ai ke ne fanongo ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ka naʻá ne mālieʻia ʻaupito ʻi he meʻa naʻá ne mamata mo fanongo ki ai mei he kau palōfita, kau tangata kikite, mo e kau tangata maʻu fakahaá. Hili pē iá, naʻá ne fekumi leva ki he Siasí. Naʻá ne ʻilo ha falelotu peá ne fakataha mo e ongo faifekaú. Naʻe iku ʻo ne papitaiso. Kimuí ni maí, naʻá ne toki ʻomi hano ʻū tā ʻo ʻene ʻalu ki he temipalé ke maʻu hono ʻenitaumení.
ʻOku fakahaaʻi mai ʻe he ongo sīpinga ko ʻení ʻa e founga ʻoku mālohi ai e pōpoaki ʻa e palōfitá ki he māmaní! Kapau ʻe tokanga ʻa e tokotaha kotoa pē ki heʻene pōpoakí, ʻe nonga ʻaupito ʻa e māmaní. Te tau tokanga taha kotoa pē ki he meʻa ʻoku mahuʻinga tahá, kau ai hono fakatupulaki ha vā fetuʻutaki mo e Tamai Hēvaní pea mo Hono ʻAlo ko Sīsū Kalaisí, pea mo hono langaki ha ngaahi fāmili ʻoku mālohi mo taʻengatá. Te tau fakahoko foki hotau tuʻunga lelei tahá koeʻuhí he te tau tauhi e ongo fekau lahi ʻe uá: ke ʻofa ki he ʻOtuá mo ʻofa ki hotau kaungāʻapí (vakai, Mātiu 22:37–39). Te tau ʻomi ʻa Saione, ko ha sosaieti ʻoku ikuna ai e ʻofá, anga-māʻoniʻoní, mo e uouangatahá, ʻo fakahaaʻi ai ʻa e laumālie ʻo e tuʻunga fakaākongá (vakai, Tokāteline mo e Ngaahi Fuakava 82:14).
ʻI he taimi ʻoku tau muimui ai ki he palōfitá, ʻe lava ke tau falala ʻoku tau fai e meʻa ʻoku finangalo ʻa e ʻOtuá ke tau faí koeʻuhí ʻoku muimui ʻa e palōfitá—pea ʻokú ne tokoniʻi kitautolu ke tau muimui—kia Sīsū Kalaisi. ʻOku ʻuhingamālie ʻa e meʻa kotoa pē ʻi he moʻuí koeʻuhí ko Sīsū Kalaisi. “Te tau lava ʻo ongoʻi fiefia ʻo tatau ai pē pe ko e hā e meʻa ʻoku hokó—pe ʻikai ke hoko—ʻi heʻetau moʻuí.” ʻI heʻetau muimui ki he palōfitá, te tau lava moʻoni ai ʻo ngaohi ʻa e māmaní ke hoko ko ha feituʻu lelei ange.
Kumi ʻa e Ngaahi Tāpuaki Kuo Talaʻofa Maí
ʻI he taimi naʻe tuli ai e Kāingalotú mei Ketilani, ʻOhaioó, naʻe tuku ʻe he Kau Palesitenisī ʻUluakí kia ʻŌliva Kelenisā ke ne fakatau atu ʻa e ʻū kelekele ʻo e Kāingalotú pea ke totongi ʻa e ngaahi moʻua ʻo e Siasí. Naʻe tali ʻe ʻŌliva, ko ha tangata angamaheni pē naʻe meimei kui hono fofongá koeʻuhí ko e momokó, ʻa e ngāue faingataʻa ko ʻení koeʻuhí he naʻe kole ange ʻe he Palōfita ko Siosefa Sāmitá mo e kau taki kehé. Naʻe kātekina ʻe ʻŌliva ha ngaahi faingataʻa lahi, pea naʻe mahuʻingaʻia ʻa e ʻEikí ʻi heʻene feilaulaú mo e ngaahi ngāué.
