Lāsolo M. Nalesoni: Ko Ha Palōfita Maʻa Hotau Kuongá

Fai ʻe Palesiteni Dallin H. Oaks

Tokoni ʻUluaki ʻi he Kau Palesitenisī ʻUluakí

ʻI heʻetau maʻu ha palōfita ke ne tataki kitautolu ʻi he ngaahi ʻaho kimui ní, ko ha kakai monūʻia moʻoni kitautolu.

Ko e feʻiloaki ʻa Palesiteni Lāsolo M. Nalesoni mo e kakaí hili ha fakataha lotu ʻi Singapoa ʻi he ʻaho 20 ʻo Nōvema 2019.

ʻI he taimi naʻe fakaangaʻi ai ʻe ha tokotaha fakaʻekeʻeke ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko ha “siasi ʻeni ia ʻoku fakalele ʻe ha kau tangata toulekeleká,” naʻe tali ange ʻe Palesiteni Kōtoni B. Hingikelī (1910–2008) ʻo pehē, “Hono ʻikai fakaʻofoʻofa ke ʻi ai ha tangata matuʻotuʻa ʻi he fohé, ha tangata ʻoku fakakaukau lelei pea ʻoku ʻikai ueʻi ngofua ʻe he matangí ke feliliuaki ʻa e tokāteliné?”

Ko Palesiteni Lāsolo M. Nalesoni ʻa e tangata ko iá, ʻa e palōfita moʻui toulekeleka taha ke ngāue ʻi he kuonga fakakosipeli ko ʻení. ʻOku hokosia hono taʻu 100 ʻi he ʻaho 9 ʻo Sepitema 2024. Ko ha takimuʻa fisifisimuʻa ia ʻo e manavaʻofá mo e ʻulungaanga leleí, fakakaukau mahinó mo e ivi lahí, anga-fakakaumeʻá mo e potó.

ʻOku ou ʻofa ʻia Palesiteni Nalesoni. Kuó ma kaungāmeʻa ʻi ha taʻu ʻeni ʻe 60 peá ma kaungā ʻAposetolo ʻi ha taʻu ʻe 40. Kuó u mohu tāpuekina ke ngāue ʻi he malumalu ʻo ʻene fakahinohino ʻi he Kau Palesitenisī ʻUluaki ʻo e Siasí, talu mei Sānuali 2018.

Kuo ui ʻa Palesiteni Nalesoni ke ne tataki ʻa e Siasi ʻo Sīsū Kalaisi kuo fakafoki maí pea hoko ko hono faiako tuʻu-ki-muʻa, ʻokú ne ʻiloʻi ʻa e Fakamoʻuí, ʻa ia ʻokú ne hoko ko ʻEne palōfitá. Kuó ne fakalakalaka ʻi he ngāue fakapalofesinalé mo e ngāue fakakautaú ʻi ha senituli ʻo e moʻuí mo e akó. Kuó ne hoko ko ha takimuʻa ʻofa mo lavameʻa ki hono fāmili tokolahí Kuó ne hoko ko ha takimuʻa faʻifaʻitakiʻanga lelei ʻi he ngaahi uiuiʻi ʻo e Siasi ʻo e ʻEikí kuo fakafoki maí, kau ai ʻene hoko ko e palōfita ʻa e ʻEikí ʻi he taʻu ʻe ono kuohilí.

ʻI he moʻui ʻa Palesiteni Nalesoni ʻi ha senituli kakató, kuó ne ako mo fakaʻaongaʻi ʻa e ngaahi meʻa mahuʻinga taha ke paotoloaki ʻa e fiefiá ʻi he moʻuí ni pea ʻi he moʻui ka hoko maí—ʻa e meʻa kuó ne ui ko e “ngaahi meʻa mahuʻinga taha” ʻo e moʻuí.

Kuó ne akoʻi mai ʻoku totonu ke tau “kamata ʻaki hono fakakaukauʻi e ikuʻangá.”

ʻOkú ne ʻofa ʻi he fale ʻo e ʻEikí. Lolotonga e ngaahi taʻu ʻo ʻene hoko ko e Palesiteni ʻo e Siasí, kuó ne fanongonongo ai ha temipale foʻou ʻe 153—fakafuofua ko ha vaeua ia ʻo e ngaahi temipale fakakātoa ʻe 335 ʻa e Siasí kuo langá, ʻoku lolotonga langá, pe kuo fanongonongo ʻi he kuonga fakakosipeli ko ʻení.

Kuó ne akoʻi mai ko ʻetau langa temipalé kotoa ko hono ʻomi ia ʻo e temipalé, pea mo e ngaahi tāpuaki ʻo e ngaahi fuakava fakatemipalé, ke ofi ange ki ha fānau tokolahi ange ʻa e ʻOtuá. Ko e palani ia ʻa e ʻOtuá.

