Akea te Tiku ni Maroaa: 7 Kawai n Tomaiko

Iroun Julianne Holt-Lunstad

Te Burobeetia ibukin Rabakaun te Nano, Brigham Young Iuniwetiri

Te tiku ni maroaa bon te kakaewenako are e kona n riki bwa te tokanikai ma tabeua kekeiaki, namakin man te korakora, ao buoka mairoun te Tia Kamaiu.

uoman aomata ngke a kaai n nakonako i bon irouia

Ti na bane n rinanon te tiku ni maroaa n tabetai. N tabetai namakin man te tiku ni maroaa e kona n riki ni marurung ao uaana, te kanikina ni bwaai aika maiu are ti na kainanoia ni katea korakoran ara reitaki. Ma reitinakon te tiku ni maroaa n tainako bon oin kangaanga nakon te kakukurei.

Tamara are i Karawa n ana babaire ni kakukurei e reita ikoikotakira inanon ara utu ao inanon te taromauri. Aei e aki tii buokiira inanon ara kekeiaki ae akea tokina ma inanon naba kainnanora n aomata bwa ti na mena ibuakoia tabeman, n namakinna ae kanga ti bwaibwai, n anga ao n karekea namakinan te boutoka. Te tiaienti e moanna ni kina te waaki n reitaki n aron kainnanon bwaai aika a maiu n toma nakon maurungira ao te kamaiu.

Bon kainnanon te maiu n tamnei naba. Ti kainnanoira ngaira n tatabemaniira ibukin mweeraointamneira ao rikirakena. Ao karawa e kaonaki ma te reitaki ae akea tokina bon iangoan te kimwareirei ae onoti (taraa Reirei ao Berita aika Tabu 130:2).

Iangoi tabeua iango aikai ni buakana te tiku ni maroaa inanon maium:

Onimakina te Tia Kamaiu. Tamam are i Karawa ao Iesu Kristo a atai tikum ni maroaa ao a tangiria ni buokiko. Ataakina bwa te Tia Kamaiu e atatai ma te maraki man te tiku ni maroaa are e kona ni buokiko n ataia bwa E mataata bwa tera ae ko namakinna. Kaniiaki nakon Tamara are i Karawa ao te Tia Kamaiu rinanon te tataro, kamatebwaian koroboki aika tabu, ao te taromauri n te Tabati ao n te tembora e na buokiko n ataia ae ko aki tiku ni maroaa. Ngke e reirei Beretitenti Russell M. Nelson, “Ngkana ti kabotoi maiura i aon … Iesu Kristo ao Ana euangkerio, tina kona namakina te kimwareirei n aki tabe bwa tera ae riki—ke akea ae riki—inanon maiura.”
Bwaina te iraorao. Te tiku ni maroaa e kona n tabetai ni karikiira bwa ti na nanououa ni karaoan te kekeiaki ike e na kabebetea marakira. Karaoa te tutuo-iaom n taraia ngkana e iai kaninaean te aoraki iroum. Ngkai ko kakaeiia raoraonakim, uringnga bwa karaoan te iraorao n tainako e kainanoaki. E beebete taekinan mauri nakoia kain rarikim e kona ni karika te bitaki. Ao ukourakin aanga ni kakabwaia i aon maiuiia tabeman ake a ikakorakora ma te tiku ni maroaa tao e riki bwa teuana te ibuobuoki n aroia ae mwakaroiroi iaoia.
Kateaki iaon kakukurei aika tabangaki. Ukoriia nako aomata ao kurubu ake kukureiia, aia taratara, ao aia kainibaire ake titebo ma ake iroum. Ko kona ni kakakea (ke n iangoa moanakin!) te kirabu ni boki, te kirabu ibukin te mwakuri n ibuobuoki, kirabu n nakonako, kurubu n anene, kurubu ibukin kai ni utu, aia kurubu kaaro ake a mwaing nako natiia .
Kakorakoran am reitakim. Angiia aomata a kaman karekea te reitaki ma aia utu, raoraoia, kain rarikiia, ao kain aia uoote. Tobwaakin otinakon reitaki aikai bon te moan waaki ngkana e buakanaki te tiku ni maroaa. Te reitaki e anaa te tai ni kaokia nakon arona, ngaia tiku n rau ngkai ko tobwaa te reitaki. Uringa bwa tamaroan am reitaki e rang kakawaki nakon mwaitin am reitaki ake ko a tia ni karekei.
Kakaai anga ni beku ao n tibwai am taarena ao bwaintangira n te maiu n tamnei. Iai aanga ake aki tianaki ni karaoan te tararua ao mwakuri n ibuobuoki inanon te Ekaretia, ara utu, ao te komunite. Ngkana ti namakina ara mwakuri korakora bwa a karekea te tamaroa iaoia tabeman, e kona ni uota namakin aika iai nanona ao te kantaninga nakon maiura. Namakinan maiura bwa iai nanoia nakoia tabeman bon te waeremwe nakoia ake a tiku ni maroaa.
Babaire ibukin taai ni kakaewenako. Bong ni motirawa ao bongin namwakaina aika a kakawaki, n aron kauringaakin mateia rao aika tangiraki, e kona n riki ni matoa. Kataia ni bairei waaki ni kakukurei ma raoraom ke utu ni boong akanne ni kawakin man tiku iaon am reitaki are ko tangiria.
Irira te mwakuri n te tembora ao rongorongo te utu. Aio bon mwakaroiroin kawai n namakina te mweeraoi ao te bwaibwai. Unimwaane Dale G. Renlund man te Kooram n Abotoro n Tengaun ma Uoman e beritan mwaitin kakabwaia ake ti kona ni karekei, n ikotaki ”karikirakea te tangira ao te kakaitau ibukiia ara bakatibu ao ara koraki ake a maiu, bwa ti aonga n aki namakina te maroaa.”

Ibukin te tiku ni maroaa irouia angaiia aomata bon te kakaewenako are a kona n tokanikai ma tabeua mwakuri korakora, namakin n te korakora, ao buokakiia mairoun te Tia Kamaiu.