“Houngaʻia ko ha Palōfita,” Liahona, Sepitema 2024.
Maʻá e Ngaahi Mātuʻá
Houngaʻia ko ha Palōfita
ʻOku feʻiloaki ʻa Palesiteni Lāsolo M. Nalesoni mo e Kāingalotu ʻo e Siasí ʻi Kona, Hauaiʻi ʻi he ʻaho 16 ʻo Mē 2019, lolotonga ʻene ʻaʻahi ngāue tokoni ki he Pasifikí.
Siʻi Ngaahi Mātuʻa,
ʻOku fakamanatua ʻe Palesiteni Lāsolo M. Nalesoni hono taʻu 100 he māhiná ni. ʻOku fakamamafaʻi ʻe he ngaahi fakamatala ʻi he makasini ko ʻení ʻa e founga ʻokú ne tataki ai kitautolu mo e kau palōfita kehé kia Sīsū Kalaisí.
Ko e founga ʻe taha ʻe lava ke muimui ai ʻa e toʻu tupú ki he palōfitá ko hono tali ʻene fakaafe ke ʻalu maʻu pē ki he seminelí pea lau fakaʻaho ʻa e folofolá. Kuó Ne talaʻofa mai ha ngaahi tāpuaki fakaʻofoʻofa kiate kinautolu ʻoku nau fai iá, kau ai ʻa e ako ke maʻu ha fakahā fakatāutahá, ʻilo ʻa e tali ki he ngaahi fehuʻi faingataʻa ʻo e moʻuí, pea mo e ʻiloʻi ʻa e Fakamoʻuí. Kuo fanongo nai hoʻo fānau taʻu hongofulu tupú ki he fakaafe fakaepalōfita ko ʻení? ʻAʻahi ki he seminary.ChurchofJesusChrist.org ke maʻu ha fakamatala lahi ange.
Fealēleaʻaki ʻi he Ongoongoleleí
Manatuʻi Ho Ngaahi Fuakavá
ʻOku tau ako ʻi he fakamatala ʻa Palesiteni Sefilī R. Hōlani ʻi he peesi 4, ʻa e founga ʻe hoko ai hono tauhi ʻetau ngaahi fuakavá mo hono tui ʻa e kāmeni ʻo e lakanga fakataulaʻeiki māʻoniʻoní hili hono maʻu hotau ʻenitaumení, ko ha maluʻi mo tauhi kitautolu ke tau ofi ki he Laumālié. Te ke lava ʻo vahevahe mo hoʻo fāmilí ha kupuʻi lea mei he fakamatalá pea talanoa ki he founga ʻoku hoko ai hono tui ʻo e kāmení “ko hano fakafōtunga atu ia ʻo e tukupā ʻi he lotó.” Ko e hā mo ha toe ngaahi fakafōtunga kehe ʻoku tau fai ke fakahaaʻi ʻetau tukupā ke hoko ko ha kau ākongá?
Tauhi ʻa e Ngaahi Fekaú
Naʻe fehuʻi ʻe ʻEletā ʻAisake K. Molisoni kia Palesiteni Nalesoni pe ko e hā haʻane pōpoaki fakataautaha maʻa hono uaifí mo e fānaú. Ko e tali ʻa e palōfitá ko e “Tauhi ʻa e ngaahi fekaú.” (Vakai, peesi 20.) Mahalo te ke fehuʻi ki hoʻo fānaú: ʻE kehe fēfē nai hoʻo ngaahi filí kapau naʻe tangutu ʻa e palōfitá ʻi ha tēpile ʻo kole atu ke ke tauhi ʻa e ngaahi fekaú?
Muimui ʻi he Palōfitá
ʻOku taʻu 100 ʻa Palesiteni Nalesoni ʻi he māhiná ni! ʻOku vahevahe ʻe Palesiteni Tāleni H. ʻOakesi ha niʻihi ʻo e ngaahi lēsoni kuó ne ako mei he palōfitá (vakai, peesi 12). Ko e hā ha meʻa kuo ako ʻe hoʻo fānaú mei he palōfitá? Kuo ʻi ai nai ha lea pe fakataha lotu pau kuo mahuʻinga makehe kiate kinautolu? Vahevahe hoʻo ngaahi fakakaukaú. Te ke lava ʻo mamata ʻi ha pōpoaki fakavitiō meiate ia.