Rongorongo ni Kairiiri man te Aono
Oki ao Manga Kataia Riki, Rinanon te Tataro ao te Ongotaeka
E reirei te Uea bwa ti riai n tataro nakon te Tama n Arana. E taku naba:
“Ngai te kai ae te kurebe ni koaua, ao Tamau te tia ribana. Kam na maeka i nanou, ao Ngai I nanomi. E aki kona ni kariki uaa te mwanga i bon irouna, ngkana e aki mena ni kaina; kam aki kona, ngkana kam aki maeka i nanou.
“Ngai kaina, ngkami mwangana. Ane maeka i nanou, ao Ngai i nanona, bwa kam aki kona te bwai teuana ngkana kam a raure ma Ngai. Ngkana kam maeka i nanou, ao ngkana a maeka au taeka i nanomi, ao kam na bubuti baika kam tangiri, ao a na reke i roumi.”
Ngke te kairake ni mwaane ni ikawairake i Tonga, E riingaki nanou n karakinan Tuku Fonua, te bwai ae rianako are e riki I Pouono, Vava’u, n 1839. E mwaakena tokin te buaka n te aba ao tein ana kairiiri Siaosi Taufaʻāhau Tupou I. I nanon tain tataron te Tuku Fonua, e karika Tonga Siaosi Taufaʻāhau Tupou I bwa te “Aba ae anganaki te Atua.” Te waaki ae kakaawaki aei e ikotiia kaain Tonga bwa I-Tonga ao Kiritian.
E butanako te reirei ni Kiritian nakon ana tabo nako te botanaomata ao taabo aika a onoti ao e kona ni kakoauaaki riki n te Tabati, bongin te motirawa. Kunan aban Tonga e riki naba bwa te tataro nakon te Atua, ni bubuti te kamanomano. N te bong aei, I namakina te kakabwaiaaki man ana onimaki te Uea ae Siaosi Taufa’ahau Tupou 1. Te Tuku Fonua bon moanan aroia kaain Tonga n ukora nanon te Atua ni bwaai ni kabane ake ti karaoi. E karikiira n ae onoti n aanga aika a mwaiti, ao kaokiokan te karaki aei e rangi ni kakaawaki nakoia te roro ae na roko.
I nanon 18 te ririki i nanon maiu, I iriiria au karo ao tibuu nakon te taromauri ni katoa Tabati. Kakoauaan kimwareireia e kaona nanou n te nano ae korakora ibukiia oin natiu bwa a na kunea te kimwareirei n iriirakin te taromauri ao te reitaki ma te Tama are i Karawa. Ikawairakeu i nanon Ana Aro Tonga ae Inaomata, I noora aron kakaonimakiia minita n reireiniira bwa ti na karimoa n taainako te Atua i nanon maiura. Aio e uota te kakabwaia ae korakora nakoiu. Ti mwaing nako Auckland, New Zealand, n ukora te maiu ae Tamaroa riki, n aki ataia bwa e katauraoira te Atua ibukin te waaki ae korakora riki.
N 2019, temanna mai ibukoia mitinare are e kuneira ao ni kaoira bwa ti na iriira ara Tia Kamaiu, ae Iesu Kristo, e karakina te karaki nakoiu ao kainnabau ae Lupe. E taku bwa n te 1990, ngaia ma toana a katorobubua n tataro, bwa a ukoria ni kan ataa nanon te Uea. A kairaki nakon te tabo teuana ike a karebwerebwe i aon mataroa ni kabane, ma bon akea temanna ae kan ongora n aia rongorongo.
Ngke a nang kitana ikekei, e namakinna i nanona bwa a na oki ao n kataia riki. Ma te ongotaeka, a manga moana aia karebwerebwere n taian mataroa ake a bon tia n karebwerebwe iai mai i mwaaina, ao ngke a roko n te kaonoua n auti, I tekateka i tinaniku. Ao ikanne are e a waaki iai au atatai n ana euangkerio Iesu Kristo.
