“Te Burabeti e Kairiira nakon Iesu Kristo,” Riaona, Tebetembwa 2024.
Te Burabeti e Kairiira nakon Iesu Kristo
Te burabeti e ataa te kawai ibukina e ataa Iesu Kristo, are bon “te kawai, te koaua, ao te maiu” (Ioane 14:6).
Ukoukora Temanna, iroun Liz Lemon Swindle, e na aki katootongaki
Teuana te bong I tabe ni katawanou inanon te tabo n amwarake n ana Tabo ni Mwakuri te Ekaretia ma teniman raou ni mwakuri n te Itingaun. Ngke ti tabe n amwarake, Beretitenti Russell M. Nelson e roko nakon ara taibora ma ana boora n tuubu ao e taku, “I kona n reitai ma ngkami?”
“Eng, Beretitenti,” ti bane ni kaeka. Antai ae e aki kan reitaki ni katawanou ma te burabeti?
Ngke ti amwarake, Beretitenti Nelson e tibwaua tabeua taneiai are e a tia ni karekea n aaba aika mwaiti are e kawari ao e taetae i aoia aomata ake a tia ni kaungaa. E bon rangi n akoi, wanawana, ao nano n tituaraoi.
Ngke ti a tia ni katawanou, I rairaki nakon Beretitenti Nelson ao n taku, “Beretitenti, I aki ataia ngkana N na manga kona n te tekateka ma ngkoe n te taina. Ma n te tairiki aei, N na nako n noora kainabau ao natiu ao n tuangiia bwa I katawanou ma te burabeti. I ataia bwa ane a na titirakinai, Tera ae tuangko bwa ko na tuangiira?’ Beretitenti, tera ae ko tangirai bwa N na tuanga kainabau ao natiu?”
Beretitenti Nelson e taraai tabeua te tai. I rangi n ingainga ni kan ongo bwa tera ae e na taekinna! “Iai au taeka ae tii teniua ibukim,” e taku. “Tuangiia am utu bwa I taku, ‘Kawakin taian tua.’”
Ngaira ti a bane n tia n ongo te reirei aei mairoun te Beretitenti Nelson mai mwaina, ma n te tai anne, I namakinna i bon irou, matoan te kakoaua bwa Beretitenti Nelson bon te burabeti ni koaua. I karabwaa, ao imwin te bonga anne I tuangiia au utu te bwai ae riki. Imwiina natira a karaoi taian bwai ni kanim “Kawakin taian Tua” ao ni katukui i aon ara aitibwaoki ao taian tirotaam ni kauringiira ana taeka Beretitenti Nelson.
Man te tai anne, ao I a tia n iangoa raoi ana reirei Beretitenti Nelson. Ngkana ti kawakin taian tua, ti kaota ara tangira ibukin Tamara are i Karawa ao te Tia Kamaiu. Ti na kaniira Nakoia ao ni maeka n Aia tangira. (Taraa Ioane 14:21; 15:10.)
Te taneiai aei ma te burabeti e a tia ni kamatoa nakoiu te iango ae nano ao kakawakin koauan te maiu n tamnei. N te moanrinan ti anenea, “Ira te Burabeti; e ata te kawai.” E ataa te kawai! Te burabeti e ataa te kawai ibukina e ataa te Tia Kamaiu, are bon “te kawai, ao te koaua, ao te maiu” (Ioane 14:6). Ngkana ti iriira te burabeti, ti bon kairaki nakon Iesu Kristo.
Nakoan te Burabeti ae Tabu
Te Uea e anga te nakoa ae kakawaki ao e tabu nakon te burabeti n aron ake ngkoa ao inanon ara bong. Ti warekia inanon koroboki aika tabu “e na bon aki karaoa te bwai teuana te Uea ae Iehova, ni karokoa e kaota moa nanona ae raba nakoia ana toro aika burabeti” (Ana Rairairi Iotebwa Timiti, Amota 3:7 [n Amota 3:7, footnote a]).
