Ngaahi Taʻu Lahi ʻo e Ngāue Mateakí: Ngaahi Akonaki Mahuʻinga ʻa Palesiteni Lāsolo M. Nalesoni Kuo Filifili

Kuo taʻu 100 ʻa Palesiteni Nalesoni he taimí ni pea kuó ne hoko ko ha ʻAposetolo ʻi ha taʻu ʻe 40. Ko ha niʻihi ʻeni ʻo ʻene ngaahi akonaki mei he taimi kuó ne hoko ai ko e Palesiteni ʻo e Siasí.

Kamata ʻAki Haʻo Fakakaukau ki he Olá

“Ko e ikuʻanga ʻoku tau takitaha fāifeinga ki aí, ke fakakoloaʻi kitautolu ʻaki ʻa e mālohi ʻi he fale ʻo e ʻEikí, silaʻi hotau fāmilí, faivelenga ʻi hono tauhi e ngaahi fuakava naʻe fai ʻi he temipalé ke tau feʻunga ai ke maʻu e meʻaʻofa maʻongoʻonga taha ʻa e ʻOtuá—ʻa ia ko e moʻui taʻengatá. Ko e ngaahi ouau ʻo e temipalé mo e ngaahi fuakava ʻokú ke fakahokó, ko e kī ia ki hono fakamālohia hoʻo moʻuí, hoʻo nofo malí mo e fāmilí, pea mo hoʻo malava ke matuʻuaki e ngaahi ʻohofi ʻa e filí. ʻE hanga ʻe hoʻo moihū ʻi he temipalé mo hoʻo tokoni ai ki hoʻo ngaahi kuí, ʻo faitāpuekina koe ʻaki ha fakahā fakafoʻituitui mo ha melino ʻoku lahi angé, pea ʻe fakamālohia ai hoʻo tukupā ke nofo maʻu ʻi he hala ʻo e fuakavá.”

“ʻI Heʻetau Laka Fakataha Atu Kimuʻá,” Liahona, ʻEpeleli 2018, 7.

Fakatomala Fakaʻaho

“ʻOku hala ha meʻa ʻe toe fakatauʻatāina ange, fakaʻeiʻeiki ange, pe toe mahuʻinga ange ki heʻetau fakalakalaka fakafoʻituituí ka ko e tokanga taha fakaʻaho maʻu pē ki he fakatomalá. Ko e fakatomalá ʻoku ʻikai ko ha meʻa pē ʻoku hoko; ko ha ngāue. Ko e kī ia ki he fiefia mo e nonga ʻo e ʻatamaí. Ko e taimi ʻoku fakatahaʻi ai mo e tuí, ʻoku malava leva ʻe he fakatomalá ʻo ʻai ke tau maʻu ʻa e mālohi ʻo e Fakalelei ʻa Sīsū Kalaisí.”

“Te Tau Lava ʻo Fai Lelei Ange pea Toe Lelei Ange,” Liahona, Mē 2019, 67.

Fakahoko mo Tauhi ʻa e Ngaahi Fuakavá

“ʻE lava ke maʻu hangatonu ʻe he fefine mo e tangata kotoa ʻokú ne fai ha fuakava mo e ʻOtuá pea tauhi ʻa e ngaahi fuakava ko iá, pea moʻui taau ‘o kau atu ʻi he ngaahi ouau ʻo e lakanga fakataulaʻeikí ʻa e mālohi ʻo e ʻOtuá. ʻOku maʻu ʻe kinautolu kuo fakakoloaʻi ʻi he fale ʻo e ʻEikí ha meʻafoaki ʻo e mālohi ʻo e lakanga fakataulaʻeiki ʻo e ʻOtuá ʻi heʻenau fuakavá fakataha mo ha meʻafoaki ʻo e ʻilo ʻa e founga ke maʻu ai ʻa e mālohi ko iá.”

“Ngaahi Koloa Fakalaumālie,” Liahona, Nōvema 2019, 77.

Fanongo ki he ʻEikí

“ʻOku ʻafioʻi ʻe heʻetau Tamaí ko e taimi ʻoku ʻākilotoa ai kitautolu ʻe he taʻepaú mo e manavasiʻí, ko e meʻa ʻe tokoni lahi taha kiate kitautolú ko haʻatau fanongo ki Hono ʻAló.

