Te U Teuteu Fēfē Nai ke Tali ʻa e Fakamoʻuí?

Ko ha founga ʻeni ʻe fā te ke lava ai ʻo tali ʻa e Fakamoʻuí ʻi hoʻo moʻuí.

Naʻe fiemaʻu ke teuteu ʻa e kakai Nīfaí ke nau tali fakatuʻasino ʻa e Fakamoʻuí ʻi honau ʻaó. Ko e hā ha meʻa te tau lava ʻo ako mei heʻenau tā-sīpingá ke tokoni ke tau maʻu fakalaumālie ʻa e Fakamoʻuí ki heʻetau moʻuí?

Fakalaulauloto ki he Ngaahi Meʻa ʻa e ʻOtuá

Kimuʻá: ʻI he taimi naʻe ongoʻi ai ʻe he palōfita ko Nīfaí naʻe “mafasia lahi hono lotó,” naʻá ne fakalaulauloto “ki he ngaahi meʻa ʻa ia kuo fakahā mai ʻe he ʻEikí kiate iá” (Hilamani 10:2–3).

Taimi ní: ʻI heʻetau manatu ki he meʻa kuo fai ʻe he ʻOtuá maʻatautolú, ʻi he taimi fakafiefiá mo e faingataʻá fakatouʻosi, te tau maʻu ʻa e ivi mo e loto-toʻa ke nofo ofi kiate Ia pea fehangahangai mo e kahaʻú ʻi he tui.

Naʻe fokotuʻu mai ʻe Palesiteni Henelī B. ʻAealingi, ko e Tokoni Ua ʻi he Kau Palesitenisī ʻUluakí, ke tau fakakaukauloto fakaʻaho mo lekooti e ngaahi ongo ʻoku tau maʻú. Naʻá ne pehē: “Te ke lava ʻo lotu mo fakalaulauloto, pea fai e fehuʻi ko ʻení: Naʻe ʻomi nai ʻe he ʻOtuá ha pōpoaki fakapatonu maʻaku? Naʻá ku mamata nai ki Hono toʻukupú ‘i heʻeku moʻuí pe ko e moʻui ʻa ‘eku fānaú?”

Kuó ke mātā fēfē ʻa e ʻofa, ueʻi fakalaumālie, pe ngaahi tāpuaki ʻa e ʻOtuá ʻi hoʻo moʻuí he ʻahó ni?

Toʻo Kiate Kimoutolu ʻa e Huafa ʻo Kalaisí

Kimuʻá: Naʻe loto-toʻa ʻa Molomona ʻi heʻene pehē ko ha “ākonga au ʻa Sīsū Kalaisi” (3 Nīfai 5:13).

Taimi ní: Kuo fokotuʻu mai ʻe ʻEletā Sonatane S. Simiti ʻo e Kau Fitungofulú te tau lava ʻo tokanga taha kia Sīsū Kalaisi ʻaki ʻetau toʻo kiate kitautolu ha ngaahi hingoa kehekehe ʻo Hono huafá. Hangē ko ʻení, ʻoku tatau ʻa Sīsū “ʻi he ʻaneafí, ʻaho ní, mo e taʻengatá” (1 Nīfai 10:18). ʻOku fokotuʻu mai ʻe ʻEletā Simiti te tau lava ʻo toʻo kiate kitautolu ʻa e hingoa ko ʻení ʻaki ʻetau tuʻu maʻu ʻi hono moʻui ʻaki ʻo e ongoongoleleí.

Ko e hā ha ngaahi huafa kehe ʻo Sīsū Kalaisi te ke lava ʻo fakakaukau ki ai pea fakaʻaongaʻi kiate koe?

Tuku ke Tānaki Koe ʻe he Fakamoʻuí Kiate Ia

Kimuʻá: ʻI he 3 Nīfai 10:4–6, ʻoku fakatatau ai ʻe Sīsū Kalaisi Ia ki ha motuʻa moa ʻokú ne tānaki hono fanga ʻuhikí. Ko ha fakatātā fakaʻofoʻofa ʻeni he ʻokú Ne taʻalo mai maʻu pē ke tau haʻu kiate Ia koeʻuhí ke Ne lava ʻo maluʻi mo fafanga kitautolu. Ka kuo pau ke tau fili ke haʻu kiate Ia. Naʻá Ne folofola, “Hono ʻikai ke tuʻo lahi ʻa ʻeku fie tānaki fakataha ʻa kimoutolu ʻo hangē ko e tānaki fakataha ʻe he motuʻa moá ʻa hono ʻuhikí, ka naʻe ʻikai te mou loto ki ai” (veesi 5).

Taimi ní: ʻOku hokohoko atu ke tānaki kitautolu ʻe Sīsū he ʻahó ni, ka kuo pau ke tau fakaʻatā ke tānaki kitautolu kiate Ia. ʻOkú ke fakaʻatā nai koe ke tānaki ki he Fakamoʻuí pea maʻu ha maluʻi ʻiate Ia, pe ʻokú ke fakasītuʻaʻi ia kae fakahāhā koe ki he fakatuʻutāmakí?

Ko e hā ʻa e fakaafe ʻoku fai atu ʻe he Fakamoʻuí kiate koé, pea ko e hā e meʻa ʻoku fiemaʻu ke ke fai ke ke tali iá?

Hanga ki he Langí

Kimuʻá: Naʻe feinga tuʻo tolu ʻa e kau Nīfaí ke fanongo ki he leʻo ʻo e ʻOtuá. “Naʻa nau toe fanongo ko hono tuʻo tolu ki he leʻó, ʻo nau fakaava honau telingá ke ongoʻi ia; pea naʻe hanga honau matá ki he feituʻu naʻe ongo ia mei aí; ʻo nau sio fakamamaʻu ki he langí, ʻa ia naʻe haʻu mei ai ʻa e leʻó” (3 Nīfai 11:5).

Taimi ní: Ko e founga ʻe taha te tau lava ai ʻo “sio fakamamaʻu ki he langí” ko e “fakakaukau fakasilesitiale” ʻi he lea ʻa Palesiteni Lāsolo M. Nalesoní. ʻOkú ne fakamatalaʻi ko e konga ʻe taha ʻo e fakakaukau fakasilesitialé ko e “fakakaukau fakalaumālie.”

Ko e hā ha meʻa te ke lava ʻo fai ke ke fakakaukau fakalaumālie lahi ange ai mo “sio fakamamaʻu ki he langí”?