Fakakomipiuta Pē
Ko Hono ʻIlo “ha ʻUhinga ke Fiefiá”
ʻI he taimi naʻá ku ongoʻi mafasia ai ʻi hoku lotó, naʻe fakamanatu mai ʻe he ngaahi lea ʻa ha palōfita ke u fiefia.
ʻI he taimi naʻe tō ai ʻa e mahaki fakaʻauha COVID-19, naʻá ku lolotonga ngāue fakafaifekau ʻi he Lepapulika Tominikení. Naʻe ʻikai faingofua ʻeku ʻuluaki fehikitaki ʻe tolu ʻi heʻeku ngāue fakafaifekaú, ka naʻá ku ongoʻi houngaʻia ʻi he meʻa kotoa ne u akó pea naʻá ku fiefia ke hokohoko atu ʻeku tupulaki ko ha ākonga ʻa Sīsū Kalaisí.
Ko ia ko e taimi naʻe ʻave ai au ki ʻapi ʻi ha māhina ʻe tolú, naʻá ku puputuʻu mo loto-mamahi. Naʻá ku ongoʻi taʻepauʻia pea ʻikai ha tupulaki ʻi heʻeku moʻui. Naʻe faifai pea toe vahe au ki ʻAiouā Siti, ʻAiouā, USA. Neongo naʻe vave ʻeku ʻofa ʻi ʻAiouā mo e kakai ʻi aí, ka naʻá ku ongoʻi hangē naʻá ku toe kamata foʻoú. Naʻe faingataʻa ʻa e liliú, pea naʻá ku fefaʻuhi mo e ongoʻi taʻefeʻungá, loto-hohaʻá, mo e taʻelatá.
Naʻá ku lotu ʻi he ʻaho kotoa pē ke maʻu ha faʻahinga fakafiemālie. Naʻá ku ongoʻi lomekina, pea naʻá ku fāifeinga ke kātekina toko taha pē ia.
Lolotonga ʻeku ako fakatāutahá, naʻá ku lau ha kupuʻi lea naʻe fai ʻe Palesiteni Kōtoni B. Hingikelī (1910–2008) naʻe tokoni ke u ongoʻi fiemālie ange ai. Naʻá ne vahevahe ʻo pehē:
“Naʻe folofola ʻa e ʻEikí: ʻKo ia, hiki hake ho lotó ʻo fiefia, pea pīkitai ki he ngaahi fuakava ʻa ia kuó ke faí.ʼ (Tokāteline mo e Ngaahi Fuakava 25:13.)
“ʻOku ou tui ko ʻEne pehē mai kiate kitautolu takitaha, ʻai ke ke fiefia. Ko e ongoongoleleí ko ha meʻa fakafiefia. ʻOkú ne ʻomai ha ʻuhinga ke tau fiefia ai.”
Naʻe kamata ke u vakai ki he foʻi lea fiefiá ʻi he folofolá ʻaki ha fakakaukau ʻoku foʻou. Ko ha fakaafe ia mei he ʻEikí ke fiefia. ʻOku ʻafioʻi lelei ange ʻe he Tamai Hēvaní mo Sīsū Kalaisi ʻi ha toe taha ʻa e ngaahi pole, mamahi, mo e faingataʻa ʻoku tau fehangahangai mo iá—pea ʻokú Na kei fakaafeʻi pē kitautolu ke tau fiefia.
Naʻá ku fakakaukau ke tali ʻa e fakaafe ko iá. Neongo naʻe ʻikai liliu hoku ngaahi tūkungá pea ʻikai mole fakafokifā ʻeku ngaahi ongoʻi loto-mamahí, ka naʻá ku ongoʻi ha loto-houngaʻia mo ha fiefia lahi ange koeʻuhí ko e ngaahi tāpuaki mo e ngaahi talaʻofa ʻo e ongoongolelei ʻo Sīsū Kalaisí.
