Bwanaaia Aika Itiaki ni Boong aika Kaitira

Ana Boki Moomon e Uota te Rau Nakoiu

Iroun Américo Chantre Fernandes, Cape Verde

I karekea au atatai bwa Ana Boki Moomon bon te kakukurei ni bitakin maiu ao e uotai ni kaniai nakon Iesu Kristo.

Kamataata n te korotamnei iroun Allen Garns

N rabanen 2013, uoman ataeinimwaane a kabarakiniia n te mainaina ao a neketai a moana kawaran mwaneu uoua te tai n te wiiki. I ataia n tet tai ae waekoa bwa a roko man te aro. Ibukiu, katabeau ni mwakoron te aro bon tiaki au baire, ngaia are I iangoia n aki kan taetae nakoia.

Ma ni katoaa rorokoia, I kataia bwa N na aki mena te mweenga ngkana a roko. Te bwai teuana ae onoti, e ngae n anne, e katika matau. A aki toki ni uouota te boki ae buruu. I tuai nonooria mai mwaina, ao e taraa ni kamimii irou.

Teuana te bong inanon au ruu, mwaneu e moanna n tuangai taekan te boki. N tai ae karina, a roko uoman ataeinimwaane. Akea au anga, I aki kona ni karabaai mairouia. A noriira ma te boki ae buruu—Ana Boki Moomon—ao e moanaki te titiraki bwa tera ataakin Iesu Kristo irou.

Ngke I ongora irouia mitinare man te bong arei, I bon namakina te kairaki bwa a kanga n reita aia anga reirei nakon Ana Boki Moomon. Ao n tokina, , te boki ae buruu ai akea kamimina irou.

I teimatoa ni karekea te nanououa iai, ma I moana warekana. I karekea te atatai bwa Ana Boki Moomon bon tiaki onean mwiin te Baibara ma e bon kakukurei ni bita maiu ao e uotai ni kaaniai nakon Iesu Kristo. I reiakinna bwa Ana Boki Moomon e bon boboto i aon te Tia Kamaiu. Angareirei mai iai e buokai n ataia bwa antai Ngaia ao antai Tamara are i Karawa.

Ana Boki Moomon e waekoa ni buokai n riki bwa te aomata ae tamaroa, ana reirei ni koaua Iesu Kristo. E buokai naba ni katamaroa anuau ngkai I kaaitarai kakaewenako ni katoa bong. Man au taneiai ni kamatebwaiana, I ataia e buokiia aomata n roko nakon Kristo ao ni maiuakina te euangkerio (taraa Moronaai 10:32). E kaungaiira n tou mwin ana reirei Kristo ao ni kamwakuria inanon maiura ni katoa bong. E anganiira te wanawana bwa ngaira natin te Atua mwaane ao aine. E uota te rau.

Imwiin tabeua te wiik imwiin kakaitibou ma mitinare ao warekan Ana Boki Moomon, I a bwabetitoaki. I kaota au kakoaua ma nanou ni kabane bwa Ana Boki Moomon e koaua ao warekana e uota te kantaninga ao te oota inanon kakaewenako aika a kangaanga n te maiu, e buokiira n namakina ana tangira te Uea ao kamanoakira. I kakaitau ni karekea Ana Boki Moomon inanon maiu.