“Russell M. Nelson: Te Burabeti Ibukin Ara Bong,” Riaona, Tebetemba 2024.
Russell M. Nelson: Te Burabeti Ibukin Ara Bong
Ma te burabeti ni kairiira inanon boong ni kaitira, ti kakoaua bwa aomata aika ti kakabwaiaaki.
Beretitenti Russell M.Nelson e kamauriia aomata imwiin te taromauri i Singapore n Nobembwa 20, 2019.
Ngke te tia intawiu temwaane e kakanikoa “Ana Ekaretia Iesu Kristo ibukiia Aika Itiaki ni Boong aika Kaitira bwa e kabutaki irouia unimwaane aika kara,” Beretitenti Gordon B. Hinckley (1910-2008) e kaeka, “e aki tamaroa te mwaane ae e toki mwaanena n riki bwa atuura, te mwaane ni motiki taeka ae aki kona nukaki nako n angin taian reirei?”
Beretitenti Russell M. Nelson, te kabanea ni kara ni burabeti ae maiu ni beku inanon koron boong, bon aron te mwaane. E kakoroa ana ka 100 n ririki n Tebetembwa 9, 2024. Boni ngaia te tia kairiiri ae kamiimi arona n nanoanga ao n tatangira, n noraaba ma ni marurung raoi, e aamarau ao ni wanawana.
I tangira te beretitenti Nelson. Ti a tia n riki bwa rao inanon 60 te ririki ao raou n Abotoro inanon 40 te ririki. Inanon Tianuare 2018, I a tia ni kakabwaiaaki ni beku iaan ana kaetieti inanon te Moan Beretitentii n te Ekaretia.
E weteaki ni kaira ana Ekaretia Iesu Kristo ae kaokaki ao n riki ni kakawaki nakoana n tia reirei, Beretitenti Nelson e ataa te Tia Kamaiu, are bon te burabeti ngaia. Rinanon te tienture ni maiu ao reiakinna, e a tia ni karietaaki n tamaroan aron wanawana ao ana mwakuri n te tanga ni buaka. Ngaia ma ana utu ae bubura, e a tia n riki bwa te tia kairiiri ae tatangira man tatauraoii ni mweengana. Rinanon nakoana n te Ekaretia, n ikotaki ma onoua te ririki n nako ngkai ana burabeti te Uea, e a tia n riki bwa te tia kairiiri ae na katotongaki n ana Ekaretia te Uea ae kaokaki.
Rinanon te tienture ni maiu, Beretitenti Nelson e tia n reiakinna ao ni kammwakuri kiing nakon te kakukurei inanon te maiu aei ao te maiu ae na roko—tera ae e a tia n aranna n te maiu “moan reirei ae kakawaki.”
E a tia n reireiniira bwa ti riai ni “moanna man te kabanea inanon maiura.”
E tangira ana auti te Uea. Inanon te ririki ngke Beretitenti n te Ekaretia, e a tia ni katanoatai 153 tembora aika a boou—kanga iteran mwaitin tembora ake a tia ni kateaki, ake a waaki kateaia, ke a tia n katanoataaki inanon koron boong aei.
E a tia n reireiniira bwa ni kabane ara tembora ake a kateaki a uotii tembora, ao kakabwaia man berita aika tabu n te tembora, ni kaaniira riki bwa natin te Atua. Anne bon ana babaire te Atua.
Beretitenti Nelson e reirei, “I a tia n reiakinna bwa ana babaire Tamara are i Karawa ibukira e bon rangi ni kamimi, bwa bwaai ake ti karaoi n te maiu aei a bon rangi ni kakawaki, ao ana Mwakuri ni kamaiu te Tia Kamaiu bon ngaia are kakoroa nanon ana baire Tamara.” Mataatara n te baire anne, e taku, “uoti nako kamimin te maiu ao te nanououa man ara bong aika a na roko. E kariaira n tatabemaniira nako n rineia bwa ti na kangaa ni maeka ikai i aon te aba ao iia te tabo are ti na maeka iai n aki toki.”
Ngkai ngaira Aika Itiaki ni Boong aikai, boni ngaira aomata aika ti kakabwaiaaki ni kairaki iroun ana toro te Uea ae mangori, ae Beretitenti Nelson, are e bon katabuaki ni katauraoa te aonaaba imwan Kauaokin Okin ara Tia Kamaiu ao ara Tia Kabooi Maiura, Iesu Kristo. Ti na bane n reitinako n tataro ibukin, kakoaua, kamatoa, ao ni kaitaua te Atua ibukin ara burabeti—Beretitenti Russell Marion Nelson.