“Kakaitau ibukin te Burabeti,” Riaona, Tebetembwa. 2024.
Ibukiia Kaaro
Kakaitau ibukin te Burabeti
E kamauriia Aomata aika Itiaki Beretitenti Russell M. Nelson i Kona, Hawaii, n 16 Meei, 2019, n tain ana mwananga ni beku n Tebetebeke.
Nakoia Kaaro aika a Tangiraki,
E bukamarua ana ka 100 n ririki n te namwakaina aei Beretitenti Russell M. Nelson. Rongorongo n te beebwa ni kaongora aei e katuruturua arona ngke ngaia ma burabeti tabeman a kairiira nakon Iesu Kristo.
Teuana te kawai ae a kona n iriira te burabeti kairake bon man kaekaan ana kakao n ira te tieminarii n taai nako ao n wareki koroboki aika a tabu ni katoabong. E a tia ni beritanii kakabwaia aika a kamiimi nakoia ake a karaoia, n raonaki ma te reirei n karekean oin kaotioti, kunean kaeka nakon titiraki ni kangaangan te maiu, ao te roko n kina te tia Kamaiu. A tia n ongo te kakao ni burabeti aei natim aika a ikawai? Nakon seminary.ChurchofJesusChrist.org n karekei riki rongorongo tabeua.
Marooro iaon te Euangkerio
Uringa Am Berita Aika a Tabu
N ana rongorongo Beretitenti Jeffrey R. Holland n iteraniba 4,, ti reiakina aron kawakinan ara berita aika a tabu ao bwainakin kamenti n te nakoanibonga ae tabu i mwiin tiara n entaau ni karekea kamanoan ao kaaniara nakon te tamnei. Ko kona n tibwaa ana taeka ma am utu man te rongorongo ao n marorooakina aron bwainakin te kamenti “karaoan te mwakuri man te motinnano ae nako man te nano.” Tera riki mwakurin nanora ake ti kaoti n ara motinnano bwa ana reirei Kristo?
Kawakina taian Tuua
E titirakina Beretitenti Nelson Unimwaane Isaac K. Morrison ibukin te rongorongo ae onoti ibukin buuna ao natina. Ana kaeka te burabeti bon “Kawakin taian tua” (Taraa iteraniba 20.) Ko kona n titirakiniia natim: E na kanga n kaokoro am rinerine ngkana e tekateka te burabeti ma ngke n te taibora ao n tuangko bwa ko na kawakin taian tua?
Iriira te Burabeti
E a koro 100 ana ririki ni maiu Beretitenti Nelson n te namwakaina aei! E tibwai tabeua reirei Beretitenti Dallin H. Oaks are e a tia n reiakinna mairoun te burabeti (taraa iteraniba 12). Tera ae a tia n reiakinna am taei mairoun te burabeti? Iai te marooro ae onoti ke te bootaki n taromauri ae rianako taraanai rouia? Tibwaa am iango. Ko kona ni matakuakina te rongorongo n te witeo mai irouna.