Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní

Naʻe ʻI Ai ha Meʻa Lelei Ange ʻa e ʻOtuá Maʻamautolu

Fai ʻe Ronald Baa, Minitanao Tokelau, ʻOtu Filipainí

ʻI hono akoʻi mai ʻe he ongo faifekaú ko e fānau au ʻa e ʻOtuá, naʻá ku ʻiloʻi naʻá Ne maʻu ha ngaahi tāpuaki lahi ange maʻaku mo hoku fāmilí.

Laʻitā mei he tokotaha naʻá ne faʻú

Naʻá ku tupu hake ʻi ha kiʻi kolo tukuʻuta ʻi he ʻOtu Filipainí. Naʻe masiva hoku fāmilí. ʻI he ʻOtu Filipainí, kapau ʻoku ʻikai ʻi ai haʻo paʻanga, he ʻikai lava ke ke ʻalu ki he akó. Neongo ʻa e fakafeʻātungia ko iá, ka ko ha talavou vilitaki au.

Naʻá ku talaange ki heʻeku ongomātuʻá ʻoku ou fie hoko ko ha toketā pe faiako pe ko ha faʻahinga tokotaha ngāue fakapalofesinale, ka naʻá na talamai maʻu pē kiate au ke tuku ʻeku mohe misí. Naʻe ʻikai haʻamau paʻanga ke u hū ki ha ʻunivēsiti. Naʻe loto ʻeku ongomātuʻá ke u fiemālie pē kae ʻoua ʻe siva ʻeku ʻamanakí ʻi heʻeku moʻuí.

Naʻá na talamai, “Ko e hoko ko ha taha fakapalōfesinalé ʻoku ʻikai ko ha moʻui ia maʻatautolu.” Naʻe ʻikai ke na tui naʻe fakatatali mai ha meʻa naʻe lelei ange ʻi he meʻa ʻoku mau lolotonga maʻú, maʻa homau fāmilí.

Ka ko e kimuʻa ia pea mau kau mai ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Naʻa mau nofo mamaʻo mei ha faʻahinga kolo pē, ka naʻe ʻilo kimautolu ʻe he ongo faifekaú pea naʻá na toutou ʻaʻahi mai. Naʻá na fai ha ngaahi feilaulau lahi ke akoʻi hoku fāmilí, ka naʻá na liliu ʻemau moʻuí ʻo taʻengata.

ʻI he taimi ne mau kau mai ai ki he Siasí, ne u ako ʻo ʻilo ko ha fānau au ʻa e ʻOtuá pea ʻoku ou maʻu ʻa e ivi malava ke tupulaki mo ako pea mo aʻusia (vakai, Mōsese 1:39; “Ko e Fāmilí: Ko ha Fanongonongo ki Māmani,” Gospel Library). ʻI heʻeku ʻilo ʻa e ongoongoleleí, naʻá ku ʻiloʻi ai kuo taimi ke fakatupulaki ʻa e tuʻunga naʻe ʻi ai hoku fāmilí. Naʻe ʻikai ke mau kei hoko ko ha kakai masiva pē mei ha kiʻi kolo siʻisiʻi—ka ne mau hoko ko e ngaahi foha mo e ngaahi ʻofefine moʻui taau ʻa e ʻOtuá ʻoku feʻunga mo e ngaahi tāpuaki kuó Ne talaʻofa maʻa ʻEne kau muimui faivelengá.

Naʻe ʻomi ʻe he ongo faifekaú ʻa e ongoongoleleí ki heʻeku moʻuí, naʻe ʻomi ʻe he ongoongoleleí ʻa e mūsiká ki heʻeku moʻuí, pea naʻe ʻomi ʻe he mūsiká ha sikolasipi ke u hū ai ki he ʻunivēsití. Naʻe maʻu hoku mataʻitohi B.A. ʻi he faiako ʻi he ako māʻolungá pea mo ha mataʻitohi ʻi he mūsiká ʻo ako ki hono akoʻi ʻo e hivá (choral conducting). ʻI he taimi ní ʻoku ou akoʻi ʻa e mūsiká ʻi he ʻUnivēsiti Lisiō ti Kakaianí (Liceo de Cagayan) mo tataki ʻa e Kalapu Hiva (Glee Club) ʻa e Akoʻanga Māʻolunga Lisiō Ū. ʻOku ou toe tataki foki ha kuaea ʻa e kāingalotu ʻo e Siasí. Ko homau misioná ke vahevahe ʻa e moʻoni ʻa e ʻOtuá ʻo fakafou ʻi he mūsiká.

Ne u maʻu ha moʻui foʻou ʻi heʻeku ʻosi mei he ʻunivēsití. ʻOku ʻikai ke u ʻilo pe ko e fē ha feituʻu naʻá ku mei ʻi ai he ʻahó ni ka ne taʻeʻoua ʻa e ongoongolelei ʻo Sīsū Kalaisí.

ʻOku totonu ke maʻu ʻe he taha kotoa pē ʻa e faingamālie ke nau ʻiloʻi ʻoku ʻi ai haʻanau Tamai Hēvani pea kuó Ne faitāpuekina kinautolu ʻaki ʻa e ivi malava ke tupulaki mo ako pea mo aʻusia, ʻo hangē ko ia ne hoko kiate aú.