ʻOku fakahaaʻi mai ʻe he ngaahi sīpinga mei he folofolá ʻa e founga kuo maʻu ai ʻe he Kāingalotu he kuonga muʻá ʻa e fiefiá neongo ʻa e ngaahi tūkunga faingataʻa tahá. ʻI he tohi Hilamaní, ʻoku tau vakai ai ki he kāingalotu ʻo e Siasí ne nau tafoki ki he ongoongoleleí ke maʻu ʻa e fiefiá neongo hono fakatangaʻi kinautolu ʻe he niʻihi kehé:
“Ka neongo iá naʻa nau faʻa ʻaukai mo lotu, pea nau fakaʻau ʻo mālohi ange ai pē ʻi honau loto-fakatōkilaló, mo tuʻu mālohi ai pē ʻi he tui kia Kalaisí, ʻo aʻu ki hono fakafonu honau laumālié ʻaki ʻa e fiefia mo e fiemālie, ʻio, ʻo aʻu ki hono fakahaohaoaʻi mo fakamāʻoniʻoniʻi honau lotó, ʻa ia ko ha fakamāʻoniʻoniʻi ʻoku hoko tupu mei heʻenau fakavaivaiʻi ʻa honau lotó ki he ʻOtuá” (Hilamani 3:35).
ʻI he taimi ʻoku tau hanga ai ki he Fakamoʻuí lolotonga ʻetau ngaahi faingataʻá, ʻe lava ke fakafonu hotau laumālié ʻaki ʻa e fiefia mo e fiemālie. ʻI heʻetau fai iá, ʻoku tau ako ai ke fakafenāpasi lelei ange hotau lotó mo e ʻEikí.
ʻI he hokohoko atu ʻeku feinga ke fiefiá, kuó u maʻu ha ivi lahi ange ʻi heʻeku fehangahangai mo e ngaahi faingataʻá. Naʻá ku toki fehangahangai kimuí ni mo ha siva ʻeku ʻamanakí naʻá ne fakatupunga ai haʻaku ongoʻi loto-mamahi moʻoni. Ka ʻi heʻeku fakakaukau ki he ongo naʻá ku maʻú, naʻá ku lava ʻo vakai ki he lahi ʻo ʻeku tupulakí talu mei he taimi naʻá ku ngāue fakafaifekau aí.
Naʻe ʻikai hoko ʻeku loto-mamahí ke u ongoʻi ai ʻoku siva ʻeku ʻamanakí, koeʻuhí kuó u fakatokangaʻi ko e fiefia moʻoní ʻa hono moʻui ʻaki e ongoongolelei ʻo Sīsū Kalaisí. ʻOku ʻikai ʻuhinga ia he ʻikai ke tau teitei aʻusia ha ngaahi faingataʻa pe te tau fehangahangai mo e pole kotoa pē ʻaki e ʻaloʻofa haohaoa.
Naʻe akoʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
“ʻOku tau fekumi ki he fiefiá. ʻOku tau fakaʻamua e melinó. ʻOku tau ʻamanaki ki ha ʻofa. Pea ʻoku lilingi mai leva ʻe he ʻEikí kiate kitautolu ha ngaahi tāpuaki fakaofo lahi. Ka ʻoku ʻi ai ha meʻa pau ʻoku tuifio mo hoʻo nēkeneká mo e fiefiá: ʻe ʻi ai ha ngaahi momeniti, houa, ʻaho, pea ʻi he taimi ʻe niʻihi mo ha ngaahi taʻu ʻe ongoʻi kafo ai ho laumālié.
“ʻOku akoʻi ʻe he folofolá te tau ʻahiʻahiʻi ʻa e koná mo e melié pea ʻe ʻi ai ʻa e ʻfehangahangaí ʻi he meʻa kotoa pēʼ [2 Nīfai 2:11].”
ʻE lava ke feʻao fakataha pē ʻa e mamahí mo e fiefiá. Loto-mamahí mo e houngaʻiá. Mamahí mo e fakakaukau leleí. Ko hono moʻoní, ʻoku fakalahi ʻe heʻeku ngaahi aʻusia kovi ʻi he moʻuí ʻa ʻeku malava ke ongoʻí pea ʻokú ne fakaʻatā ke u fakatupulaki ha ivi lahi ange ke fiefia ʻi he leleí. ʻOku fakafiemālieʻi ʻe he ngaahi moʻoni fakaʻofoʻofa ʻo e ongoongoleleí ʻa ʻeku ngaahi mamahí. ʻOku nau kei mamahi pē ka ʻoku ʻākilotoa kinautolu ʻe ha ʻofa lahi ki he Fakamoʻuí, ko ha houngaʻia ʻi he ngaahi mana fakaʻofoʻofa ʻokú ne fakafonu ʻeku moʻuí, ko ha falala ʻe fengāueʻaki fakataha ʻa e ngaahi meʻa kotoa pē ke lelei pē kiate au, pea mo ha ongoʻi fiefia lahi.