Bwanaaia Aika Itiaki ni Boong aika Kaitira

Te Tamnei E Karaoi Bitaki

Mairoun Lisa Nielsen Young, South Carolina, USA

I kona n namakina aia tangira kaain te Uoote ngkai a anene ngkai I aki raoniia.

Kamataata n te tamnei iroun Katy Dockrill

Ti bon maemaeka n te taaun ae uarereke i Georgia, USA ngke tamau e mate ngke 55 ana ririki. Angiia ara utu a maeka n te titeite teuana. Te 2,000 ni maire (3,200 km) imarenara ao ara utu e aki riki bwa te raroa inanon taai akekei.

Kainabau bon te bitiobi ao Ngai bon te tia biano n ara uoote ae uarereke. Te namakin ao ni kua ma buokan bairean te taunimate, I a bon namakina te kua n te Tabati anne ngke e a roko tain te anene ni kainiin ibukin ara bootaki n toa. ”God Be with You Till We Meet Again” (Anene n taromauri, nambwa. 152).

E a boo inukan te kauoua ni kibu, e a taonai angin te tang. Ma n anne I katangitang ni karokoa banen te kibu, ma baiu a ruru ao matau a onrake n ranimata are I a toki ma kabanean kibuna e a tiku. I aki kona ni katoka tangiu.

E toki teutana ngke kain te taromauri a ataa te aokan bwa e a toki. Ma ngkanne membwa n te uoote a moanna n anenea te cappella. Te anene e aki nakoraoi. Ngaira bon tii tabeman, ma e nakoraoi. Ma te Tamnei e karaoi bitaki. Rinanon ranimatau ao ni maamaa, I kona ni namakina aia tangira ngke a anene.

Te Atua e mena iroum ni karokoa manga kaitiboora;

Kawakina ana baana te tangira ni beibeti iaom;

Orea kakamaakun te mate iaom.

Te Atua e mena iroum ni karokoa manga kaitiboora.

Ngke e a toki te anene, te tia kaira te katangitang e tauai ngke I tang inanon te tataro ni kainiin. Tabeman aomata a roko nakon te aokan ma ranin mataia n taekina nanokawakiia ibukin tamau.

Imwiina, I tuanga te tia kairiiri n te katangitang ae N na tii kakatanga te biano n tain te taunimate. E taraa n ae e aki raoiroi te iango imwin te bwai ae e a tia n riki, ma tamau e rangi ni kukurei n ongora katangan au biano. I tangiria ni katangnga ibukina. I ataia imwina bwa kaanra are e a tia n namakinna inanon te anene ni kainiin.

I rangi ni kakaitau ibukin te anene. I kakoaua bwa te katangitang e kona reirei ao ni kabebeteira inanon kawai are e aki kona te taeka ni karaoia. Ngkai te Moan Beretitentii a koreia n te moan kabwarabwara n te boki n anene, “Anene n taromauri … karau nanoia aika kua, kakorakoraia aika tang, ao kaungaira n teimatoa ni karokoa te toki.” I bon kaitau naba ibukin te tangira ae tamaroa n te uoote ngke I bon raroanako mai irouia oin au utu. I ataia bwa Tamau ao Ngai ti na manga bon kaitibo teuana te tai.