Naʻe ʻOmi ʻe he Tohi ʻa Molomoná ha Nonga Kiate Au

Fai ʻe Américo Chantre Fernandes, Keipi Veti

Naʻe mahino kiate au naʻe mahuʻinga ʻa e Tohi ʻa Molomoná ke liliu ai ʻeku moʻuí pea ʻomi au ke u ofi ange kia Sīsū Kalaisi.

fakatātā ʻo e Tohi ʻa Molomoná ʻoku takafi lanu pulū ʻi he lea faka-Sipeiní

ʻI he fakaʻosinga ʻo e 2013, naʻe kamata ke ʻaʻahi mai ha ongo talavou sote hina mo hēkesi ki hoku tuofefiné, ʻo tuʻo ua he uike. Naʻá ku ʻiloʻi he taimi pē ko iá naʻá na haʻu mei ha siasi. Naʻe ʻikai ke u palani ke u kau ki ha siasi, ko ia ne u fakakaukau ai ke ʻoua naʻá ku talanoa kiate kinaua.

ʻI heʻena ʻaʻahi kotoa pē, naʻá ku fakapapauʻi he ʻikai ke u ʻi ʻapi ʻi he taimi te na aʻu mai aí. Ka naʻe ʻi ai ha meʻa makehe naʻá ne tohoakiʻi ʻeku tokangá. Naʻá na toʻotoʻo maʻu pē ha tohi lanu pulū. Kuo teʻeki ai ke u sio ha tohi pehē kimuʻa, pea naʻe ngali kehe ia kiate au.

ʻI ha ʻaho ʻe taha ʻi he lotofalé, naʻe kamata ke talanoa mai ai hoku tuofefiné fekauʻaki mo e tohí. Fakafokifā pē, kuo aʻu mai ʻa e ongo talavoú. Ko e meʻapangó, naʻe ʻikai ke u lava ʻo toitoi meiate kinaua. Naʻá na sio mai ʻoku ʻia kimaua ʻa e tohi lanu puluú—ʻa e Tohi ʻa Molomoná—pea kamata ke na ʻeke mai pe ko e hā ʻeku ʻilo fekauʻaki mo Sīsū Kalaisí.

ʻI heʻeku fakafanongo ki he ongo faifekaú talu mei he ʻaho ko iá, naʻá ku mālieʻia ʻi heʻena fakafehokotaki ʻena ngaahi akonakí ki he Tohi ʻa Molomoná. Ko hono olá, naʻe ʻikai ke toe ngali kehe kiate au ʻa e tohi lanu puluú.

Naʻá ku kei veiveiua lahi pē ki ai, ka naʻe kamata ke u lau ia. Naʻe mahino kiate au ko e Tohi ʻa Molomoná naʻe ʻikai ko ha fetongi ia ʻo e Tohi Tapú ka naʻe mahuʻinga ia ke liliu ai ʻeku moʻuí pea ʻomi au ke u ofi ange kia Sīsū Kalaisi. Naʻá ku ako ʻoku fakatefito ʻa e Tohi ʻa Molomoná ʻi he Fakamoʻuí. Naʻe tokoni hono ngaahi akonakí ke u ʻiloʻi ko hai Ia pea mo e Tamai Hēvaní.

Naʻe ʻikai fuoloa kuo tokoniʻi au ʻe he Tohi ʻa Molomoná ke u hoko ko ha tokotaha lelei ange, ko ha ākonga moʻoni ʻa Sīsū Kalaisi. Naʻe tokoni foki ia ke fakaleleiʻi ai hoku ʻulungāngá ʻi heʻeku fehangahangai mo e ngaahi faingataʻa fakaʻahó. Mei he meʻa kuó u aʻusia ʻi hono ako iá, ʻoku ou ʻilo ʻoku tokoni ia ki he kakaí ke nau haʻu kia Kalaisi pea moʻui ʻaki ʻa e ongoongoleleí (vakai, Molonai 10:32). ʻOkú ne poupouʻi kitautolu ke tau muimui ki he ngaahi akonaki ʻa Kalaisí pea fakaʻaongaʻi ia ʻi heʻetau moʻui fakaʻahó. ʻOkú ne ʻomi ʻa e ʻilo ko e ngaahi foha mo e ngaahi ʻofefine kitautolu ʻo e ʻOtuá. ʻOkú ne ʻomi ha nonga.

Hili ha ngaahi uike ʻo ʻeku fakataha mo e ongo faifekaú pea mo hono lau ʻo e Tohi ʻa Molomoná, naʻe papitaiso au. ʻOku ou fakamoʻoni ʻaki hoku lotó kotoa ʻoku moʻoni ʻa e Tohi ʻa Molomoná pea ʻoku hoko hono lau iá ke tau maʻu ai ʻa e ʻamanaki lelei mo e maama lolotonga e ngaahi taimi faingataʻa tahá, pea tokoniʻi ai kitautolu ke tau ongoʻi ʻa e ʻofa mo e maluʻi ʻa e ʻEikí. ʻOku ou houngaʻia ke maʻu ʻa e Tohi ʻa Molomoná ʻi heʻeku moʻuí.