ʻOku Mau Fakamoʻoni ki Hotau Palōfita Moʻuí

Fakamālō ki he ʻOtuá ʻi Heʻene fakanofo ʻi māmani ha palōfita.

ʻOku ou ʻiloʻi ko Palesiteni Lāsolo M. Nalesoní ko ha palōfita ia ʻa e ʻOtuá, pea ʻoku ou fakafetaʻi ʻi he folofola mai ʻa e ʻOtuá kiate iá. Ko e ʻofa ʻa Palesiteni Nalesoni kiate kitautolú ko hano fakahaaʻi ia ʻe taha ʻo e ʻofa ʻa e ʻOtuá. ʻOku ou ʻofa ʻia Palesiteni Nalesoni. Ko e ngaahi talaʻofa ʻokú ne fakahāʻí ʻoku mei he ʻOtuá ia.

Sasitini Hinautani, Filipaini

ʻOku akoʻi mai ʻe Palesiteni Nalesoni ko e meʻa mahuʻinga taha he ʻaho ní ko e fili ʻa Kalaisi ʻaki hono fakamahuʻingaʻi mo tauhi e ngaahi fuakavá.

Laieni Hulume, Nuʻu Sila

ʻOku ou fakafetaʻi koeʻuhí ko e palōfita ko Lāsolo M. Nalesoní. ʻOku ou fakamoʻoni ko ha tangata ia naʻe ui ʻe he ʻOtuá ke tataki mo fakamālohia kitautolu ʻi he ngaahi ʻaho fakaʻosí. Kapau te tau muimui ki heʻene akonakí, ʻe lelei ʻa e meʻa kotoa pē.

Nalesoni ʻAlameita, Kapo Veti

Fakamālō atu Palesiteni Nalesoni mei he takele homau lotó ʻi hono foaki mai kiate kimautolu ʻa e ngaahi lea ʻo e potó mei heʻetau Tamai Hēvaní. ʻOfa ke faitāpuekina koe ʻe he ʻOtuá, siʻemau palōfita ʻofeina!

Pelinitā Poili, Sikotilani

Mālō ʻaupito Palesiteni Nalesoni, koeʻuhí ko hoʻo ngaahi akonaki fakalaumālie mo langaki moʻuí. ʻOku mau ʻofa atu.

Tuongi Putili, Kemipoutia

ʻOku ou houngaʻia moʻoni ʻi he ʻofa mo e ngaahi ʻilo ʻoku ʻomi ʻe Palesiteni Nalesoni ʻi heʻene hoko ko e palōfitá. Naʻe hoko ʻene lea fekauʻaki mo e temipalé ke tokoniʻi au ke u maʻu hoku ʻenitaumení, kuo fakamanatu mai ʻe heʻene fakataha lotu maʻá e kakai lalahi kei talavoú ke u fakatokangaʻi ai hoku tuʻunga mahuʻinga taha ko e fānau ʻa e ʻOtuá, pea kuo hoko ʻene fakalotolahi ke tānaki fakataha ʻa ʻIsileli kuo fakamoveteveteʻí ko ha tefito tuʻu maʻu ia ʻi hoku fāmilí mo e uōtí. Kae hiliō aí, kuó ne tokoniʻi au ke u ʻunu ke ofi ange ki hoku Fakamoʻuí.

Kuleisi Pooti, ʻIunaiteti Siteití

Kuó u fakalaulaulotoa moʻoni ʻa e ngaahi akonaki ʻa hotau palōfita ʻofeina ko Lāsolo M. Nalesoní. Kuo ueʻi fakalaumālie ʻe heʻene ngaahi akonakí ʻeku moʻuí. Kuo fakaʻaiʻai au ʻe heʻene ngaahi lea fakaepalōfitá ke hokohoko atu ʻeku laka ki muʻá pea moʻui kakato ange ʻaki ʻa e ongoongoleleí ʻi he māmani moveuveu mo fekeʻikeʻi ko ʻení. ʻOku ou ongoʻi malu ʻaupito ke ʻiloʻi ʻoku ʻi ai ha palōfita ʻi hotau kuongá ʻokú ne naʻinaʻi mai ke tau maʻu ha laumālie ʻo e melinó, ke fakaʻehiʻehi mei he fakakikihi mo hotau toʻú. ʻOku ou mahuʻingaʻia ʻi heʻene ngaahi akonaki maʻongoʻongá.

ʻAna Monitoia, Honitulasi

ʻOku ʻi ai ʻeku fakamoʻoni mālohi ko Palesiteni Lāsolo M. Nalesoní ko ha palōfita ia ʻa e ʻOtuá maʻá e ngaahi ʻaho kimui ní. Kuó u maʻu e faingamālie ke mātātonu ʻi heʻene loto-fakatōkilaló, ko ʻene anga faingofuá, pea mo ʻene ʻofa ʻi he kakaí. Ko e moʻoni, ko e tangata ia kuo fili ke ne tataki e puleʻanga ʻo e ʻOtuá ʻi he māmaní ʻi he kuonga makehe ko ʻení. Kuó u fakafanongo mo muimui ki heʻene faleʻí, ʻa ia kuó ne tataki au ke u moʻui angatonu mo fehangahangai mo e ngaahi faingataʻa ʻo e moʻui fakamatelié. ʻOku ou ongoʻi ha ʻofa lahi kia Palesiteni Nalesoni, pea ʻoku ou ʻiloʻi ʻene tokoni kāfakafa ki hono paotoloaki e puleʻanga ʻo e ʻOtuá pea mo hono tānaki fakataha ʻo ʻIsilelí ʻo fakafou ʻi heʻene ngaahi ueʻi fakalaumālié mo e ngaahi fanongonongo ke langa ha ngaahi temipale he funga ʻo e māmaní.

Tēvita G. Fenanitesi, Palāsila

ʻI he ʻaho 24 ʻo ʻAokosi 2019, naʻe lea faka-Sipeini ai ʻa e palōfitá ʻo fakahinohino mai ke mau tauhi e ngaahi fekau ʻa e ʻEikí. Naʻá ku ongoʻi mālohi ʻa e ʻofa ʻa Sīsū Kalaisí koeʻuhí ko e feinga ʻa e palōfitá ke ako ʻemau lea fakafonuá. ʻOku ou ʻiloʻi ʻoku fakafou ʻi he palōfita moʻuí ʻa e poupouʻi, fakahinohinoʻi, maluʻi, tataki, mo tāpuekina kitautolu ʻe he ʻOtuá.

Saula ʻAlifeleti Lohasi ti Leone, Kuatemala