A reireinai mitinare uoman aika a rangi n tamaroa aikai taekan ana babaire ni kamaiu Tamara are i Karawa, taekan te Moan Mi ni Burabeti, ao ana Boki Moomon. A reireia aron Iotebwa Timiti, ni kan ataia bwa e ngaa te ekaretia ae riai ni kainna, warekan ana boki Iakobwa ao n tataro nakon te Atua, ma te onimaki bwa e na kaekaaki ana tataro.
A kaota aia kakoaua mitinare bwa ni kaekaan ana tataro, a kaoti te Atua te Tama ao Natina ae Ana Rikitemanna ae tatangiraki irouna ae Iesu Kristo nakon Iotebwa Timiti, ao e weteaki bwa te burabeti, ao ana euangkerio Iesu Kristo e a manga kaokaki irouna.
E rangi ni boou aikai ni kabane nakoiu, ma a berita bwa I kona n ataia i bon irou ngkana e bon riki aei. A anganai ana Boki Moomon, ma te kakao bwa N na warekia, n iangoia raoi inanou, ao ni karaoa ana kakao Moronaai ni butiia te Atua ngkana e koaua te boki.
Ngke a oki uoua te bong i mwiina, I kabwarabwaraa bwa i mwiin warekan kabwarabwaraan te boki, aia koaua taan kakoaua, ao rongorongon Kristo ni kawarakiia aomata n te ka-3 n Nibwaai, I bubutia te Atua n kan ataia ngkana e koaua. I namakina te abuee ni kabane rabwatau ma I aki ota bwa tera anne. A manga reireinai mitinare mwaane bwa te Tamnei ae Raoiroi e kaota ana kakoaua nakon tamneiu, are e uota te kukurei nako nanou. A raonira n ara reirei are i mwiina tinau ao teniman tariu aika a uarereke, ao ti bane ni bwabetitoaki nakon Ana Ekaretia Iesu Kristo ibukiia Aika Itiaki ni Boong aika Kaitira.
Ma ranin matana ni kimwareirei te mitinare ngkoa, ae Tomasi Takau, e tibwaa te bwai are e rinanona 30 te ririki n nako, e kakabwaiaaki ngkai ni kakoaua uaan ana mwakuri. Man, aia tataro, aia onimaki, ao ninikoriaia te Mitinare ae Tomasi Takau, ao toana, ae Johnson, I karaoa au mwakuri ni mitinare i Wellington, New Zealand, man 1991 nakon 1993, i mwiina I kaitibo ao n mare ma kainnabau ae Lupe n te Hamilton New Zealand Tembora, ao ai aman ngkai natira mmwaane, ao temanna natira te aine, ma uoman tibura ao te kateniman ae na bungiaki rimwi riki n te ririki aei.
Ai bon te kimwareirei iroun Lupe ao ngai ngke ti kaitibo ma natin Tomasi Takau te mwaane, are e a mitinare ngkai i Tonga. N tarataraan matan te Mitinare Takau, I karabwa tamana ibukin uotan kakimwareirein te euangkerio nako nanon maiu ao ana tataro korakora ma toana n ataakin nanon te Atua i nanon ririki ake a bwakanako akanne, ao I karabwa naba te ataeinimwaane aei ibukin kaekaan te kakao mairoun Beretitenti Russell M. Nelson ibukiia ataeinimwane ni kabane ni karaoan aia mwakuri ni mitinare. E korakora kakawakia aomata imatan te Atua.
E bitaki maiu ibukina bwa uoman mitinare iai irouia te ninikoria ni kakoroa nanon ana kaantaninga te Uea ‘n nako riki te kauoua n tai’. I ataia bwa e ongo ao ni kaekai aia tataro natina Tamara are i Karawa. I kakaaitau ibukin kaainakin Ana Ekaretia Iesu Kristo ibukiia Aika Itiaki ni Boong aika Kaitira, ao I ataia bwa ti kairaki iroun ana burabeti te Atua ae maiu. Iesu Kristo bon te Tia Kamaiu ao te Tia Kabooa te Aonaaba. Ti a kabaeira ma Ngaia are iai irouna te mwaaka ni kabane ni kamaiu, kabwarabure, ao ni kakabwaiai maiura, n aran Iesu Kristo. Amen.