Kuo ako’i mai ‘e Palesiteni Nalesoni, “Kuó u ʻilo ko e palani ʻa e Tamai Hēvaní maʻatautolú ʻoku fakaofo, ʻoku mahuʻinga moʻoni ʻa e meʻa ʻoku tau fai ʻi he moʻuí ni, pea ko e Fakalelei ʻa e Fakamoʻuí ʻa e meʻa ʻokú ne ʻai ke malava ʻa e palani ʻa e Tamaí.” Naʻá ne pehē, ʻoku hoko ʻa e maʻu e mahino ki he palani ko iá ke ne “toʻo … ʻa e meʻa fakamisitelí mei he moʻuí mo e taʻepaú mei hotau kahaʻú. ʻOkú ne fakaʻatā kitautolu takitaha ke tau fili ʻa e founga te tau moʻui ai ʻi heni ʻi he māmaní mo e feituʻu te tau nofo ai ʻo taʻengatá.”

ʻI heʻetau hoko ko e Kāingalotu ʻo e Siasí, ʻoku tau hoko ai ko ha kakai monūʻia moʻoni ke tataki kitautolu ʻe Palesiteni Nalesoni ko e tamaioʻeiki loto-fakatōkilalo ʻa e ʻEikí, ʻa ia ʻokú ne līʻoa ke teuteuʻi ʻa e māmaní ki he Hāʻele ʻAnga Ua Mai hotau Fakamoʻui mo e Huhuʻi ko Sīsū Kalaisí. Fakatauange te tau hokohoko atu ke lotua, fakamoʻoniʻi, poupouʻi, mo fakafetaʻi ki he ʻOtuá koeʻuhí ko hotau palōfitá—ʻa Palesiteni Lāsolo Melioni Nalesoni.

ʻOku kau ʻi he ngaahi akonaki mahuʻinga taha ʻa Palesiteni Nalesoní ʻa e ngaahi meʻa ko ʻení:

Kuó ne naʻinaʻi mai ke tau fakaʻaongaʻi e hingoa totonu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Kuó ne faleʻi mai ʻa e founga ke tau tuku ai ke lāngilangiʻia ʻa e ʻOtuá ʻi heʻetau moʻuí.

Kuó ne tapou mai ke tau “fakakaukau fakasilesitiale.”

Kuó ne akoʻi mai ha fakakaukau lahi ange ki hono tānaki ʻo ʻIsileli ʻi he ongo tafaʻaki fakatouʻosi ʻo e veilí.

Kuó ne fakalotoa fakalaumālie kitautolu ke tau fakalakalaka ʻi he hala ʻo e fuakavá, pea kuó ne fakaafeʻi loto-ʻofa kitautolu ke tau toe foki ki he hala ko iá ʻo kapau kuo tau hē.

Kuó ne akonaki ki he kāingalotu ʻo e Siasí ʻi he feituʻu kotoa pē ke nau muimui ki ha sīpinga ako ʻo e ongoongoleleí ʻoku fakatefito ʻi ʻapi pea poupouʻi ʻe he Siasí.

Ngaahi Maʻuʻanga Fakamatalá

1. Gordon B. Hinckley, ʻi he David A. Bednar, “Kuo Fili ke Fakamoʻoni ki Hoku Huafá,” Liahona, Nōvema 2015, 128.

2. Russell M. Nelson, “Fakakaukau Fakasilesitiale!,” Liahona, Nōvema 2023, 117.

3. Russell M. Nelson, “ʻI Heʻetau Laka Fakataha Atu Kimuʻá,” Liahona, ʻEpeleli 2018, 7.

4. Vakai, Russell M. Nelson, “Tokanga Taha ki he Temipalé,” Liahona, Nōvema 2022, 121.

5. Russell M. Nelson, “Fakakaukau Fakasilesitiale!,” 117.

6. Vakai, Russell M. Nelson, “Ko e Hingoa Totonu ʻo e Siasí,” Liahona, Nōvema 2018, 87–90.

7. Vakai, Russell M. Nelson, “Tuku Ke Lāngilangiʻia ʻa e ʻOtuá,” Liahona, Nōvema 2020, 92–95.

8. Russell M. Nelson, “Fakakaukau Fakasilesitiale!,” Liahona, 117–20.

9. Vakai, Russell M. Nelson, “Kau ʻa e Houʻeiki Fafiné ki Hono Tānaki ʻo ʻIsilelí,” Liahona, Nōvema 2018, 68–70; vakai foki, Russell M. Nelson mo Wendy W. Nelson, “ʻAmanakiʻanga ʻo ʻIsilelí” (fakataha lotu fakaemāmani lahi maʻá e toʻu tupú, 3 ʻo Sune 2018), Gospel Library.

10. Vakai, Russell M. Nelson, “Haʻu, ʻo Muimui ʻIate Au,” Liahona, Mē 2019, 91; vakai foki, Russell M. Nelson, “ʻI Heʻetau Laka Fakataha Atu Kimuʻá,” 7.

11. Vakai, Russell M. Nelson, “Lea Fakafeʻiloakí,” Liahona, Nōvema 2018, 6–8.