Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní

Naʻe Fakaleleiʻi ʻe he Laumālié ʻa e Faikehekehé

Fai ʻe Lisa Nielsen Young, Kalolaina Saute, USA

Naʻe lava ke u ongoʻi ʻa e ʻofa ʻa e kāingalotu ʻo e uōtí ʻi heʻenau hiva taʻe kau ai e meʻaleá.

Tā fakatātaaʻi ʻe Katy Dockrill

Naʻa mau nofo ʻi ha kiʻi kolo siʻisiʻi ʻi Siosiā, USA, ʻi he taimi ne mālōlō ai ʻeku tangataʻeikí ʻi hono taʻu 55. Ko e tokolahi taha homau fāmilí naʻa nau nofo ʻi ha siteiti kehe. Kuo teʻeki ha taimi ʻe vāmamaʻo lahi ange ai ʻa e maile ʻe 2,000 (3,200 km) ʻi homau vahaʻa mo hoku fāmilí ka ko e taimi ko iá.

Ko hoku husepānití naʻe pīsopé pea ko au naʻe tā ʻōkani ʻi homau kiʻi uooti tokosiʻí. Koeʻuhí ko e ngaahi ongo mo e loto-mafasia kotoa ʻo e tokoni ki hono fokotuʻutuʻu ʻo e meʻafakaʻeikí, naʻá ku ongoʻi ongosia makehe ʻi he Sāpate ko iá ʻi he hokosia e taimi ke hivaʻi ai ʻemau himi tuku ʻi he houalotu sākalamēnití ko e: “ʻOku ʻa e ʻOtuá Kitaua” (Ngaahi Himí, fika 82).

ʻI he aʻu ki he vaeuaʻanga ʻo e veesi hono uá, naʻe lomekina au heʻeku loto-mamahí. Naʻá ku tā pē ʻa e ʻōkaní ʻo aʻu ki he fakaʻosinga ʻo e veesi ko iá, ka naʻe tetetete hoku ongo nimá pea naʻá ku matuʻaki tangi ʻaupito naʻe pau ai ke tuku ʻeku tā e ʻōkaní ʻoku toe ha veesi kakato ia ʻe taha. Naʻe ʻikai ke u lava ʻo taʻofi ʻeku tangí.

Naʻe kiʻi longo taimi siʻi ʻa e hivá ʻi he fakatokangaʻi ʻe he haʻofangá kuo ʻikai ke toe tā e ʻōkaní. Ka naʻe kamata ke hiva taʻe meʻalea pē ʻa e kāingalotu ʻo e uōtí. Naʻe ʻikai ongo lelei ʻa e hivá. Naʻa mau tokosiʻi pē foki. Ka naʻe fakaleleiʻi ʻe he Laumālié ʻa e faikehekehé. Naʻá ku tangi mo fakamāʻia, ka naʻe lava ke u ongoʻi e ʻofa ʻa ha niʻihi tokolahi lolotonga ʻenau hivá.

ʻOku ʻa e ʻOtuá kitaua;

Te Ne fakapale ʻaki;

Maʻu ʻa e kalauni,

ʻO e ʻEiki ko e ʻOtua.

ʻI he ʻosi ʻa e himí, naʻe puke au ʻe he faihivá ʻi heʻeku tangi lolotonga e lotu tukú. Hili iá naʻe haʻu ha kakai tokolahi ki he ʻōkaní mo ʻenau loʻimataʻiá ke fakahā ʻenau fie kaungā-mamahi koeʻuhí ko ʻeku tamaí.

Ne u toki talaange kimui ange ki he faihivá te u tā e pianó ʻi he putú. Mahalo naʻe hangē ʻoku ʻikai ko ha fakakaukau fakapotopoto ia ʻi he hili e meʻa ne toki hokó, ka naʻe fiefia ʻaupito ʻeku tangataʻeikí ʻi he fanongo ki heʻeku tā-pianó. Naʻá ku fakaʻamu ke u tā-piano maʻana. Naʻá ku fakatokangaʻi he taimi ko iá ʻa e ongoʻi ʻokú ne ofi mai lolotonga e himi tukú.

ʻOku ou houngaʻia ʻaupito ʻi he ngaahi himí. ʻOku ou fakamoʻoni ʻe lava ke hanga ʻe he mūsiká ʻo akoʻi mo fakafiemālieʻi kitautolu ʻi ha ngaahi founga ʻoku ʻikai faʻa lava ia ʻe he ngaahi leá. Hangē ko e tohi ʻa e Kau Palesitenisī ʻUluakí ʻi he talamuʻaki ʻo e tohi himí, “[Ko e] ngaahi himí … [ʻokú ne] fakafiemālieʻi ʻa e ongosiá, fakanonga kinautolu ʻoku loto-mamahí, mo ueʻi kitautolu ke tau kātaki ki he ngataʻangá.” ʻOku ou toe houngaʻia foki koeʻuhí ko e ʻofa ʻa ha uooti lelei ʻi he taimi ne u mamaʻo ai mei hoku fāmilí. ʻOku ou ʻiloʻi te u toe feʻiloaki pē mo ʻeku tamaí.