Te Kaamenti n te Nakoanibonga ae Tabu”, Riaona, Tebetembwa. 2024.
Te Kaamenti n te Nakoanibonga ae Tabu
Ngkai mwakoron te entaumente n te tembora, ti a tia n anganaki te kauring ae tabu n te rabwata n ara berita aika a tabu —kanikinaean te Tia Kamaiu n ti Ngaia.
Rongorongo man Adam and Eve, iroun Douglas M. Fryer
N aki tabe ma te katauraoi are a tia n anganaki n akea te nanokokoraki ao kamatoaan nanououa ake a kataia n ururingnga, e na bon kakuba nakon Atam ao Ewa ni kitanan te Nne n Aroka i Eten are te bwaretaiti ao a roko n te aonaaba ni bwaka.
Ma te kauring ae oota raoi, a karekea nanon kaibibitan mwengaraoia, maiuia ae nakoraoi nakon te aonaaba n kakaaitara ao n maono, kateketeke, ao nanokawaki—n rimwiiaki ma te bwai ae aranaki bwa te mate. A bon aki ataia mai moana bwa tera nanon aikai ni kabane, ma a reiakinna ni waekoa bwa e kona te bong teuana n uota te maraki ae boou. Eng, te kabanea n kammaraki n bwaai ni kabane bon ataakina bwa a nang kaitaraa te maenako aio mairoun Tamaia arei i Karawa—“a kanakoaki mai matana,” E koreia i mwiina Mote.
Anganakiia te kamaenakoaki ao te maroaa n te aonaaba ae kaimwaitoro, kabotu, ai karaunanora nakoia Atam ao Ewa n uringnga teuana te bwai: te berita are e karaoaki arei—te bwai ae tabu ao n akea tokina ae ataaki bwa berita aika a tabu. A tia ni berita bwa a na ongeaaba iroun te Tama ni kabanea bongin maiuia, ao E a tia ni berita bwa e na katauraoa te Tia Kamaiu, are e na kamaiuia man marakiia ao rawawataia, n karaoa te mwakuri ni kamaiu ibukin aia bure nako, ao n kaokia ma te kamanoaki nako Matana.
Ma a na kanga n ururingnga te bwai are a tia ni beritanaki aomata aikai? A na kanga n teimatoa n atai aroia aika a karuanikai—ataia n taainako, te ngaina ma te bong?!
Te Kauring n Aia Berita aika a Tabu
Ibukin te kauring E anganiia “kunikai man kuniia maan.” Ai tamaroara te bwaintangira aei ao rokona n taina. I mwiin kanakin uaan te kai ae tabuaki, a bon ataia naba n te tai ae tawe Atam ao Ewa bwa a bebeekan. Te moan, a kataia ni karabai bebeekaniia ma baaen biiku. I mwiina, ngke a ataia bwa e aki tau anne, a kataia ni karabaia mairoun te Uea. (Man te kakatai ae burababa bon kaotan waakin te maiu n te maiu ae mamate!) Man te tai anne ni karokoa ngkai, e kaoiia natina te Tama ae tatangira bwa a na roko, man karabakiia, nakoina. Ao ma kunnikaia maan ngkoa ao tabeua kunnikai man te tai anne, Ngaia ma Ana nanoanga e aki kitaniira n akea karabaara ma e kunnikaiia ake a ongeaba n te “rabuna ae raoiroi,” ae te kauring n ara berita ao berita aika a tabu. Taian “kunnikai aika bwain te maiu” a tei ibukin te bwain tangira ae moan te korakora, Ana Mwakuri ni Kamaiu Iesu Kristo.