N ana boki Etekiera, ti reiakinna riki bwa tera ae kainanoaki irouia burabeti. Te Uea e taku nakon te burabeti Etekiera, “I kateiko ba te tia tantani nakon te bata are Iteraera, ma ngaia ae ko na ongo te taeka [mai] wiu, ao ko na tuangia n reireia mai Rou.”(Etekiera 33:7).
Burabeti ai aroia uatiman i aon te taua, iai te mwioko ae onoti n riki bwa wiin te Uea ao ni katanoata bwa tera E a tia kaotia nakoia. Te Uea e kainanoia Ana burabeti n riki bwa mwaane n te onimaki, mwaane n te kokoaua, ao mwaane aika aki mamaaku.
Kamataatan korotamnein Tamuera iroun Dan Burr
Tamuera te Remwanaite, te katooto, e kaota bwaninin ana motinnano nakon Iesu Kristo ngke e tei iaon te o ao e takarua nakoia Nibwaite bwaai ake e karin te Uea inanona (taraa Ereman 13:4).
“Ao nooria, e a tia n taekinna ana anera te Uea nakoiu,” Tamuera e taku, “ao e bon uota te rongorongo ae kakukurei nakon tamneiu. Ao nooria, I bon kanakomaiakaki nakoim bwa N na tataekinna nakoimi naba, bwa e aonga n ae kam karekea te rongorongo ae kakukurei naba; ma nooria kam bon rawa ni butimwaeai” (Ereman 13:7).
E bon raka tamaroana nakoiu bwa Tamuera e matoan nanona ni kakoauan te koaua—e ngae ngke Nibwaite “a karebanaia n taian atiibu … ao … a katebea ni kanoan aia kai ni katebe ngke e tei iaon te o” (Ereman 16:2). Ti noora matoan te nano aei irouia burabeti, taan mamata, ao taan kaotioti n te bonga aei.
Karikan te Aonaaba bwa te Tabo ae Tamaroa
N te tai ae aki maan nako, I kaaitibo ma taanga inanon ana maungatabu te titeiki i Nashville, Tennessee, USA. Te buu aine e a kaman riki bwa te membwa n te Ekaretia inanon maiuna. Te buu temwaane bon tiaki te membwa.
A roko ni kawarai, ao te buu temwaane e taku, “I a tauraoi ni bwabetitoaki.”
I bon kukurei n ongo anne! I titirakinna, “Tera e a tia ni bitaki?”
E tuangai, “Ngke I ongo ana rongorongo Beretitenti Nelson n te maungatabu ni kabuta, e riingaki nanou n te aro ae moan te korakora. I ataia ngkanne bwa bon te Burabeti. I karekea au kakoaua, ao ngkai I a tauraoi ni bwabetitoaki.”
I ataa naba te aine i Cape Coast, Ghana, are e reke rokona n te maungatabu ni kabuta. E bon tuai n ongoongo taekan Ana Ekaretia Iesu Kristo ibukiia Aika Itiaki ni Boong aika Kaitira, ma e riki n nim nakon te bwai are e nooria ao n ongo mairoun te burabeti, tia mamata, ao tia kaotioti. Imwiina, e kakaea te Ekaretia. E kunea te umantabu ao ni kaaitibo ma mitinare. E ngae n anne e bon bwabetitoaki. N te tai ae aki maan, e kanakoi tamneina n te tembora ngke e na karekea ana entaumente.
Uoua bwaai ni kakairi aikai e kaotaki iai mwaakaroiroin ana rongorongo te burabeti n riki nakon te aonaaba! Ngkana aomata a ongo nakon ana rongorongo, te aonaaba e na karekea n rau. Ti na bane ni kabotoi ara iango i aon bwaai aika a kakawaki riki, n ikotaki ma karikirakean ara reitaki ma Tamara are i Karawa ao Natina, Iesu Kristo, ao ni kamatoa katean, te utu ae akea tokina. Ti riai n riki naba n tamaroa n rabwatara ibukina ti na kawakin tuua ake uoua aika korakora: tangira te Atua ao tangiriia kaain rarikim (taraa Mataio 22:37–39). Ti na katearake Tion, te bobotaki ike iai te tangira, te tamaroa, ao te maeka ma te rau, kaota tamnein ana reirei Iesu (taraa Reirei ao Berita aika Tabu 82:14).
