“Kunean Motikan Rawara inanon Ara Berita aika Tabu,” Riaona, Tebetembwa 2024.
Kunean Motikan Rawara inanon Ara Berita aika Tabu
Iesu Kristo bon te buoka ibukin te tangira ae itiaki, kamarurung, kakukurei, ao kabebete.
Rongorongo man E a Manga Oki n Tautaeka ao n Uea, iroun Mary R. Sauer
Kunean motikan rawara rinanon ara berita aika tabu ma te Atua I a kaman iangoia ni kakaea te kabebete rinanon berita aika tabu n reitaki ma te Atua n te tai teuana ma teuana. Ngkai ana burabeti te Uea e a tia n reirei ao ni kaungaira n reiakin taekan berita aika tabu, tembora, ao mwaakan te nakoanibonga, I a tia ni ukoria, tangiria, ao kanuai i aon koaua ake a na kabouaki ni katuruturu inanon berita aika tabu.
Ti bane n nanonaki n iraorao n ibuokanbwai ma te Uea inanon kawai aika a mwaakaroiroi rinanon ara berita aika tabu. E tangiria n tiku iroura inanon tabeaiangara ao ara babaire. Ti aki kainanoaki ni mwakurii taian kakaewenako, nanokawaki, mwengabuaka, ao maraki n atuu man te maiu aei n tii ngaira. E na mena irarikira. E a tia n taku: “I bon aki kitaningkami ni motiki romi: I a okiringkami.” (Ioane 14:18).
Beretitenti Russell M. Nelson e kabwarabwara aron te Atua ao Ana tngira ae korakora ibukira e reirei bwa “kawain te berita ae tabu bon ibukin reitakira ma te Atua.” E taku: “N te tai are ngkoe ao ngai ti karaoa te berita ae tabu ma te Atua, ara reitaki ma Ngaia e rikirake ni kaan nakon riki ara berita ae tabu. Ngkai ti a uaia ni kabaeaki. Ibukin ara berita ma te Atua, E na bon aki kua n Ana mwakuri ni buokiira, ao ti na bon aki kabuaa Ana nanomatoa n nanoanga nakoira. Ngaira n tatabemaniira nako iai nera ae onoti iroun te Atua. Iai Ana kantaninga ae korakora ibukira.”
Moan Reken Rauu ae Korakora
Te titita are e tuai mareaki, te tatangira ao nanoanga aikai ni berita aika tabu n reitaki ma Tamara are i Karawa ao te Tia Kamaiu iai nnena ae mwakaroiroi inanon maiu ao a tia n riki ao bon moan rikin korakoran te kabebeteaki ao te rau. N aki taraa arora i aon te mareaki ke arora ni maeka, te Uea e tangiriira n iraorao ma Ngaia inanon kawai aika a mwakaroiroi—ni “katiteuanaaki” (3 Nibwaai 19:23) ma Ngaia inanon “[ara] waaki ni kabane” (Aramwa 37:37). Ngkana ti tang nakon te Uea ibukin boutokaara, ao “anga koauan [oin] nano[ra] ni katukua [Irouna] n aki toki” (Aramwa 37:36; e kairaki ma katuruturuana), maiura e kona ni kaonaki man tamaroan kabaean te berita ae tabu aei.
Rinanon ara Tia Kamaiu, Iesu Kristo, ti kona ni karekea te kabebeteaki man borauakinan kakaewenako n te maiu n tii ngaira.
Iai tabeaiangara ni kabane ao kainnanora are ti na kona n namakinna are bon tii ngaira inanona. E tabeakin aron tabeaiangara n aki taraia bwa buburara ke uarerekera. I a tia n namakina kainnanoan Ana ibuobuoki ngke raraomau i aon bwaai aika uarereke n aron are I atonga bwa “karaoan te auti” Akean kainabau ni kaetieti mangaia, I raraoma ngkanaai tii ngai n iango bwa antai te konturakita ae tau, tamaroan ana boo, anaan ana tai n te mwakuri n roko ni mweenga, ao te tia mwakuri ae tamaroa iaon au kataumwane ao mweengau. E bon nakoraoi n te bong are imwina ngke e tia mataroan au karaati! Te Uea e ongo tabeaiangau. Ao e ngae ngke e uarereke iangoan bwaai bwa e na tamaroan te mwakuri, E bon kaeka au tataro. E kanga? Rinanon te akoi mairoun kainrarikiu, ana ibuobuoki te Tamnei, te witeo iaon te YouTube, I kakabwaiaaki n ataia bwa tera ae N na karaoia ni katiaa te mataroa.