Te Kaamenti Bon Kanikinaean te Tia Kamaiu
Ngaia are, iangoan ni kabane aron Atam ao Ewa ao berita aika a tabu ao kunnikai, ni koauana, e raka riki nakon te kakammwakuri n te iango. E aki kangaanga iangoan aron aia namakin Atam ao Ewa, ibukina bwa ngaira naba ti kaitarai kangaanga n te aonaaba ae bwaka aei. Ngaira naba ti a tia n kamaenakoaki mai matan te Atua, ao ti a manga kararoaira riki ni katoaa te tai are ti bure iai. N aron Atam ao Ewa, ti a tia n anganaki te Tia Kamaiu ae ti temanna, Iesu Kristo te I-Natareta, te Arebwa ao te Omeka, Natin te Atua ae maiu. N aron Atam ao Ewa, ti a tia ni karaoi berita aika a tabu ma te Atua. Ao, ngkai mwakoron te entaumente n te tembora, ti a tia n anganaki te kauring ae tabu n te rabwata n ara berita aika a tabu—kanikinaean te Tia Kamaiu ni bon ti Ngaia. N ara boong aikai e aranaki te kaamenti bwa te nakoanibonga ae tabu.
Ti bwaina te kaamenti aei i aan ara kunikai. Bwa tera mwiokoau are I karekea, mwiokoau ae I karaoia i nanon maiu, mwakuri n te maiu ni katoabong are e kainanoaki, i aan au berita aika a tabu ni kabanea—n taainako ao n aki toki. Iaan bwaai ni kabane bon berita ake a tabu akanne are I kakorakoraai n taua ni kamatoaa. E aki katanoataaki ke ni kaotaki te kaamenti nakon te aonaaba, ao ai aron naba au berita aika a tabu. Ma I kawaakinii ni kauoua irou ni kaaniia—ni kaania n aron are I konaa. A bon nako mai nanon te aomata ao n rietaata tabuna.
N uringakin berita aika a tabu akanne, berita ni kauaitera akanne, ti bwaina te kaamenti i nanon maiura ni kabanea. Te mwakuri ni kataneiai aio e kaotaki i nanora ibukin te Tia Kamaiu ae na teimatoa n riki bwa te kairiiri i nanon maiura. Kanikinaa tabeua aika a tangiraki aika a ri-riki i nanon taai. Ti bwabetitoaki ti te taina i nanon maiura. Ti kana te toa te taina n te wiiki. Ti nakon te tembora n mwaawan ara tai. Ma e kaokoro te kaamenti n te nakoanibonga ae tabu: ti karinea te kanikina n te ngaina ao n te bong n taainako.
Ao anne aron berita aika a tabu—a aki katinanikuaki bwa akea riaia ke n aki tararuaaki ao n aki kanakoraoaki bwa e na bootau ma tein ao waaki ibukin te botanoamata. N maium ana reirei Iesu Kristo, waakin te aonaaba e riai ni kanakoraoaki ni kainetaki ma ara berita aika a tabu, tiaki n te kawai ae kaokoro arona.
Ngkana ti karina te kaamenti, ngaira, n aron ana reirei te Moan Beretitentii, ti katokaa ana kanikinaa Iesu Kristo ae tabu. Anne bon arona, bukin tera ti kakaei aanga ni totokoa te kanikinaa anne? Bukin tera ti totokoira man mwaakan te berita, kamanomano, ao nanoanga are e tei ibukin te kaamenti? Ni kaitaraana, n te tai are ti kamwawaa te kaamenti n te tai ae aki maan, ti riai n ingainga n manga bwainna, n te tai ae rangi ni waekoa, ibukina bwa ti uringii berita ni kauoua ao karuanikai ake a nanonaki nakon ara berita aika a tabu. I aon bwaai ni kabane, ti uringa te kaibangaki ao ruanimaten Kristo ae akea kaaina.
Tabeman a kona ni kangai, “Iai au anga riki n ururinga Iesu.” Ao N na kaeka, e tamaroa anne. Mwaitina bon tamaroana riki. Ti na iangoi kawai aika a mwaiti ake ti kona n kawaakina ara motinnano n “ururingnga n taainako.” Ma n karaoana, e na bon akea te kokoaua n akean mwannanoan ana kauring te Uea are e anga nakoia ake a entaau, te kaamenti n te nakoanibonga ae tabu.