Ngkana ti iriira te burabeti, ti kona ni kakoaua raoi bwa tera ae tangiria te Atua bwa ti na karaoia ibukina burabeti a iriiria—ao e buokiira n iriira—Iesu Kristo. Ibukin Iesu Kristo, bwaai ni kabane n te maiu iai bukiia ni kabane. “Ti kona n namakina te kukurei n aki taraa tera are e riki—ke e aki riki—ni maiura.” Man iriirakin te burabeti, ti kona n karaoa ni koaua te aonaaba bwa te tabo ae tamaroa.
Kakaei Kakabwaia ake A Beritanaki
Ngke Aika itiaki a kanakoaki mai Kirtland, Ohio, te Moan Beretitentii e onimakina Oliver Granger ni kabooi nako aia bwai Aika itiaki ao ni kaitiaka ana taarau te Ekaretia. Oliver, temwaane ae bon tau ma e mataaki ni korakoran te mwaitoro, e kariaia te mwakuri ae kakaewenako aei ibukina bwa e tuangaki iroun te Burabeti Iotebwa Timiti ao tabeman taan kairiiri. Oliver e kawakinaki rinanon kangaanga aika a mwaiti, ao te Uea e kabongana ana anganano ao ana mwakuri korakora.
“I uringa au toro ae Oliver Granger,” e taku te Uea. “Nooria, e koaua ae I tuangnga bwa arana e na uringaki n ae tabu man te roro teuana nakon te roro teuana, n aki tootoki. …
“… Ao ngkana e bwaka e na manga teirake, bwa ana karea e na rang tabu riki nakoiu nakon rikirakena, e taku te Uea” (Reirei ao Berita aika Tabu 117:12–13).
Oliver ao kainabana, ae Lydia, e kamatoaki bwa te burabeti, ao te Uea e ataia bwa Oliver e tia ni karaoa ana kabanea n tamaroa e ngae ngkana e aki nakoraoi n taainako. Te Uea e kabonganai ana mwakuri korakora aika onoti i aon ana mwakuri ake a tia.
N aron te mitinare ao ai aron ngkai, I aki uringa ongoraen mwaitin taekan Oliver Granger, ma arana e taekinaki inanon koroboki aika tabu ibukina e ongeaaba nakon ana kairi te burabeti ao e karekei kakabwaia ni beritanakin—arana e bon tia ni uringaki n ae tabu. Ti reiakinna mairoun Oliver Granger bwa e ngae ngke te kaetieti e roko man te ibuobuoki mai ieta (rinanon te burabeti), ma e aki koaua bwa te kawai e aoraoi n akean te kakaewenako, ma taian berita ana nakoraoi (taraa Aramwa 37:17).
Tera aron maiura ngke arona bwa akea burabeti? Te burabeti ae maiu ao te Beretitenti n te Ekaretia e tei ibukin te rain ae eeti n te reitaki mairoun te Atua nakoia Ana aomata ao bon tii ngaia te aomata i aon te aonaaba ae karekei kaotioti ni kairan te Ekaretia ae bwanin. Ngaia naba e katauraoi kaotioti ake a roroko mairoun te Atua ni buokiira ni borauakin kakaewenako inanon ara tai. Man mutiakinan ana reirei te burabeti, ti kona ni kunea te rau, kimwareirei, ao te kaetieti inanon maiura ngkai ti kekeiaki n riki n aron Iesu Kristo. (Taraa Reirei ao Berita aika Tabu 21:4–6.)
Ti a bane ni kariaia te angareirei ao katooto mairouia burabeti n ara bong aei, n ataia bwa bon bwaai ni mwakuri ni bain te Atua ao a kairiira nakon kakabwaia ae akea tokina. I tangiriia ao N na tataro ibukiia. I kakaitau n ataia bwa a bon kairaki mai ieta ao a buokiira ma ara utu nakon ara Tia Kamaiu, Iesu Kristo.