Bwii n Ririki n Tamaroan te Beku: Ana Reirei aika Rineaki Beretitenti Russell M. Nelson

Ngkai 100 ana ririki, Beretitenti Nelson e a tia ni beku 40 te ririki bwa te Abotoro. Aika imwina bon tabeua man ana angareirei man te tai are e Beretitenti iai n te Ekaretia.

Waakinna ma Iai Mwiina

“Te kouru ae ti bane ni uaiakinna bon te entaute ma te mwaaka n ana auti te Uea, ni kabaeaki bwa utu, kakaonimaki nakon berita aika a karaoaki n te tembora are e katauiira ibukin ana bwaintituaraoi te Atua ae te kabanea n tamaroa—anne are bon te maiu are akea tokina. Otenanti n te tembora ao berita aika tabu aika ko karaoi ikekei bon kiing ni kakorakorakin maium, am mare ao am utu, ao am konabwai ni kaitarai ana mwakuri te tia kakaitara. Am nebonebo n te tembora ao am mwakuri n ibuobuoki ikekei ibukiia am bakatibu e na kakabwaiako ma rikiraken am kaotioti ao te rau ao e na karikirakea am motinnano n teimatoa i aon te kawai ae e Beritanaki.”

“Ngkai Ti Waaki Nako ni Bootaki,” Riaona, Eberi 2018, 7.

Rairannano ni Katoa Bong

“Akea kainaomatakin riki, te bwai teuana are e kamoamoa riki, ke te bwai teuana are e kakaawaki riki nakon rikirakera n tatabemaniira nako n tainako, ni katoa bong ae boboto iaon te rairannano. Te rairannano bon tiaki te bwai teuana are e riki n tii te taina, bon te bwai ae rinanon mwakuriana. Bon te king nakon te kakukurei ao raun te iango. Ngkana e reitaki ma te onimaki, te rairannano e kona ni kangaraoa karekean mwaakan ana Mwakuri ni Kamaiu Iesu Kristo.”

Ti Kona ni Karaoa ae Tamaroa Riki ao ni Katamaroa Riki,” Riaona,, Meei 2019, 67.

Karaoi ao Kawakin Berita Aika Tabu

“Ni kabane aine ao mwaane ake a karaoi berita ma te Atua ao ni kawakin berita akanne, ao a mwakuri ma te kororaoi n otenanti n te nakoanibonga, iai aia kona ni karekea mwaakan te Atua. Naake a tia n entaute n ana auti te Uea a tia ni karekea te bwai n tangira ae mwaakan te nakoanibonga man karaoan nanon aia berita, ni ikotaki ma te bwai n tangira n atatai bwa a na kanga ni karekea te mwaaka anne.”

Kakabwaia n te Tamnei,” Riaona, Nobembwa 2019, 77.

Ongo te Uea

“Tamara e ataia bwa ngkana ti otabwaniniaki n te nanokokoraki ao te maaku, te bwai ae na buokiira riki bon te ongo iroun Natina.

“Ibukina bwa ngkana ti ukeuke n kan ongora—n ongora ni koaua—iroun Natina, ti na kairaki bwa ti na atai bwaai ake ti na karaoi n arora nako.”

Ongo Irouna” Riaona, Meei 2020, 89.

Kariaia te Atua Bwa Boton Ara Iango Inanon Maiura

Ma nanon te taeka n Ebera ibukin Iteraera n am iango, ti kunea bwa ikotakiia Iteraera e a raka riki nanona. Te Uea e ikotiia naake a tauraoi ni kariaia te Atua bwa e na tautaekani maiuia. Te Uea e ikotiia naake a na rineia ni kariaia te Atua bwa e na riki bwa te bitaki ae kakawaki inanon maiuia.”

Kariaia te Atua Bwa Boton Ara Iango Inanon Maiura,” Riaona, Nobembwa 2020, 92.

Te Tokanikai i aon te Aonaaba

“Te tokanikai man kangaangan te aonaaba tiaki te bwai ae riki n te bongina ke uabong. E ririki inanon maiura ngkana ti teimatoa ni irii ana reirei Kristo. Ti ribanaa ara onimaki iroun Iesu Kristo man ara rairan nano ni katoa bong ao ni kawakin ara berita ake anganiira te mwaaka. Ti teimatoa n nakonako inanon kawain ara berita ao ni kakabwaiaaki ma korakoran tamneira, ma kaotioti aika onoti, ao kakorakorakin ara onimaki, ma aia mwakuri n ibuobuoki anera. Maiuakinan ana reirei Kristo e kona ni karika te kabanea ni korakora n namakin ae teimtoa, are e na anganiira kakorakorakin tamneira inanon maiura.”

Russell M. Nelson, “Tokanikai man Kangaangan te Aonaaba ao Karekean te Rau,” Riaona, Nobembwa. 2022, 97.

Rineia n Riki bwa te Tia Kawakina te Rau

“Te kakauntaeka e kabirinakoa te Tamnei—n taai nako. Te kakauntaeka e kakorakora te iango ae bure are te kakauntaeka bon te kawai ni katoki kakaokoro n iango; ma e aki kona. Te kakauntaeka bon te rinerine. Karekean te rau bon te rinerine. Iai inaomatam n rinea te kakauntaeka ke te raoi. I kaumakiko n rineia bwa ko na riki bwa te tia karika te raoi, ngkai ao n taainako.”

“A Kainnanoaki Taan Raoi,” Riaona, Meei 2023, 100.

Iangoa te Abanuea ae te Tiretio

“Ngkana ko karaoi am rinerine, I kaoiko bwa ko na karaua raoi n taraia—te taratara ae akea tokina. Karimoa Iesu Kristo, ibukina bwa maium ae akea tokina e bon kaineti nakon am onimaki Irouna ao n Ana Mwakuri ni Kamaiu. E bon kainanoa naba am ongeaba nakon Ana tua nako. Am ongeaba e bon karaoa te kawai ibukin te maiu ae kakukurei n te bong aei ao n taainako, ko na karekea te kanuanga n te maiu ae aki toki ningabong.”

“Iangoa te abanuea ae te Tiretio!,” Riaona, Nobembwa. 2023, 118.