E bane nanou iroun Iesu Kristo ao Ana euangkerio. Ni kabane au kaantaninga ao nanou ae matoa ni kabane, bwaai ni kabane ake a tangiraki irou, a tine i Rouna. Ngaia bon “te bwa ibukin kamaiuau,” kawaiu n roko iroun Tamau are i Karawa, bon ti kawaiu n oki nakon are iai ngkoa irou ao ngkai I tangiria n karekea riki, ni ikotaki ma aika a mwaiti riki. Ana bwain tangira nakoira bon te kabanea n tatangira ae I a tia ni karekea, te kabanea n tatangira ae e a tia n anga—karekea n arona ma korakaina ae akea tiana, e anga n akea tian mwaitina, katokaaki i aora ma te tangira ae akea tiana. Akanta ma kateketeke, te maraki ma te rawawata, te korakai ao buren te aonaaba ae bwaka a bane n “anaaki kammarakin te mate iroun Kristo.”
Ngaia are I a bwaina te kaamenti n te nakoanibonga ae tabu—ni katoa te ngaina ao te bong n bon arona man te tai are I entaau iai 64 te ririki n nako, ngke 19 au ririki—ibukina bwa I tangiria ao bukina bwa I kainnanoi berita ake a tei ibukina.
Titiraki ibukin Bwainakin te Kaamenti?
Tabeman mai buakomi kam wareka te rongorongo aei kam kaantaningaia bwa N na kaekaa te titiraki ae kaineti ibukin te kaamenti. Tao kam kaantaninga ibukin “Ma ngaia e taku te Uea” —ke “Ma ngaia ae a taku Ana toro” —n te bwai ae mena i nanom. Tao am titiraki e otinako man arom are e irekereke nakon te mwakuri, kamarurung, kakaitiaki, kanoan te bong, katei aika a riai, taabo aika a itiaki, ke aron te marurung.
Tabeua kaeka nakon aeka n titiraki aikai a kona n kuneaki n temples.ChurchofJesusChrist.org and in section 38.5 of the Aeniboki ni Kabuta. A kona n kaongoaki utu aika a onimakinaki ao mataniwi ibukin te bwai ae riki iroun temanna. Ma, iai, te kairiiri ae e itiaki ae reke n te otenanti te kabiribiri, ao iai n akea tokina Tamara are i Karawa, are e ataiko ao n tangiriko ao n oota ni bwaai ni kabane ibukin arom nako. E na bon kukurei ngkana ko titiraki Nakoina titiraki n aomata aikai.
Tamnein taubukin St. George Utah Tembora
Taiaoka ma oota. Ngkai ko kakaea te kairiiri ma i eta, te Tamnei e na aki kaungako n karaoa ae karako nakon iriiran kaetieti ake a karekeaki n te tembora ao reirei n burabeti ake a tibwaaki n ana rongorongo te Moan Beretitentii. Te Tama ae tatangira e na aki buokiko ni karaoan ae karako nakon are ko kona n karinanna ma Arona n tatangira ao n karaoa ae riai are e na kakabwaiako ngkai ao n aki toki. Ma E mataata n am titiraki, ao E na buokiko n karekei kakabwaia man karinean te kaamenti ao kawaakinan am berita aika a tabu? Eng! Ko na tuangiia taan rabakau ibukin te aoraki ao te marurung ma te nanomatoa ngkana e kainnanoaki? Eng! Ko na aki tabe ma baika a riai ke taraan bwaai aika a aki atai nanoia? I tataro bwa ko na aki.
I aki kona n kaekai titiraki ni kabane ake i roumi. I aki kona n kaekai titiraki ni kabane ake i rou. Ma I kona, ngkai ana Abotoro Iesu Kristo ngai, I berita nakoim ana buoka te Atua ae tatangira, are e ukora ni kabane tokanikai ao kakabwaia, n kawai are ko aki konaa ngkai ni mataata ke n kaman n nooria, ngkai ko kawakini berita aika a tabu ake ko a tia ni karaoia ma Ngaia.