Ngkana te Uea e mutiakin kainnano aika a uarereke, iangoa aron Ana tangiria ni kakabwaia ao kamatoakira ni kangaangan kataakira ake ti rinanona man nanora ao tamneira, aika a mwaiti aekaia nako: iowaawa, anua aika a kareke, kangaangan reitakin te utu, te bua ao te bwarannano, rikiraken aorakin te iango ao kangaanga ni marurungin te rabwata, karawawata n te mane, reitinakon tabeaiangaia kaaro, reitinakon tabeaianga n tarauakiia kaaro, ikakorakora ma am onimaki, te ataei ke kainaba ake a rineia n aki iriiri inanon te euangkerio.
Inanon te mangaongao ao mamaran te rabwata n te maiu, I a tia ni kakorakoraai n reiakinna ao n taua ni kaaniai nakon au berita aika tabu n reitaki ma te Atua. Ngkai I a tia ni kakoaua inanon Ana tangira ao ni kataia ni karaoa te tamaroa ni katabua maiu Nakoina. E a tia ni katauraoa te kabebeteaki rinanon mwaakan Ana nakoanibonga are e riki bwa au tia Katauraoi inanon te kainnano n te maiu n tamnei ao n rabwata. E a tia ni katauraoa te kabebeteaki man te maaku, kabebeteaki man te aki mweeraoi, kabebeteaki man te kamoamoa, kabebeteaki man te bure, kabebeteaki man te tiku maroaa, kabebeteaki man te nanokawaki.
E reirei Unimwaane Nelson ma te kamataata ao n ataaki raoi bwa: “Te kaniwanga ibukin kawakinan berita ma te Atua bon te mwaaka mai karawa—mwaaka are e kakorakoraira ni kaaitarai ara kangaanga, kariiri, ao ni kanakoraoi uruakin nanora.”
Rinanon Iesu Kristo, ti kona ni karekea te kabebeteaki man borauakinan kangaangan n te maiu n tii ngaira.
Titita Yee ma uoman riki titita n te Micronesia ake a kaikawairakeia ataei ake a kitanaki irouia aia karo.
Titita “i aon Aban Marawa”
Ngkai I a tia ni manga iango i aon kakabwaia man kabaean te berita ae tabu ake ti karaoi ma te Atua, I iangoa aron katabeau ni Aonon Atia Meang.
E reke au tai ni kawara abamwakoron Chuuk i Micronesia, tao 1,500 te maire (2.400 km) i maiakimainikun Tiaban. Uoman Titita i Weno, Chuuk, a tia n anga maiuia ni kaikawairakeia ataei ake a tia ni kitanaki irouia aia karo. Titita aika uoman aikai a namakinna e kakawaki kaikawaakia ataei inanon te euangkerio. Temanna mairouia titita aikai e bon tuai iein ao e mwakuri bwa te kauntira n te reirei ae bwanin ana tai.
I tibwaia ma ngaiia ana rongorongo Beretitenti Nelson nakoia ainen te Ekaretia, are bon ngkami titita ae kam tangiraki, e riai, ao kakawaki.
Te titita ae tuai iein man tamaroa are e bon kaikawairakeia ai natina aine ao mwaane e rootia te tang ao e taku bon akea kakawakina, e namakina e mwanuokinaki. Ma e kakoaua e namakina ana tangira te Atua ao tararuaana irouna n ana taeka te burabeti are e bon “kakawaki,” ao e ataia e koaua. E namakina ana tangira ni kamarurung te Atua, e namakin te kabebeteaki.
E taku te Uea, “Kam aki ataia ae Ngai, ae te Uea ae Atuami, ae I karikiia aomata ni kabane, ao I uringia ake a mena iaon aban marawa?” (2 Nibwaai 29:7).
Titita aika a kinaaki iroun Tamaia are i Karawa ao te Tia Kamaiu. A aki maroaa. Ao ai arom ngkoe ao Ngai inanon kataaki ao kakaewenako. E tia ni kamwanangaai te Uea n te raroa ae 8,500 te maire (13,700 km) iaon te wanikiba, te turein, te kaa, ao te booti n uota ana tangira ao ana ibuobuoki te Atua nakon “temanna” i abamwakoron taari. Ao ngkai E na kakaeko ao ngai iaon oin ara abwamakoro ike ti na namakina iai te maroaa inanon te tabeaianga ao te rawawata ake ti uouoti inanora. E mena ikai n tainako ao e tauraoi ni kakabwaiara, kairiira, ao ni kabebeteira.