Naʻe folofola ʻa e ʻEikí ʻo pehē, “ʻOku ou manatuʻi ʻa ʻeku tamaioʻeiki ko ʻŌliva Kelenisaá. Vakai, ko e moʻoni ʻoku ou pehē kiate ia ʻe tauhi hono hingoá ke manatua ʻi he ʻapasia mei he toʻu tangata ki he toʻu tangata, ʻo taʻengata pea taʻengata. …
“… Pea ʻo ka ne ka hinga, te ne toe tuʻu hake pē, koeʻuhí he ʻe toputapu ange kiate au ʻa ʻene feilaulaú ʻi heʻene tupulakí” (Tokāteline mo e Ngaahi Fuakava 117:12–13).
Naʻe poupouʻi ʻe ʻŌliva mo hono uaifi ko Litiá ʻa e palōfitá, pea naʻe ʻafioʻi ʻe he ʻEikí kuo fai ʻe ʻŌliva hono lelei tahá neongo kapau naʻe ʻikai ke ne faʻa lavameʻa maʻu pē. Naʻe fakamamafaʻi ʻe he ʻEikí ʻa e mahuʻinga ange ʻene ngaahi ngāué ʻi heʻene lavameʻá.
ʻI heʻeku hoko ko ha faifekaú pea aʻu pē ki he taimí ni, ʻoku ʻikai ke u manatuʻi kuo lahi ha meʻa kuó u fanongo ai fekauʻaki mo ʻŌliva Kelenisā, ka ʻoku ʻasi hono hingoá ʻi he folofolá koeʻuhí he naʻá ne talangofua ki he fakahinohino ʻa e palōfitá peá ne maʻu ai e ngaahi tāpuaki ne talaʻofa angé—ʻoku manatua toputapu hono hingoá. ʻOku tau ako meia ʻŌliva Kelenisā neongo ʻoku maʻu ʻa e fakahinohinó mei ha maʻuʻanga tokoni fakalangi (fakafou ʻi he kau palōfitá), ka ʻoku ʻikai ke ne fakapapauʻi mai ʻe tokalelei e halá mo ʻikai ha ngaahi faingataʻa, ka ko e ngaahi talaʻofá ʻoku pau ia (vakai, ʻAlamā 37:17).
Naʻe mei fēfē nai ʻetau moʻuí kapau naʻe ʻikai ha kau palōfita? ʻOku fakafofongaʻi ʻe he palōfita moʻuí mo e Palesiteni ʻo e Siasí ha laine fetuʻutaki hangatonu mei he ʻOtuá ki Hono kakaí pea ko ia pē ʻi he māmaní ʻokú ne maʻu ʻa e fakahā ke tataki ʻaki ʻa e Siasí hono kotoa. ʻOkú ne toe ʻomi foki ha fakahā hokohoko mei he ʻOtuá ke tokoniʻi kitautolu ke tau ikunaʻi e ngaahi faingataʻa ʻo hotau kuongá. ʻI heʻetau muimui ki he faleʻi ʻa e palōfitá, te tau lava ai ʻo maʻu ʻa e melinó, fiefiá, mo ha fakahinohino ʻi heʻetau moʻuí ʻi heʻetau fāifeinga ke hoko ʻo hangē ko Sīsū Kalaisí. (Vakai, Tokāteline mo e Ngaahi Fuakava 21:4–6.)
Tau tali muʻa ʻa e ngaahi akonaki mo e tā-sīpinga ʻa e kau palōfita ʻo onopōní, ʻi heʻetau ʻiloʻi ko ha ngaahi meʻangāue kinautolu ʻi he toʻukupu ʻo e ʻOtuá pea ʻoku nau tataki kitautolu ki he ngaahi tāpuaki taʻengatá. ʻOku ou ʻofa ʻiate kinautolu pea ʻoku ou hūfia kinautolu. ʻOku ou fakafetaʻi ʻi heʻeku ʻiloʻi ʻoku ueʻi fakalaumālie kinautolu pea ʻoku nau tokoni ke tataki kitautolu mo hotau ngaahi fāmilí ki hotau Fakamoʻui ko Sīsū Kalaisí.