“Koeʻuhí ko e taimi ‘oku tau feinga ai ke fanongó—ʻo fanongo moʻoni—ki Hono ʻAló, ʻe tataki kitautolu ke tau ʻilo e meʻa ke tau fai ʻi ha faʻahinga tūkunga pē.”

“Fanongo kiate Ia,” Liahona, Mē 2020, 89.

Fili ke Tuku ke Lāngilangiʻia ʻa e ʻOtuá

“ʻI heʻetau manatu ki he ʻuhinga faka-Hepelū ʻo e ʻIsilelí ʻoku tau ʻiloʻi ai ʻoku ʻi ai ha ʻuhinga kehe ʻo hono tānaki ʻo ʻIsilelí. ʻOku tānaki ʻe he ʻEikí ʻa kinautolu ʻoku loto-fiemālie ke tuku ke lāngilangiʻia ʻa e ʻOtuá ʻi heʻenau moʻuí. ʻOku tānaki ʻe he ʻEikí ʻa kinautolu te nau fili ke tuku ke hoko ʻa e ʻOtuá ko e ivi tākiekina mahuʻinga taha ʻi heʻenau moʻuí.”

“Tuku ke Lāngilangiʻia ʻa e ʻOtuá,” Liahona, November 2020, 92.

Ikunaʻi ʻa e Māmaní

“Ko e ikuʻi ʻo māmaní ʻoku ʻikai ko ha meʻa ia ʻoku hoko ʻi ha ʻaho pē taha pe ua. ʻOku hoko ia ʻi he moʻuí kotoa ʻi heʻetau toutou pukenimā e tokāteline ʻa Kalaisí. ʻOku tau tanumaki e ʻofa ʻia Kalaisí ʻaki ʻetau fakatomala fakaʻaho mo tauhi e ngaahi fuakava ʻoku nau fakakoloaʻi kitautolu ʻaki ʻa e mālohí. ʻOku tau nofo ʻi he hala ʻo e fuakavá pea tāpuekina kitautolu ʻaki ha ivi fakalaumālie, tui lahi ange, pea mo e tauhi mai ʻa e kau ʻāngeló. ʻE lava ʻe he moʻui ʻaki e tokāteline ʻo Kalaisí ʻo fakatupu ʻa e founga mālohi mo maʻa tahá, mo fakatupu ha ivi mālohi fakalaumālie ʻi heʻetau moʻuí.”

“Ikuʻi ʻa Māmani mo Maʻu ha Fiemālie,” Liahona, Nōvember 2022, 97.

Fili ke Hoko ko ha Tokotaha Faʻa Fakalelei

“ʻOku tuli ʻe he fakakikihí ʻa e Laumālié—ʻi he taimi kotoa pē. ʻOku fakaivia ʻe he fakakikihí ʻa e fakakaukau hala ko e fakafepakí ko e founga ia ke fakaleleiʻi ʻaki ʻa e ngaahi faikehekehé; ka ʻoku ʻikai ʻaupito ke pehē ia. Ko e fakakikihí ko ha fili. Ko e faʻa fakaleleí ko ha fili. ʻOkú ke maʻu hoʻo tauʻatāina ke fili ʻa e fakakikihí pe fakaleleí. ʻOku ou tapou atu ke ke fili ke hoko ko ha tokotaha faʻa fakalelei, ʻi he taimí ni pea maʻu ai pē.”

“Fiemaʻu Ha Kau Faʻa Fakalelei,” Liahona, Mē 2023, 100.

Fakakaukau Fakasilesitiale

“ʻI he taimi ʻe fai ai hoʻo filí, ʻoku ou fakaafeʻi koe ke ke sio lōloa—ʻaki ha vakai ʻoku taʻengatá. Fakamuʻomuʻa ʻa Sīsū Kalaisi he ʻoku fakafalala ʻa e moʻui taʻengatá ki hoʻo tui kiate Ia mo ʻEne Fakaleleí. ʻOku toe fakafalala foki ia ki hoʻo talangofua ki Heʻene ngaahi fonó. ʻOku teuteu ʻe he talangofuá ʻa e hala ki he moʻui fiefiá maʻau ʻi he ʻahó ni, mo e pale taʻengata ʻi he kahaʻú.”

“Fakakaukau fakasilesitiale!,” Liahona, Nōvember 2023, 118.