“I Kona n Roko Iroum”
Beretitenti Gordon B. Hinckley (1910–2008) e kabwarabwara n te taina ana taneiai te kairake are e buuraure “te tina ae itiman natina a karinan aia ririki man 7 to 16. E taekinna bwa te tairiki teuana e mwananga inanon te kawai bwa e na nikira te bwai teuana nakon kain rarikina.” Aikai ana taeka ngke e uringiia:
“Ngke I a rairaki n nakonako n okira mweengau, I kona n noora tauran au auti n otana. I kona n ongo okiokin bwanaaia natiu ngke I a nakonako n otinako man te mataroa tabeua te miniti imwaina. Ao are a taku: Tinara, tera ara katairiki?’ ‘Ko kona ni kairai nakon te raiburari?’ ‘N na anai tabeua boutita n te tairiki .’ I kua ao I aki konamaki, I taraa te auti ma taura a bane n ura n taian ruu nako. I iangoia ni kabane ataei ake a mena mweengau n tataningaai n noori bwaai ake a kainanoia. Uotan te tabeaianga e a namakina te rawawata nakon are N na kona ni uotia.
“I uringa taraakin karawa rinanon ranimatau, ao I taku, ‘Tamau are i Karawa ae ko tangiraki, I aki kona ni karaoia n te tairiki aei. I rangi ni kua. I aki kona ni kaitaraa. I aki kona n okira mweengau n tabeakiniia ni kabane ataei akekei n tii ngai. I kona n tii roko Iroum ao n tiku ma Ngkoe ibukin ti te tairiki aei? …’
“I aki ongo raoi taeka ni kaekaana, ma I ongo bwanaaia n au iango. Te kaeka bon: ‘Akea, ngkoe ae ko uarereke, ko aki kona n roko nakoiu ngkai. … Ma I kona n roko nakoim.’”
“I kona n roko nakoim.” E roko nakon neiei, ao E na roko naba nakoim ao ngai, n aron te Tia Kamaiu e roko nakon te aine ietan te mwaniba ike e mwakuri ao kaboaki n ana bong (taraa Ioane 4:3–42). E kaunga neiei, e reireinna, e taekina Arona ni meetia nakon neiei, ao e tangira neiei ngke tao neiei e bon aki tangiria i bon irouna. Nakon te aine ietan te mwaniba, nakon te tina ae kairake ma itiman natina, nakoiu ao ngai, Iesu Kristo e tei n tauraoi ni katauraoa motikan rawara. I kaotia bwa ngaira ti kona ni karekea te kabebeteaki rinanon ara berita aika tabu ni kabaeaki ma te Atua ae tatangira.
Tao ti te arona ma ngai, ko a tia ni bubuti ibukin buokam n aki katukaki n tii ngkoe inanon tabeua taai ni kairoroan maium n te namakin, n rabwata, ao te maiu n tamnei inanon maium. Taai n tauaninne aikai man te rikirake a tia nako tera ae I aranna “raeraeaki n tamnei” iaon te rabwata. Ma I kaota au koaua bwa E a tia ni uotai, ao E na uotiko. E a tia ni korea arara i nanon baina (taraa Itaia 49:16; 1 Nibwaai 21:16). E a tia ni mena ikekei ngke ko ukoria “n riki raoiroi inanon te rootongitong.” E aki mwanuokinai, ke E na mwanuokiniko. Ao N na Tangiria n aki toki.
Nakoimi tariu ao mwaneu aika kam tangiraki, moan rikin te tangira ae itiaki, kamarurung, kakukurei, ao kabebete a tia ni kuneaki iroun Iesu Kristo. I kakoaua bwa Iesu Kristo bon Motikan Rawara .
E tangiria n tabeakiniko, ni kakabwaiako ao ni kabwarai am bure. E roko ibukin oin raoi te kantaninga, ni katauraoiko ma mwaitin kainanoan te kabebete are ko ukoria. Boni Ngaia te Tia Kabooi Maiura man te aonaaba, ao I kakoaua bwa E maiu ao E tangiriko.
Man te marooro n aia Maungatabu Aine are e karaoaki i Bringham Iuniwetiri ni Meei 3, 2023.